ថ្ងៃស្អែក ព្រឹទ្ធសភា បើកកិច្ចប្រជុំវិសាមញ្ញ ដើម្បីប្រកាសសុពលភាពសមាជិកថ្មី

ជាតិ

ថ្ងៃស្អែក ព្រឹទ្ធសភា បើកកិច្ចប្រជុំវិសាមញ្ញ ដើម្បីប្រកាសសុពលភាពសមាជិកថ្មី

28, Jun 2016 , 8:39 pm

រូបភាព

ដោយ: ម៉ៅ សុផា

ភ្នំពេញ៖ ព្រឹទ្ធសភា នឹងបើកកិច្ចប្រជុំវិសាមញ្ញ នីតិកាលទី៣ នៅថ្ងៃទី២៩ ខែមិថុនា ឆ្នាំ២០១៦។ សមាជិកព្រឹទ្ធសភាថ្មី១រូប នឹងត្រូវប្រកាសក្នុងកិច្ចប្រជុំនោះ ហើយសេចក្តីព្រាងច្បាប់មួយចំនួនទៀត ក៏នឹងត្រូវលើកទៅពិភាក្សាផងដែរ។

ការបើកកិច្ចប្រជុំវិសាមញ្ញនេះ គឺដើម្បីប្រកាសវត្តមានរបស់លោក ខៀវ មុត អតីតរដ្ឋលេខាធិការនៃក្រសួងបរិស្ថាន ដែលទើបតែជាប់ឆ្នោតជាសមាជិកថ្មីនៃស្ថាប័នព្រឹទ្ធសភា។ នេះបើតាមសេចក្តីជូនដំណឹងពីអគ្គលេខាធិការដ្ឋានព្រឹទ្ធសភា។

លោក ខៀវ មុត ដែលជាអតីតរដ្ឋលេខាធិការនៃក្រសួងបរិស្ថាន ត្រូវបានរដ្ឋសភាជ្រើសតាំងជាសមាជិកព្រឹទ្ធសភា សម្រាប់នីតិកាលទី៣។ ការជ្រើសតាំងនេះ ធ្វើឡើងក្នុងកិច្ចប្រជុំពេញអង្គនៃរដ្ឋសភា លើកទី៦ នីតិកាលទី៥ កាលពីថ្ងៃទី៣០ ខែឧសភា ឆ្នាំ២០១៦។

រដ្ឋសភា ជ្រើសតាំងលោក ខៀវ មុត ជាសមាជិកព្រឹទ្ធសភាថ្មី គឺដើម្បីជំនួសសម្តេចបុត្រីព្រះរាម នរោត្តម បុប្ផាទេវី ដែលបានសុំលាលែងពីតំណែង។ បន្ទាប់ពីលាលែងពីសមាជិកព្រឹទ្ធសភា សម្តេចព្រះរាជបុត្រីព្រះរាម នរោត្តម បុប្ផាទេវី ត្រូវបានព្រះមហាក្សត្រ តែងតាំងជាសមាជិកក្រុមប្រឹក្សាធម្មនុញ្ញ សម្រាប់អាណត្តិទី៧។

ក្រៅពីការប្រកាសទទួលលោក ខៀវ មុត ជាសមាជិកព្រឹទ្ធសភា របៀបវារៈចំនួន៣ទៀត នឹងត្រូវលើកទៅពិភាក្សាផងដែរ។ របៀបវារៈទាំងនោះគឺ ១. ពិនិត្យនិងឲ្យយោបល់លើសេចក្តីព្រាងច្បាប់ស្តីពី យុត្តិធម៌អនីតិជន, ២. ពិនិត្យនិងឲ្យយោបល់លើសេចក្តីព្រាងច្បាប់ស្តីពី ការអនុម័តយល់ព្រមលើកិច្ចព្រមព្រៀងរវាងរាជរដ្ឋាភិបាលកម្ពុជានិងរាជរដ្ឋាភិបាលហុងគ្រីស្តីពីការការពារទៅវិញទៅមកនៃការវិនិយោគ, ៣.ការបោះឆ្នោតជ្រើសរើសបំពេញសមាជិកគណៈកម្មាធិការទី១ ទី៤ និង៧ នៃព្រឹទ្ធសភា៕