ពីនេះ ពីនោះ
ពាក្យ «គូថ»មានន័យថាលាមក ចុះពាក្យ «គូទ» មានន័យដូចឬក៏ខុស?
× ពាក្យ«គូថ» និងពាក្យ«គូទ» សាធារណជនភាគច្រើនស្គាល និងយល់ពីអត្ថន័យយ៉ាងច្បាស់ ប៉ុន្តែពេលខ្លះអាចមានការភ័ន្តច្រឡំ។ នៅក្នុងវចនានុក្រមខ្មែរ របស់សម្ដេចព្រះសង្ឃរាជ ជួន ណាត បានកំណត់អត្ថន័យនៃពាក្យ «គូថ និង គូទ »ដូចខាងក្រោម ៖
ពាក្យ«គូថ» មានថ្នាក់ពាក្យជា(ន.) (បា.)(សំ) មានន័យថា អាចម ឬអាចម៍ , ឧច្ចារៈ, លាមក។ ឧទាហរណ៍ អង្គុយបន្ទោគូថក្នុងបង្គន់។ មានន័យអង្គុយបន្ទោសលាមក នៅក្នុងបង្គន់។ ពាក្យនេះអាចសរសេរថា គូធ ក៏បាន។ ចំណែក ពាក្យថា«គូទ»មានថ្នាក់ពាក្យជា(ន.) (បា.)(សំ) មានន័យថា អវយវៈត្រង់ចំណែកកាយខាងក្រោយ ជិតវច្ចទ្វារ។ ប៉ែកអវយវៈនេះ បុរាណពីដើមហៅថា តពោក ឬត្រពោក សូម្បីសព្វថ្ងៃនេះអ្នកបាត់ដំបង អ្នកសៀមរាបជាដើម ក៏នៅប្រើពាក្យនេះដែរ។ ឧទាហរណ៍ ដាក់គូទអង្គុយ , ដាក់តពោកអង្គុយ។
សព្វថ្ងៃ ការប្រើប្រាស់ពាក្យទាំងពីនេះនៅក្នុងការសរសេរ គេតែងប្រើដោយច្រឡំសរសេរ «គូថ» សម្គាល់ថា ជាអវយវៈ ខាងក្រោយជិតវច្ចទ្វារ ទៅវិញ។ ប៉ុន្តែពាក្យដែលត្រឹមត្រូវគឺពាក្យ «គូទ» ហេតុនេះ គួរសរសេរ «គូទ»នេះវិញទើបត្រឹមត្រូវ។
ដកស្រង់ពីវចនានុក្រមខ្មែរ សម្តេចព្រះសង្ឃរាជ ជួន ណាត (Version 2.0)]
© រក្សាសិទ្ធិដោយ thmeythmey.com