ជាតិ
នយោបាយជាតិ
ស្នាមមេដៃ១៧ម៉ឺនរបស់ CNRP ត្រូវបានត្រួតពិនិត្យរួចរាល់ហើយ លោក កង សុខុន
× ភ្នំពេញ៖ ក្រុមការងារស្រាវជ្រាវស្នាមមេដៃរបស់ក្រុមអ្នកគាំទ្រគណបក្សសង្គ្រោះជាតិ១៧ម៉ឺននាក់ នៅលើញត្តិដែលថ្វាយដល់ព្រះមហាក្សត្រ បានបញ្ចប់បេសកកម្មត្រួតពិនិត្យរួចរាល់ហើយ នាថ្ងៃទី៣០ ខែមិថុនា នេះ។ ក្រុមស្រាវជ្រាវរបស់រដ្ឋាភិបាល អះអាងថា មានភាពមិនប្រក្រតីច្រើនលើស្នាមមេដៃទាំងនោះ។
អនុប្រធានគណៈកម្មការស្រាវជ្រាវ និងធ្វើកោសល្យវិច័យលើស្នាមមេដៃប្រជាពលរដ្ឋនៅលើញត្តិ CNRP លោក កង សុខន បានប្រាប់សារព័ត៌មានថ្មីៗថា ក្រុមការងាររបស់លោកពិនិត្យឃើញថា ក្នុងចំណោមទាំង១៧ម៉ឺន ស្នាមមេដៃជាច្រើន មានឈ្មោះស្ទួនគ្នា ខ្លះចំណាកស្រុកអវត្តមានក្នុងប្រទេស និងខ្លះបាត់បង់ជីវិត។ បើទោះបីជាបញ្ចប់ការត្រួតពិនិត្យលើស្នាមមេដៃទាំងនោះក៏ដោយ លោក កង សុខន ពុំបានបង្ហាញលទ្ធផលកោសល្យវិច្ច័យលម្អិតឡើយ នាថ្ងៃទី៣០ ខែមិថុនានេះ ។
នាយឧត្តមសេនីយ៍អគ្គស្នងការរងនគរបាលជាតិរូបនេះ អះអាងតាមរយៈការត្រួតពិនិត្យដែលបានចាប់ផ្តើមបើកកញ្ចប់ញត្តិកាលពីថ្ងៃទី៦ ខែមិថុនា កន្លងទៅយ៉ាងដូច្នេះថា៖«យើងពិនិត្យឃើញមានបញ្ហាលើស្នាមមដៃទាំង ១៧ម៉ឺនជាច្រើន។ វាមានខ្លឹមសារញត្តិដូចៗគ្នា ហើយស្នាមមេដៃបោះពុម្ពជាស្រេច គឺមិនមែនជាខ្លឹមសារពលរដ្ឋតាក់តែងសរសេរដោយដៃគាត់ផ្ញើមកទេ។ អ្នកបច្ចេកទេសយើងពិនិត្យឃើញទៀតថា ស្នាមមេដៃខ្លះស្ទួន ខ្លះស្នាមមេដៃមនុស្សស្លាប់ និងខ្លះអ្នកផ្តិតបានដៃបានចំណាកស្រុកធ្វើការក្រៅប្រទេស»។
តែយ៉ាងណា អនុប្រធានក្រុមការងារស្រាវជ្រាវញត្តិស្នាមមេដៃអ្នកគាំទ្រដឹកនាំដោយលោក នេត សាវឿន អគ្គស្នងការនគរបាលជាតិ ពុំអាចបញ្ជាក់ពីចំនួនស្នាមដៃខុសប្រក្រតីនោះទេ ដោយលោកមានហេតុផលថា វាជារឿងរបស់អ្នកបច្ចេកទេសពិនិត្យស្នាមមេដៃ។
បើតាមលោក កង សុខន ក្រុមការងារបានសរុបរបាយការណ៍ត្រួតពិនិត្យស្នាមមេដៃអ្នកគាំទ្រ CNRP រួចហើយ ក្រោយការចុះត្រួតពិនិត្យជាងមួយខែ កន្លងទៅ។ លោកថា ក្រុមការងារនេះនឹងរាយការណ៍ជូនក្រសួងមហាផ្ទៃ និងរដ្ឋាភិបាល ដើម្បីពិនិត្យ និងសម្រេចបន្តទៀត។
ពាក់ព័ន្ធនឹងបញ្ហានេះ កន្លងមក គណបក្សសង្គ្រោះជាតិពុំជឿជាក់លើការត្រួតពិនិត្យជាឯកតោភាគីដែលថា ស្នាមមេដៃអ្នកគាំទ្រ ដែលខ្លួនបានថ្វាយព្រះមហាក្សត្រ ជាស្នាមមេដៃក្លែងក្លាយឡើយ។ មន្ត្រីជាន់ខ្ពស់គណបក្សសង្គ្រោះជាតិ អ៊ូ ច័ន្ទឫទ្ធិ អះអាងថា ការដាក់ញត្តិ ដោយមានស្នាមមេដៃប្រជាពលរដ្ឋជាង១៧ម៉ឺននាក់ ថ្វាយព្រះមហាក្សត្រ គឺជាស្នាមមេដៃពិតប្រាកដ។ ប្រសិនជាមានការបង្កើតក្រុមអ្នកត្រួតពិនិត្យលើស្នាមមេដៃនេះ លោកស្នើឲ្យមានការចូលរួមផ្ទៀងផ្ទាត់ពីប្រជាពលរដ្ឋទាំងអស់គ្នាផង ដោយគណបក្សលោកនឹងឲ្យអ្នកគាំទ្រគណបក្សខ្លួនចំនួន១៧ម៉ឺននាក់ ដែលបានផ្តិតមេដៃនោះទៅបង្ហាញនៅមុខព្រះបរមរាជវាំង ដើម្បីបញ្ជាក់ពីភាពស្អាតស្អំរបស់គណបក្ស។
យ៉ាងណា លោក កង សុខន ឆ្លើយតបនឹងសំណើ CNRP ថា សមត្ថកិច្ចរង់ចាំតែបញ្ជាប្រតិបត្តិការងារពីថ្នាក់លើតែប៉ុណ្ណោះ៕
Tag:
សង្គ្រោះជាតិ
ញត្តិ
មហាផ្ទៃ
© រក្សាសិទ្ធិដោយ thmeythmey.com