ចំបាប់ធ្វើយុទ្ធនាការចុះពង្រឹងសមត្ថភាពកីឡាករតាមខេត្ត ដើម្បីត្រៀមប្រកួតកីឡាជាតិលើកទី១

កីឡាជាតិ

ជាតិ

ចំបាប់ធ្វើយុទ្ធនាការចុះពង្រឹងសមត្ថភាពកីឡាករតាមខេត្ត ដើម្បីត្រៀមប្រកួតកីឡាជាតិលើកទី១

28, Jun 2016 , 8:19 am

រូបភាព

ដោយ:

កាលពីថ្ងៃទី២៥-២៦ ខែមិថុនា ចុងសប្តាហ៍មុនសហព័ន្ធកីឡាចំបាប់កម្ពុជាដែលដឹកនាំដោយ លោក ធិន វិចិត្រ អគ្គលេខាធិការសហព័ន្ធបានចុះទៅបើកវគ្គបច្ចេកទេស ដើម្បីពង្រឹងសមត្ថភាព និងបច្ចេកទេសដល់កីឡករកីឡាការិនីនៅតាមក្លិប-សមាគមមួយចំនួននៅតាមបណ្តាខេត្ត សម្រាប់ត្រៀមប្រកួតកីឡាជាតិ National Games លើកទី១ ប្រចាំឆ្នាំ២០១៦។

ដើម្បីត្រៀមប្រកួតកីឡាជាតិ(National Games)លើកទី១ប្រចាំឆ្នាំ២០១៦ សហព័ន្ធកីឡាចំបាប់កម្ពុជាបានធ្វើយុទ្ធនាការចុះទៅពង្រឹងសមត្ថភាព និងបច្ចេកទេសដល់កីឡាករកីឡាការិនីតាមក្លិប-សមាគម នៅតាមបណ្តាខេត្តមួយចំនួនក្នុងព្រះរាជាណាចក្រកម្ពុជា។ ជាក់ស្តែងកាលពីថ្ងៃទី២៥-២៦ ខែមិថុនា កន្លងទៅមន្ត្រីបច្ចេកទេសរបស់សហព័ន្ធកីឡាចំបាប់កម្ពុជាដែលដឹកនាំដោយ លោក ធិន វិចិត្រ អគ្គលេខាធិការសហព័ន្ធកីឡាកម្ពុជាបានចុះទៅបើកវគ្គបច្ចេកទេសដល់សមាគមកីឡាចំបាប់រិទ្ធីសែនមានរិទ្ធ ក្នុងខេត្តកំពង់ឆ្នាំង ដែលមានកីឡាករចំនួន២០នាក់ និងកីឡាការិនី៥នាក់ចូលរួម។

ក្នុងយុទ្ធនាការនៃការចុះទៅខេត្តកំពង់ឆ្នាំងនេះកីឡាករទាំង២៥នាក់ មិនត្រឹមតែទទួលបានការសិក្សាពីបទបញ្ជា និងបច្ចេកទេសនៃការប្រកួតតាមរយៈទ្រឹស្តីប៉ុណ្ណោះទេ មិនត្រឹមតែប៉ុណ្ណោះពួកគេទទួលបានការអនុវត្តផ្ទាល់ទៅលើការលេងទាំងចំបាប់សម័យសេរី និងចំបាប់ក្រិចរ៉ូម៉ាំងទៀតផង។ កីឡាករទាំងនេះទទួលបានការបង្ហាត់បង្ហាញដោយផ្ទាល់ពីសំណាក់កីឡាករម្ចាស់មេដាយមាសស៊ីហ្គេម ឌន សៅ គ្រូជំនួយយុវជនថ្នាលក្រុមជម្រើសជាតិ រួមទាំងកីឡាករ កាង ដែនពិសិដ្ឋ គ្រូជំនួយក្រុមជម្រើសជាតិ និងកីឡាករជម្រើសជាតិ ជា យិននាង។

ការធ្វើយុទ្ធនាការចុះទៅបើកវគ្គបច្ចេកទេសតាមក្លិប-សមាគមនេះ វាមិនត្រឹមជួយផ្តល់នូវវគ្គសិក្សាលើបទបញ្ជា និងបច្ចេសទេសនៃការប្រកួតនោះទេ វាជាការរឹតចំណងមិត្តភាពមួយដ៏ល្អរវាងក្លិប-សមាគមនៅតាមបណ្តាខេត្ត ជាមួយនឹងសហព័ន្ធកីឡាចំបាប់កម្ពុជាថែមទៀតផង។ ម្យ៉ាងទៀតវាជួយពង្រឹងសមត្ថភាពរបស់កីឡាករកីឡាការិនីនៅតាមបណ្តាខេត្តឲ្យមានការរីកចម្រើន ជាពិសេសធ្វើប្រជាពលរដ្ឋនៅតាមបណ្តាខេត្តស្គាល់កីឡាចំបាប់ខ្មែរកាន់តែច្បាស់។

លោក ធិន វិចិត្រ បានបញ្ជាក់ដូច្នេះថា៖ «ការចុះទៅបើកវគ្គបច្ចេកទេសនេះ វាជារឿងដ៏ល្អ ព្រោះយើងបានចែករំលែកបទពិសោធ និងការបង្ហាត់បង្ហាញពីបទបញ្ជាច្បាប់ល្បែងកីឡាដល់ពួកគេ ហើយយើងក៏បានរឹតចំណងមិត្តភាពជាមួយសមាគម-ក្លិបនៅតាមខេត្តផងដែរ ព្រោះកន្លងមកសហព័ន្ធ និងសមាគម-ក្លិប នៅតាមខេត្តហាក់នៅឆ្ងាយពីគ្នា។ ហើយតាមរយៈការចុះទៅដោយផ្ទាល់នេះ យើងមើលឃើញថា អត្តពលិកនៅតាមខេត្តមានការយល់ដឹងច្រើន និងត្រៀមខ្លួនបានច្រើន សម្រាប់ការប្រកួតកីឡាជាតិលើកទី ១ នាពេលខាងមុខនេះ»។

ក្រោយពីបញ្ចប់ការចុះទៅបើកវគ្គបច្ចេកទេសនៅសមាគមកីឡាចំបាប់រិទ្ធីសែនមានរិទ្ធនៅក្នុងខេត្តកំពង់ឆ្នាំនេះ សសហព័ន្ធកីឡាចំបាប់កម្ពុជានឹងចុះទៅបើកវគ្គបណ្តុះបណ្តាលបច្ចេកទេសតាមក្លិប-សមាគម ក្នុងខេត្តមួយចំនួនទៀតដូចជា សមាគមកីឡាចំបាប់យាយព្រីងមានរិទ្ធខេត្តកំពង់ឆ្នាំង, សមាគមកីឡាចំបាប់ឃ្លាំងមឿង ខេត្តពោធិ៍សាត់, សមាគមកីឡាចំបាប់វិហារសួគ៌ ខេត្តកណ្តាល និងសមាគមកីឡាចំបាប់ព្រៃវែងក្នុងខេត្តព្រៃវែង។ ការចុះនេះនឹងធ្វើឡើងរៀងរាល់ថ្ងៃចុងសប្តាហ៍។

ក្រោយបញ្ចប់យុទ្ធនាការចុះបើកវគ្គបច្ចេកទេសពង្រឹងតាមខេត្តសហព័ន្ធកីឡាចំបាប់កម្ពុជា ដែលទទួលបានការឧបត្ថម្ភពី លោក Casey Barneth អនុប្រធានសហព័ន្ធកីឡាចំបាប់កម្ពុជា នឹងសហការជាមួយមន្ទីរអប់រំកាយ និងកីឡាខេត្ត រៀបចំការប្រកួតកីឡាចំបាប់ជ្រើសរើសជើងឯកថ្នាក់ខេត្ត ដើម្បីចម្រាញ់យកកីឡាករលេខ១តាមប្រភេទទម្ងន់នីមួយៗសម្រាប់ចូលរួមប្រកួតកីឡាជាតិលើកទី១នេះ។

លោក ធិន វិចិត្រ បានរៀបរាប់ថា៖ «លោក Casey Barneth នឹងផ្តល់ការឧបត្ថម្ភបន្ថែម ក្រោយពីបញ្ចប់ការបើកវគ្គបច្ចេកទេសកីឡាចំបាប់ដល់សមាគមកីឡាចំបាប់ទាំង ៥ នៅតាមបណ្តាខេត្ត ដោយយើងនឹងសហការជាមួយមន្ទីរអយកនិងកីឡាខេត្ត រៀបចំការប្រកួតចំបាប់ជើងឯកថ្នាក់ខេត្ត ដើម្បីជ្រើសរើសយកអ្នកទទួលចំណាត់ថ្នាក់លេខ១នៃប្រភេទទម្ងន់នីមួយៗ មករៀបចំបែបបទនៃការប្រកួតឲ្យពួកគេឡើងមកប្រកួតកីឡាជាតិ»។

គួរបញ្ជាក់ថា ការធ្វើយុទ្ធនាការបើកវគ្គបច្ចេកទេសរបស់សហព័ន្ធកីឡាចំបាប់កម្ពុជានៅតាមបណ្តាខេត្តនេះដោយទទួលបានការឧបត្ថម្ភពីបុរសជនជាតិអាមេរិកកាំង Casey Barnett អនុប្រធានសហព័ន្ធកីឡាចំបាប់កម្ពុជា និងជានាយកវិទ្យាស្ថាន CaEd Business School។ មុនការចុះទៅបើកវគ្គនៅតាមខេត្តនេះ លោក Casey Barnett បានឧបត្ថម្ភជាកម្រាលសម្រាប់ហ្វឹកហាត់ដល់សមាគមទាំងនេះម្នាក់៥២សន្លឹងរួចមកហើយ(សរុប៤,៨០០ដុល្លារ)។ ការឧបត្ថម្ភនេះដោយសារ លោក គិតថា ខេត្តជាប្រភពធនធានកីឡាករចំបាប់ដ៏សំខាន់សម្រាប់សហព័ន្ធ៕