រឿងស្រីមុំ៖ រដ្ឋសភា កំពុងពិនិត្យសំណើដកអភ័យឯកសិទ្ធិតំណាងរាស្ត្របក្សប្រឆាំង២រូប

ជាតិ

រឿងស្រីមុំ៖ រដ្ឋសភា កំពុងពិនិត្យសំណើដកអភ័យឯកសិទ្ធិតំណាងរាស្ត្របក្សប្រឆាំង២រូប

06, Jul 2016 , 9:19 pm

រូបភាព

ដោយ: ម៉ៅ សុផា

ភ្នំពេញ៖ បើទោះបីជារដ្ឋសភាឈប់សម្រាកក៏ដោយ តែគណៈកម្មាធិការអចិន្ត្រៃយ៍ នៅតែសិក្សានិងពិនិត្យលើការព្យួរអភ័យឯកសិទ្ធិរបស់តំណាងរាស្ត្រគណបក្សសង្គ្រោះជាតិ២រូប គឺ លោក ពិន រតនា និងលោក តុ វ៉ាន់ចាន់។ សំណុំរឿងរបស់តំណាងរាស្ត្រទាំង២រូបនេះ ជាប់ពាក់ព័ន្ធនឹងរឿងរ៉ាវរបស់កញ្ញា ខុម ចាន់តារ៉ាទី ហៅស្រីមុំ ជាមួយនឹងឯកឧត្តម កឹម សុខា។

លោក ឡេង ប៉េងឡុង អ្នកនាំពាក្យនិងជាអគ្គលេខាធិការរដ្ឋសភា មិនអាចវាយតម្លៃទុកមុនថា គណៈកម្មាការអចិន្ត្រៃយ៍នៃរដ្ឋសភា នឹងសម្រេចដកអភ័យឯកសិទ្ធរបស់តំណាងរាស្ត្របក្សប្រឆាំងទាំង២រូប ឬយ៉ាងណានោះទេ។ ប៉ុន្តែ លោក ឡេង ប៉េងឡុង បានបញ្ជាក់ថា គណៈកម្មាធិការអចិន្ត្រៃយ៍រដ្ឋសភា មានសិទ្ធិសម្រេចនូវរាល់កិច្ចការនានា ក្នុងអំឡុងពេលដែលតំណាងរាស្ត្រទាំងអស់ ឈប់សម្រាក។

យ៉ាងណាក៏ដោយ អ្នកនាំពាក្យរបស់រដ្ឋសភារូបនេះ បានសង្កត់ធ្ងន់ថា គណៈកម្មាធិការអចិន្ត្រៃយ៍រដ្ឋសភា មិនអាចធ្វើអ្វីឲ្យហួសពីព្រំដែននៃច្បាប់និងរដ្ឋធម្មនុញ្ញឡើយ។ លោកបានប្រាប់សារព័ត៌មានថ្មីៗដូច្នេះថា៖«ឥឡូវនេះ ខ្ញុំមិនទាន់ហ៊ានបកស្រាយថារដ្ឋសភានឹងសម្រេចយ៉ាងម៉េចទេ។ តែរដ្ឋសភា ត្រូវតែអ្វីៗទៅតាមច្បាប់»។

សារព័ត៌មានថ្មីៗ មិនអាចសុំអត្ថាធិប្បាយពីតំណាងរាស្ត្រទាំង២រូបឡើយ ដោយសារតែហៅទូរសព្ទមិនចូល។

គួររម្លឹកថា ការចាប់ផ្តើមពិចារណាក្នុងការលើកអភ័យឯកសិទ្ធិនេះ ធ្វើឡើងតាមសំណើរបស់លោក អង្គ វង្សវឌ្ឍនា រដ្ឋមន្ត្រីក្រសួងយុត្តិធម៌ ដែលបានដាក់លិខិតជូនសម្តេច ហេង សំរិន ប្រធានរដ្ឋសភា កាលពីថ្ងៃទី ៣០ ខែមិថុនា ឆ្នាំ២០១៦។ ការសុំឲ្យរដ្ឋសភាលើកអភ័យឯកសិទ្ធិ គឺដើម្បីបើកដៃឲ្យតុលាការបន្តនីតិវិធីលើតំណាងរាស្ត្រទាំង២រូបនេះ ដែលជាប់សង្ស័យនឹងអំពើសញ្ចារកម្ម។

សូមបញ្ជាក់ថា លោក តុ វ៉ាន់ចាន់ និងលោក ពិន រតនា ត្រូវបានតុលាការចេញដីកាកោះចំនួន២លើកមកហើយ ដើម្បីឲ្យចូលបំភ្លឺជុំវិញអំពើសញ្ចារកម្ម ដែលពាក់ព័ន្ធនឹង កញ្ញា ខុម ចាន់តារ៉ាទី ហៅស្រីមុំ។ ប៉ុន្តែលោក តុ វ៉ាន់ចាន់ និងលោក ពិន រតនា បានបដិសេធមិនបង្ហាញខ្លួនទាំង២លើក ដោយសំអាងលើអភ័យសិទ្ធិរបស់ខ្លួនក្នុងនាមជាតំណាងរាស្ត្រ។

មាត្រា ៩ នៃច្បាប់លក្ខន្តិកៈតំណាងរាស្ត្រ បានចែងថា ការលើកអភ័យឯកសិទ្ធិរបស់សមាជិកភាណាម្នាក់ ត្រូវមានការអនុម័តតាមមតិភាគច្រើនពីរភាគបីនៃចំនួនសមាជិករដ្ឋសភាទាំងមូល។ ការអនុម័តដោយសមាជិករដ្ឋសភា ២ ភាគ ៣ គឺស្មើនឹងសមាជិកសភា ៨៣ រូបគាំទ្រ ឬអនុម័តឡើងទៅ ទើបអាចលើកអភ័យឯកសិទ្ធិតំណាងរាស្ត្រណាមួយបាន៕