ជាតិ
នយោបាយជាតិ
លោក យឹម សុវណ្ណ ប្រាប់អ្នកគាំទ្រខ្លួនថា អន្តរជាតិ គាំទ្រការតស៊ូរបស់បក្ស
× ភ្នំពេញ៖ គណបក្សសង្គ្រោះជាតិ នៅតែចាត់ទុកស្ថានការណ៍នយោបាយនៅកម្ពុជាថា មានភាពអាប់អួល ហើយព្យាយាមស្វែងរកដំណោះស្រាយជាមួយគណបក្សប្រជាជនកម្ពុជា តាមរយៈការចរចា។ ការតស៊ូដោយអហិង្សារបស់បក្សប្រឆាំង ទទួលបានការជ្រោមជ្រែង ពីសហគមន៍អន្តរជាតិនានា។ នេះជាការអះអាងរបស់លោក យឹម សុវណ្ណ អ្នកនាំពាក្យគណបក្សសង្គ្រោះជាតិ ដែលបានថ្លែងទៅកាន់អ្នកគាំទ្រនិងអ្នកសារព័ត៌មាន នៅទីស្នាក់ការកណ្តាល នាពេលព្រឹកថ្ងៃទី២៣ ខែមិថុនា ឆ្នាំ២០១៦ ។
លោក យឹម សុវណ្ណ បានលើកឡើងថា បណ្តាប្រទេសជាមិត្រ និងអង្គការអន្តរជាតិជាច្រើន បានគាំទ្រការតស៊ូរបស់គណបក្សសង្គ្រោះជាតិ ដែលរក្សាវប្បធម៌សន្ទនា ក្នុងការបញ្ចប់វិបត្តិនយោបាយ។ លោកបន្ថែមថា សហគមន៍អន្តរជាតិ ក៏ព្រួយបារម្ភពីស្ថានការណ៍នយោបាយនៅកម្ពុជា ដូចគណបក្សសង្គ្រោះជាតិដែរ។
អ្នកនាំពាក្យបក្សប្រឆាំងរូបនេះបានបញ្ជាក់បែបនេះថា៖«ទាំងអង្គការសហប្រជាជាតិ ទាំងសហភាពអឺរ៉ុប ទាំងសហរដ្ឋអាមេរិក និងបណ្តាប្រទេសដែលស្រឡាញ់លទ្ធិប្រជាធិបតេយ្យ នៅលើសាកលលោក គេបានបញ្ជាក់យ៉ាងច្បាស់ថា នយោបាយស្រុកខ្មែរ កំពុងស្ថិតក្នុងភាពព្រួយបារម្ភ ដែលត្រូវតែមានការដោះស្រាយ។ យើងជឿជាក់ថា អន្តរជាតិមិនបណ្តោយឲ្យស្ថានការណ៍នយោបាយទល់ច្រកបន្តទៀតទេ»។
ក្រៅពីសំអាងលើយន្តការអន្តរជាតិ គណបក្សសង្គ្រោះជាតិ នៅតែពឹងផ្អែកលើការចរចា ជាមួយបក្សកាន់អំណាចផងដែរ ដើម្បីរំងាប់កម្តៅនយោបាយ ជាពិសេសការទាមទារ ឲ្យលើកការចោទប្រកាន់ទៅលើអ្នកនយោបាយនិងសកម្មជនបក្សប្រឆាំង រួមទាំងមន្ត្រីសង្គស៊ីវិលមួយចំនួន ដែលកំពុងស្ថិតនៅក្រោមចំណាត់ការរបស់តុលាការ។ លើសពីនេះទៀត ការប្រើប្រាស់សំឡេងគាំទ្ររបស់ប្រជាពលរដ្ឋ តាមរយៈការដាក់ញត្តិថ្វាយព្រះមហាក្សត្រ ក៏ជាយុទ្ធសាស្ត្រមួយ ដែលគណបក្សសង្គ្រោះជាតិ នៅតែត្រូវការ ដើម្បីទទូចឲ្យបញ្ចប់ការរំលោភអភ័យឯកសិទ្ធិ និងការធ្វើទុក្ខម្នេញលើបក្សប្រឆាំង។ នេះជាការបន្ថែមរបស់លោក យឹម សុវណ្ណ៕
© រក្សាសិទ្ធិដោយ thmeythmey.com