កីឡាជាតិ
ជាតិ
ការប្រកួតកីឡាឧត្តមសិក្សា និងមធ្យមសិក្សាឆ្នាំនេះកើនទាំងប្រភេទកីឡា និងអត្តពលិក
× ការប្រកួតកីឡាឧត្តមសិក្សា និងមធ្យមសិក្សាបច្ចេកទេសជ្រើសរើសជើងឯកទូទាំងប្រទេសប្រចាំឆ្នាំ២០១៦ នេះ មានការកើនឡើងទាំងប្រភេទកីឡា និងអត្តពលិក បើប្រៀបធៀបទៅនឹងឆ្នាំមុន ដោយឆ្នាំនេះមានអត្តពលិកចូលរួមជិត១០០០នាក់តំណាង២៣សាលា និងមាន៦ប្រភេទកីឡា។ ការប្រកួតនេះនឹងចាប់ផ្តើមពីថ្ងៃទី២៧ ខែមិថុនា ដល់ថ្ងៃទី៨ ខែកក្កដា នៅលើទីលានចំនួន៥ក្នុងរាជធានីភ្នំពេញ។
សូមស្ដាប់ព័ត៌មានលម្អិត៖
ការប្រកួតកីឡាសិស្សឧត្តមសិក្សា និងមធ្យមសិក្សាបច្ចេកទេសមានការកើនឡើងទាំងចំនួនកីឡាករ និងប្រភេទកីឡា ពោលគឺឆ្នាំនេះមានកីឡាករចូលរួមចំនួន៩៨៧ នាក់ (ស្រី១៩៥នាក់)តំណាង២៣សាលា និងមាន៦ប្រភេទកីឡាចូលរួមគឹ បាល់ទាត់ បាល់បោះ បាល់ទះ អត្តពលកម្ម ប៉េតង់ និងវាយកូនឃ្លីលើតុ ខណៈឆ្នាំមុនកីឡាករមាន៨៩១នាក់ និង៤ប្រភេទកីឡាចូលរួម។
លោក ដួង មាសចំរើន ប្រធាននាយកដ្ឋានកីឡាសិស្ស-និស្សិតបានបញ្ជាក់ថា៖«ការប្រកួតកីឡាឧត្តមសិក្សា និងមធ្យមសិក្សាជ្រើសរើសជើងឯកទូទាំងប្រទេសឆាំនេះ កីឡាករចូលរួមមានការកើនឡើងចំនួន៩៦នាក់ និង២ប្រទេសកីឡា គឺកីឡាប៉េតង់ និងកីឡាវាយកូនឃ្លីលើតុ ដោយឆ្នាំនេះមាន៦ប្រភេទកីឡា ខណៈឆ្នាំមុនមានតែ៤ប្រភេទប៉ុណ្ណោះ»។
ដើម្បីជួយសម្របសម្រួលឲ្យដំណើរការនៃការប្រកួតដែលធ្វើឡើងនៅ៥ទីតាំងក្នុងរាជធានីភ្នំពេញ គឹនៅពហុកីឡដ្ឋានជាតិ, កីឡដ្ឋានវេស្ទើន, វិទ្យាស្ថានជាតិអប់រំកាយគីឡូលេខ៤, សាលាបឋមសិក្សាទួលគោក និងសាលាបឋមសិក្សាច្បារអំពៅ ឲ្យមានដំណើរការល្អ ប្រធានគណៈបច្ចេករៀបចំការប្រកួត នឹងដាក់សមាជិកគណកម្មការរៀបចំបច្ចេកទេសនៃការប្រកួតចំនួន២៣១នាក់។
ជាមួយគ្នានេះ លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជាបានបញ្ជាក់ថា ការប្រកួតកីឡាសិស្សឧត្តមសិក្សា និងមធ្យមសិក្សាបច្ចេកទេសជ្រើសរើសជើងឯកទូទាំងប្រទេសប្រចាំឆ្នាំ២០១៦ នេះ ធើ្វឡើងក្នុងគោលបំណង ដើម្បីប្រែក្លាយកីឡាក្របខណ្ឌនិស្សិតនេះឲ្យក្លាយជាប្រភេទកីឡាដូច National Game ម្យ៉ាងទៀត ដើម្បីជាថ្នាលសម្រាប់ត្រៀមការប្រកួតស៊ីហ្គេមលើកទី៣២ ឆ្នាំ២០២៣ ដែលកម្ពុជានឹងធ្វើជាម្ចាស់ផ្ទះ។
ទន្ទឹមនឹងនេះ ការរៀបចំការប្រកួតកីឡាសិស្សឧត្តមសិក្សា និងមធ្យមសិក្សាបច្ចេកទេស គឺដើម្បីពង្រីកធនធានកីឡាករនៅតាមបណ្តាសាកលវិទ្យាល័យទាំងក្នុងរាជធានីភ្នំពេញ និងតាមបណ្តាខេត្តទូទាំងប្រទេស ឲ្យមានការកើនឡើងទាំងបរិមាណ និងគុណភាពបច្ចេកទេស ព្រោះវាជាគោលដៅដ៏សំខាន់សម្រាប់ការប្រកួត SEA Games។
ជាមួយគ្នានេះ ដើម្បីប្រែក្លាយកីឡាសិស្សឧត្តមសិក្សា និងមធ្យមសិក្សាឲ្យមានលក្ខណៈដូច National Games លោកអគ្គលេខធិការនៃគណៈកម្មាធិការជាតិអូឡាំពិកកម្ពុជា បានក្រើនរំឮកដល់បណ្តាសាកលវិទ្យាល័យទាំងអស់ត្រូវមានការផ្សារភ្ជាប់វិស័យកីឡាជាមួយការអប់រំ ជាពិសេសត្រូវដាក់កម្មវិធីហ្វឹកហាត់កីឡាឲ្យច្បាស់លាស់ទៅក្នុងកម្មវិធីសិក្សាអប់រំ ធ្វើយ៉ាងនេះដើម្បីជួយលើកស្ទួយវិស័យកីឡាកម្ពុជាឲ្យមានការរីកចម្រើនកាន់តែខ្ពស់។
សម្រាប់ការប្រកួតនេះគណៈកម្មការរៀបចំការប្រកួតនឹងបន្ថែមប្រភេទកីឡាជារៀងរាល់លើក ពោលគឺយ៉ាងហោចណាស់មាន ៣០ ទៅ ៣៥ប្រភេទកីឡា ដើម្បីឆ្លើយតមទៅនឹងផែនការមេស៊ីហ្គេម។ ដូច្នេះដើម្បីពង្រីកសក្តានុពលនៃប្រភេទកីឡានេះ គណៈកម្មការរៀបចំការប្រកួតនឹងយកប្រភេទកីឡាថ្មីៗដែលមាននៅតាមសាកលវិទ្យាល័យមកដាក់បន្ថែម។ ម្យ៉ាងទៀតនិងដាក់ប្រភេទកីឡាដែលមាននៅក្នុងផែនការមេស៊ីហ្គេមឲ្យហ្វឹកហាត់នៅតាមសាកលវិទ្យាល័យផងដែរ។
គួរបញ្ជាក់ថា ការប្រកួតកីឡាសិស្សឧត្តមសិក្សា និងមធ្យមសិក្សាបច្ចេកទេសជ្រើសរើសជើងឯកទូទាំងប្រទេសប្រចាំឆ្នាំ២០១៦ មានកីឡាករ ៩៨៧នាក់តំណាង២៣សាលាចូលរួម ដោយពួកគេទាំងនេះនឹងធ្វើការប្រកួតលើ៦ប្រភេទកីឡាដែលបែងចែកជា៣៣វិញ្ញាសា។ ការប្រកួតនេះនឹងប្រព្រឹត្តទៅនៅលើទីលានចំនួន៥ ដោយចាប់ផ្តើមពីថ្ងៃទី២៧ ខែមិថុនា ដល់ថ្ងៃទី៨ ខែកក្កដា ខាងមុខនេះ៕
Tag:
វ៉ាត់ ចំរើន
ដួង មាសចំរើន
ជើងឯកឧត្តមសិក្សាទូទាំងប្រទេស ២០១៦
© រក្សាសិទ្ធិដោយ thmeythmey.com