ជាតិ
សង្គមជាតិ
ក្រសួងធនធានទឹក ឲ្យកសិករប្រញាប់ប្រមូលផល ព្រោះទឹកទន្លេមេគង្គបន្តហក់ឡើង
×
ក្រសួងធនធានទឹក និងឧតុនិយម ប្រកាសថា ស្ថានភាពនៃទឹកទន្លេមេគង្គនឹងបន្តហក់ឡើងខ្ពស់នៅក្នុងរយៈពេល ៤ ទៅ ៥ ថ្ងៃ ខាងមុខនេះ។ ក្រសួង បានអំពាវនាវឲ្យប្រជាកសិករទាំងអស់រួសរាន់ប្រមូលផលឲ្យបានទាន់ពេលវេលា ដើម្បីកុំឲ្យដំណាំកសិកម្មខូចខាត។
ស្ថានភាពទឹកជំនន់ទន្លេមេគង្គ ដែលក្រសួងធនធានទឹក និងឧតុនិយម ព្យាករថា នឹងបន្តហក់ឡើង ក្នុងរយៈពេល ៤ ទៅ ៥ ថ្ងៃខាងមុខ នៅតាមស្ថានីយជលសាស្ត្រនានា រួមមាន នៅខេត្តស្ទឹងត្រែង ទឹកជំនន់អាចហក់ឡើងដល់ ៨, ៥០ ម៉ែត្រ តែទាបជាងកម្រិតទឹកដែលត្រូវប្រុងប្រយ័ត្ន ២, ២០ ម៉ែត្រេ។ នៅខេត្តក្រចេះ ទឹកអាចឡើងដល់ ១៦, ០០ ទាបជាងកម្រិតប្រុងប្រយ័ត្ន ៦, ០០ ម៉ែត្រ។ នៅខេត្តកំពង់ចាម ទឹកអាចឡើងដល់ ៩,០០ ម៉ែត្រ ទាបជាងកម្រិតប្រុងប្រយ័ត្ន ៦, ២០ ម៉ែត្រ។ នៅទន្លេបាសាក់-ចតុមុខ ទឹកអាចឡើងដល់ ៦, ០០ ម៉ែត្រ ទាបជាងកម្រិត ដែលត្រូវប្រុងប្រយ័ត្ន ៤, ៥០ ម៉ែត្រ។
បើទោះបីជាកម្ពស់ទឹកទន្លេហក់ឡើង ទាបជាងកម្រិតដែលត្រូវប្រុងប្រយ័ត្នក្តី ក៏ក្រសួងធនធានទឹក និងឧតុនិយម បញ្ជាក់ថា ក្នុងរយៈពេលនៃការហក់ឡើងនេះ ទឹកទន្លេអាចនឹងហូរចូលតាមព្រែក និងធ្វើឲ្យលិចតំបន់ទំនាបនានា ដែលអាចធ្វើឲ្យប៉ះពាល់ដល់ដំណាំកសិកម្មរបស់កសិករ។ ជាងនេះទៅទៀត ក្រសួងក៏អំពាវនាវឲ្យប្រជាកសិករ ប្រមូលផលឲ្យបានរួសរាន់ មុនទន្លេហូរលិចលង់ផងដែរ៕
© រក្សាសិទ្ធិដោយ thmeythmey.com