ជាតិ
RUPP នឹងរៀបចំគំរូអង្គការសហប្រជាជាតិដើម្បីបង្កើនការយល់ដឹងកិច្ចការការទូត
×
ដេប៉ាតឺម៉ង់សិក្សាអន្តរជាតិ នៃវិទ្យាស្ថានភាសាបរទេស នៃសាកលវិទ្យាល័យភូមិន្ទភ្នំពេញ នឹងរៀបចំសន្និសីទគំរូអង្គការសហប្រជាជាតិមួយ (PPMUN) ក្រោមប្រធានបទ«ការលើកកម្ពស់ និងការការពារសិទ្ធិ ពលករចំណាកស្រុក» នាថ្ងៃទី២៦ ខែមិថុនា ពីម៉ោង៧ដល់១២ព្រឹកនៅមជ្ឈមណ្ឌលសហប្រតិបត្តិការ កម្ពុជា-កូរ៉េ។ កម្មវិធីនេះ នឹងជួយជំរុញឲ្យនិស្សិតអាចបង្កើនសមត្ថភាពក្នុងការយល់ដឹងបន្ថែមលើបញ្ហា ប្រឈមពិភពលោកបច្ចុប្បន្ន និងការស្វែងរកដំណោះស្រាយតាមរបៀបការទូត។
លោក នាក់ ចិន្តារិទ្ធិ ប្រធានស្តីទីដេប៉ាដឺម៉ង់សិក្សាអន្តរជាតិនៃវិទ្យាស្ថានភាសាបរទេស បានថ្លែងប្រាប់ សារព័ត៌មានថ្មីៗថា សន្និសីទគំរូអង្គការសហប្រជាជាតិ មានគោលបំណងឲ្យនិស្សិតបានយល់ដឹងពីរបៀបដោះស្រាយបញ្ហាក្នុងកិច្ចប្រជុំជាក់ស្តែងរបស់មហាសន្និបាតអង្គការសហប្រជាជាតិ។
លោក បន្ថែម ថា តាមរយៈសន្និសីទនេះ និស្សិត នឹងអាចពង្រឹងជំនាញបន្ថែមរបស់ពួកគេដូចជា ជំនាញនៃ ការចរចា ការថ្លែងសុន្ទរកថា និងនិយាយជាសាធារណៈ ការស្រាវជ្រាវ និង ការសរសេរ ផងដែរ។
លោកសាស្ត្រាចារ្យ បានពន្យល់ ថា សន្និសីទគំរូអង្គការសហប្រជាជាតិ តម្រូវឲ្យក្រុមនិស្សិត ដែលជា អ្នកបង្ហាញពីគំរូនៃកិច្ចប្រជុំរបស់អង្គការសហប្រជាជាតិនោះ ត្រូវស្រាវជ្រាវ សរសេរ និងលើកឡើង ពីគោលជំហរតាមបែបការទូតរបស់ប្រទេសដែលពួកគេ តំណាងឲ្យលើប្រធានបទដែលជាបញ្ហាដែល ត្រូវស្វែងរកដំណោះស្រាយរួមក្នុងសន្និសីទនោះ។
សូមជម្រាបផងដែរថា សន្និសីទគំរូអង្គការសហប្រជាជាតិ ដែលរពឹងថា នឹងមានការចូលរួមពីសំណាក់ សិស្ស និស្សិត និងសាស្ត្រាចា្យប្រមាណ៦០០នាក់នោះ ក៏អនុញ្ញាតឲ្យអ្នកសារព័ត៌មានអាចយកព័ត៌មានក្នុងព្រឹត្តិការណ៍នោះផងដែរ៕
© រក្សាសិទ្ធិដោយ thmeythmey.com