ពីនេះ ពីនោះ
ជាតិមានសម្បត្តិ ត្រូវគ្រប់គ្រង ប្រើប្រាស់ឲ្យមានប្រយោជន៍ និងសមធម៌ចំពោះរាស្ត្រ
× ភ្នំពេញ៖ ប្រទេសមានប្រជាជនតិច មិនមែនជាបញ្ហា តែបញ្ហាប្រទេសមានអ្នកចេះដឹងតិច តែមិនត្រូវបានគេលើកតម្កើង នឹងប្រើប្រាស់ដើម្បីប្រយោជន៍ជាតិ។ ប្រទេសជាតិមានសម្បត្តិធម្មជាតិមិនបានប្រើប្រាស់ដើម្បីចំណូលជាតិគឺជារឿងគួរឲ្យស្ដាយ ប៉ុន្តែមិនគួរឲ្យស្ដាយ ដូចនៅពេលដែលសម្បត្តិទាំងនោះ បានប្រើប្រាស់សម្រាប់តែមនុស្សមួយក្រុម ហើយរាស្ត្រម្ចាស់ប្រទេសនៅតែមិនបានទទួលផលលាភដដែល។
មាតុភូមិកម្ពុជា ជាប្រទេសមួយដែលតូច ប៉ុន្តែក៏ជាប្រទេសមួយដែលមានសម្បត្តិ ភោគផលធម្មជាតិ ស្ថានតំបន់អំណោយទាន គ្រប់បែបយ៉ាងមិនចាញ់ប្រទេសទាំងឡាយនៅលើ សកលលោក។ ក្នុងនោះកម្ពុជា មានឆ្នេរខ្សាច់ សមុទ្រ ទន្លេបឹងបួរ ព្រៃភ្នំក្រមថ្ម រ៉ែ ប្រាង្គប្រាសាទ ដីកសិកម្ម ដែលពលរដ្ឋកម្ពុជាអាចប្រើប្រាស់សម្រាប់សម្រួលដល់វិស័យសេដ្ឋកិច្ចគ្រួសារ សេដ្ឋកិច្ចជាតិបានយ៉ាងស្រួល ហើយនាំឲ្យជីវភាពប្រជាជនរស់នៅយ៉ាងស្រួល ។
កុំថាឡើយសម្បត្តិធម្មជាតិ កម្ពុជាក៏មានសម្បត្តិ វប្បធម៌ អរិយធម៌ ដ៏យូរលង់ ដែលដូនតា ខិតខំកសាង ថែរក្សា ទុកឲ្យកូនចៅជំនាន់ក្រោយ បន្តបន្ទាប់មកដល់សព្វថ្ងៃ និងទៅអនាគត ដែលកូខ្មែរត្រូវមានការចូលរួមការពារ អភិរក្ស អភិវឌ្ឍ ជាតិមាតុភូមិរបស់ខ្លួន និងប្រើប្រាស់ស្នាដៃទាំងនេះជាប្រយោជន៍សម្រាប់ជាតិមាតុភូមិតាមការគួរ។
បន្ថែមពីលើសម្បត្តិទាំងឡាយនេះ កម្ពុជានៅមាន ច្រកចេញចូលតាមផ្លូវទឹក ផ្លូវអាកាស ផ្លូវដែក ផ្លូវគោក សម្រាប់ជាមធ្យោបាយដ៏សំខាន់ក្នុងការធ្វើដំណើរ ទំនាក់ទំនងផ្លូវសេដ្ឋកិច្ច និងផ្លូវសង្គមទាំងក្នុងរង្វង់ជាតិ និងអន្តរជាតិ។ កត្តានេះយុវជន ប្រជាពលរដ្ឋ អ្នកសិក្សា ថ្នាក់ដឹកនាំ មន្ត្រីរាជាការ ឈ្មួញ អាចមានឱកាសអាចធ្វើឲ្យចរន្តសេដ្ឋកិច្ចជាតិមានដំណើការកាន់តែប្រសើរ។
ប៉ុន្តែ ពលរដ្ឋខ្មែរ ត្រូវតែធានាផងដែរថា ខ្លួនប្រើប្រាស់សម្បត្តិទាំងនោះប្រកបដោយសមធម៌ និងធានាឲ្យបានភាពសមហេតុផល ដែលពលរដ្ឋទទួលបានផលលាភក្នុងនាមជាម្ចាស់ប្រទេស។ ក្នុងនោះដែរមិនអាច ឲ្យម្ចាស់ប្រទេសជាច្រើនដេកអត់ ខណៈដែលជនមួយក្រុមកំពុងសប្បាយជាមួយធនធានទាំងនោះឡើយ។
ស្របពេលជាមួយគ្នានេះ ប្រជាពលរដ្ឋខ្មែរគ្រប់រូប ត្រូវតែទទួលបានការអប់រំបណ្តុះបណ្តាល ដើម្បីបណ្ដុះសីលធម៌ និងគុណធម៌ ទាំងចំណេះ ជំនាញវិទ្យាសាស្ត្រពិត ទាំងការអប់រំឲ្យមានការយល់ដឹងពីការគោរពច្បាប់ ផ្តល់នូវសុខសន្តិភាព សុភមង្គល សុខដុមរមនាក្នុងការរស់នៅ សម្រាប់មនុស្សជាតិ។ ក្នុងគោលបំណងមួយពិតប្រាកដច្បាស់លាស់ ធានាឲ្យបានថាជាពលរដ្ឋថ្លៃថ្នូរ ដែលជាកម្លាំងចលករមួយយ៉ាងសំខាន់ ក្នុងការអភិវឌ្ឍន៍ប្រទេសជាតិ អភិរក្ស និងអភិវឌ្ឍ ធនធានធម្មជាតិ សម្បត្តិវប្បធម៌ប្រពៃណីដ៏បវររបស់ជាតិ៕
© រក្សាសិទ្ធិដោយ thmeythmey.com