កីឡាជាតិ
ជាតិ
ប៉េតង់កម្ពុជា ត្រៀមខ្លួនដណ្តើមមេដាយពី Asian Beach Games នៅវៀតណាម
× សហព័ន្ធកីឡាប៊ូល និងប៉េតង់កម្ពុជានឹងបញ្ជូនកីឡាករចំនួន១៨នាក់(ស្រី៩នាក់) ដើម្បីចូលរួមប្រកួតកីឡាប៉េតង់ជ្រើសរើសជើងឯកប្រចាំព្រឹត្តិការណ៍កីឡាឆ្នេរខ្សាច់ (Asian Beach Games) នៅទីក្រុងដាណាង ប្រទេសវៀតណាម ក្នុងខែកញ្ញា ខាងមុខនេះ។ ថៃ ត្រូវបានលោកអគ្គលេខាធិការសហព័ន្ធកីឡាប៊ូល និងប៉េតង់កម្ពុជា ចាត់ទុកជាឧបសគ្គធំសម្រាប់កម្ពុជាក្នុងការគ្រងតំណែងជើងឯកក្នុងព្រឹត្តិការណ៍នេះ។
ថៃបានក្លាយជាឧបសគ្គដ៏ធំសម្រាប់កម្ពុជាក្នុងក្រសែភ្នែករបស់ លោក អ៊ិន គឹមស្រ៊ុន អគ្គលេខាធិការសហព័ន្ធកីឡាប៊ូល និងប៉េតង់កម្ពុជា នាការប្រកួតកីឡាប៉េតង់ជ្រើសរើសជើងឯកក្នុងព្រឹត្តិការណ៍កីឡាឆ្នេរខ្សាច់អាស៊ី (Asean Beach Games) នៅទីក្រុងដាណាងប្រទេសវៀតណាម ដែលកម្ពុជាគ្រោងនឹងបញ្ជូនកីឡាករចំនួន១៨នាក់(ស្រី៩)ចូលរួម។ ហើយក្នុងនោះក៏មានវត្តមានរបស់វីរៈកីឡាការិនី កែ ឡេង ម្ចាស់ជើងឯកមេដាយមាសពិភពលោកផងដែរ។
លោក អ៊ិន គឹមស្រ៊ុន អគ្គលេខាធិការសហព័ន្ធកីឡាប៊ូល និងប៉េតង់កម្ពុជាបានបញ្ជាក់ថា៖«ខ្ញុំគិតក្នុងចំណោមប្រទេសដែលចូលរួមទាំងអស់ក្នុងព្រឹត្តិការណ៍កីឡាឆ្នេរខ្សាច់ គឺប្រទេសថៃ ដែលជាឧបសគ្គធំសម្រាប់កម្ពុជាក្នុងគ្រងតំណែងជើងឯក ព្រោះប្រទេសនេះមានអ្នកលេងប៊ូលរហូតដល់ជិត១លាននាក់ ចំណែកកម្ពុជាមានត្រឹមតែជិត១ពាន់នាក់ប៉ុណ្ណោះ ដូច្នេះគេអាចជ្រើសរើសកីឡាករល្អៗចូលរួម។ ម្យ៉ាងទៀតគេលេងមុនយើង ហើយគេមានលុយច្រើនក្នុងការឧបត្ថម្ភដល់កីឡាករ ដើម្បីហ្វឹកហាត់»។
ទោះជាយ៉ាងនេះក្តីលោកអគ្គលេខាធិការខាងលើរំពឹងថា៖«ខ្ញុំគិតថា ទោះបីជាប្រទេសថៃវាខ្លាំងក៏ពិតមែន ប៉ុន្តែខ្ញុំរំពឹងថាកម្ពុជាយើងនឹងអាចទប់ទល់បានព្រោះកីឡាករដែលយើងបញ្ជូនទៅលើកនេះសុទ្ធសឹងជាកីឡាករដែលមានសមត្ថភាព និងជាកីឡាករដែលមានចំណាត់ថ្នាក់ខ្ពស់ក្នុងការប្រកួតតេស្តក្នុងអំឡុងពេលហ្វឹកហាត់។ ហើយខ្ញុំរំពឹងថា យ៉ាងណាស់ក៏បានលេខ២ បន្ទាប់ពីថៃ»។
ទន្ទឹមនឹងនេះ ប្រទេសវៀតណាម ដែលជាម្ចាស់ផ្ទះ និងប្រទេសឡាវ ព្រមទាំងម៉ាឡេស៊ី កម្ពុជាក៏មិនអាចមើលរំលងនោះឡើយ ព្រោះប្រទេសទាំងនេះសុទ្ធសឹងជាប្រទេសដែលមានសមត្ថភាពខ្ពស់ផងដែរ។ ដើម្បីត្រៀមខ្លួនចូលរួមប្រកួតជាលើកដំបូងក្នុងព្រឹត្តិការណ៍នេះ សហព័ន្ធប៊ូល និងប៉េតង់កម្ពុជានឹងបង្កើតឲ្យមានទីលានឆ្នេរខ្សាច់ក្នុងខែនេះ ដើម្បីឲ្យកីឡាករហ្វឹកហាត់ពង្រឹងសមត្ថភាព និងបច្ចេកមុនចូលរួមព្រឹត្តិការណ៍នេះ។
ជាមួយគ្នានេះ កីឡាការិនី ស៊ុន គន្ធា ដែលបេក្ខភាពម្នាក់ក្នុងក្រុមរបស់ទីស្តីការគណៈរដ្ឋមន្ត្រីដែលជាក្រុមយកឈ្នះលើក្រុមរបស់កីឡាការិនី កែ ឡេង ក្នុងពានរង្វាន់សម្តេច ស ខេង លើកទី១៦ និងជាកីឡាការិនីម្នាក់ដែលចូលរួមព្រឹត្តិការណ៍ Beach Games នៅវៀតណាម ក៏បានចាត់ទុកប្រទេសថៃ ជាឧបសគ្គធំសម្រាប់ការប្រកួតរបស់ខ្លួនផងដែរ។
កីឡាការិនីរូបនេះរៀបរាប់ដូច្នេះថា៖«សម្រាប់ប្រទេសដែលជាឧបសគ្គរបស់យើង នឹងតាមអ្វីដែលខ្ញុំធ្លាប់បានប្រកួតមានតែប្រទេសថៃមួយប៉ុណ្ណោះដែលយើងពិបាកយកឈ្នះ ព្រោះថៃជាប្រទេសដែលបង្កើតប៊ូលមុនយើង ហើយយើងចេះលេងប៊ូលក៏មកពីថៃ។ អញ្ចឹងប្រទេសថៃមានកីឡាករច្រើន គេល្អ គេមានធនធាន និងឧបករណ៍គ្រប់គ្រាន់ ម្យ៉ាងទៀតការហ្វឹកហាត់របស់គេក៏ទទួលបានការឧបតម្ភច្រើនជាងយើងផងដែរ»។
ព្រឹតិ្តការណ៍ការប្រកួតកីឡាឆ្នេរខ្សាច់ Beach Games នៅទីក្រុងដាណាងប្រទេសវៀតណាម នឹងមកដល់ក្នុងរយៈ២ខែខាងមុខនេះ ទោះបីរយៈពេលនេះវាខ្លីក៏ពិតមែន ប៉ុន្តែសម្រាប់កីឡារិនី ស៊ុន គន្ធា គិតថា វាគ្រប់គ្រាន់សម្រាប់ខ្លួនក្នុងការហ្វឹកហាត់ ព្រោះរូបគេមានសមត្ថភាពស្រាប់ គឹគ្រាន់តែហ្វឹកហាត់ពង្រឹងបច្ចេកទេសប៉ុណ្ណោះ។ កីឡាការិនីម្នាក់នេះនឹងធ្វើការប្រកួតលើវិញ្ញាសា៣នាក់ទល់នឹង៣នាក់នារី។
គួរបញ្ជាក់ថា សហព័ន្ធកីឡាប៊ូល និងប៉េតង់កម្ពុជានឹងបញ្ជូនកីឡាករចំនួន១៨(ស្រី៩នាក់) ឲ្យចូលរួមប្រកួតក្នុងព្រឹត្តិការណ៍កីឡាឆ្នេរខ្សាច់ (Beach Games) នៅទីក្រុងដាណាងប្រទេសវៀតណាម ដែលនឹងប្រព្រឹត្តទៅនៅចុងខែកញ្ញា ខាងមុខនេះ។ កម្ពុជាមិនធ្លាប់ចូលរួមព្រឹត្តិការណ៍នេះនាពេលកន្លងមកនោះទេ នេះជាលើកទីមួយហើយសម្រាប់ក្នុងការចូលរួមព្រឹត្តិការណ៍កីឡាឆ្នេរខ្សាច់ (Beach Games) នេះ។ ទោះបីជាយ៉ាងនេះក្តី កម្ពុជា រំពឹងថា នឹងទទួលបានលទ្ធផលល្អសម្រាប់ការចូលរួមលើកដំបូងនេះ៕
Tag:
ប៉េតង់
អ៊ិន គឹមស្រ៊ុន
ស៊ុន គន្ធា
Asian Beach Games
© រក្សាសិទ្ធិដោយ thmeythmey.com