ជាតិ
ក្រសួងដែនដី ណែនាំ៣ចំណុចក្នុងការប្រើប្រាស់ម៉ាស៊ីនស្ទូចនៅការដ្ឋានសំណង់ លោក ជា សុផារ៉ា រដ្ឋមន្ត្រីក្រសួងដែនដី
× ក្រសួងដែនដី នគរូបនីយកម្ម និងសំណង់ បានចេញការណែនាំចំនួន៣ចំណុច ស្តីពីការប្រើប្រាស់ម៉ាស៊ីនស្ទូច នៅការដ្ឋានសំណង់ ដើម្បីថែរក្សាសណ្តាប់ធ្នាប់ ការពារសុវត្ថិភាពសាធារណៈ និងទប់ស្កាត់គ្រោះថ្នាក់នានាដែលអាចកើតមានឡើង។
ផ្នែកតាមសេចក្តីជូនដំណឹង របស់ក្រសួងនៅថ្ងៃទី៤ ខែកក្កដា ស្តីពីការរក្សាសណ្តាប់ធ្នាប់ និងសុវត្ថិភាពសាធារណៈ ក្នុងការប្រើប្រាស់ម៉ាស៊ីនស្ទូច ក្រសួង ហាមដាច់ខាត នូវការប្រើប្រាស់ម៉ាស៊ីនស្ទូច ឬឧបករណ៍លើកដាក់ដទៃទៀត ដែលគង ឬគ្របលើផ្លូវសាធារណៈ។
ក្នុងករណីទីតាំងការដ្ឋានសំណង់តូចចង្អៀត រាល់ការប្រើប្រាស់ម៉ាស៊ីន ឬឧបករណ៍លើកដាក់ដទៃទៀត ដែលអាចប៉ះពាល់ដល់ផ្លូវសាធារណៈ ត្រូវអនុវត្តតាមការណែនាំរបស់សាលារាជធានី ខេត្ត ដែលការដ្ឋាននោះស្ថិតនៅ ដូចជាការដាក់ស្លាកសញ្ញា ភ្លើងសញ្ញា ការកំណត់ពេលម៉ោងប្រតិបត្តិការ និងការចាត់ចែងធ្វើចរាចរណ៍សាធារណៈ នៅពេលប្រតិបត្តិការលើកស្ទូចជាដើម។ នេះជាចំណុចទី២ ដែលមាននៅក្នុងសេចក្តីជូនដំណឹងដដែល ដែលចំណុចទី៣ បានបញ្ជាក់ថា អ្នកប្រើប្រាស់ម៉ាស៊ីនស្ទូច ឬឧបករណ៍លើកដាក់ដទៃទៀត ក្នុងការដ្ឋានសំណង់ ត្រូវគោរពតាមបទដ្ឋានបច្ចេកទេស និងបទប្បញ្ញតិ្តជាធរមាន។
ជាមួយគ្នានោះ ក្រសួងរៀបចំដែនដីនគរូបនីយកម្ម និងសំណង់ ក៏សង្ឃឹមថា ម្ចាស់សំណង់ ប្រធានក្រុមហ៊ុនទទួលម៉ៅការសាងសង់ និងអ្នកទទួលខុសត្រូវតាមការដ្ឋានសំណង់ទាំងអស់ នឹងចូលរួមសហការអនុវត្តន៍តាមសេចក្តីជូនដំណឹងនេះ ប្រកបដោយស្មារតីទទួលខុសត្រូវខ្ពស់ ដើម្បីរក្សាសណ្តាប់ធ្នាប់ និងសុវត្ថិភាពសាធារណៈ និងចៀសវាងករណីគ្រោះថ្នាក់នានា ដែលអាចកើតឡើង៕
Tag:
ម៉ាស៊ីនស្ទូច
ការដ្ឋានសំណង់
ក្រសួងដែនដី
© រក្សាសិទ្ធិដោយ thmeythmey.com