អន្តរជាតិ
មហាយក្សចិនបង្អួតយន្តហោះយោធាធំបំផុតលើពិភពលោក
× យន្តហោះដឹកជញ្ជូនយោធារបស់ចិន (Y-20) ដែលធំបំផុតលើពិភពលោកនោះចាប់ផ្តើមចូលបម្រើក្នុងវិស័យកងទ័ពជាផ្លូវការហើយ។ វាមានប្រវែង ៤៧ម៉ែត្រ និងអាចដឹកសម្ភារៈមានទម្ងន់៦៦តោន ហើយវាមានសមត្ថភាពខ្ពស់ក្នុងការដឹកជញ្ជូនសម្ភារៈ ជាមជ្ឈមណ្ឌលបញ្ជានិងភ្ជាប់ទំនាក់ទំនងរវាងយន្តហោះផ្សេងទៀតពេលប្រយុទ្ធ និងជាយន្តហោះសម្រាប់ចាក់សាំងលើអាកាស ។
«ស្ត្រីមុខប៉ោង» ឬ «Kungpeng » ជារហស្សនាមផ្លូវការសម្រាប់សម្គាល់យន្តហោះដឹកជញ្ជូនយោធារបស់ចិនដ៏ធំបំផុតលើពិភពលោក Y-20 ។ Y-20 ជាប្រភេទយន្តហោះដឹកជញ្ជូនដែលត្រូវបានផលិតឡើងដោយក្រុមហ៊ុនរដ្ឋឧស្សាហកម្មអាកាសចរណ៍ចិន (AVIC) ។
យន្តហោះយោធាថ្មីនិងធំបំផុតនេះបានហោះហើរសាកល្បងជាលើកដំបូងតាំងពីឆ្នាំ ២០១៣ តែវាទើបតែចូលបម្រើក្នុងវិស័យកងទ័ពចិនជាផ្លូវការនៅដើមសប្តាហ៍នេះប៉ុណ្ណោះ។ បើនិយាយពីទ្រង់ទ្រាយជារួមនៃយន្តហោះនេះ Y-20 មានប្រវែង ៤៧ ម៉ែត្រ និងមានទទឹងរហូតដល់ ៤៥ម៉ែត្រ (រាប់ប្រវែងស្លាប)។ ទម្ងន់សរុបដែលអាចហើរបានរបស់យន្តហោះនេះគឺ ២២០ តោន ហើយវាអាចដឹកសម្ភារៈដែលមានទម្ងន់រហូតដល់ ៦៦ តោនឯណោះ។ ចំណែកល្បឿនវិញ យន្តហោះយោធា Y-20 អាចហោះហើរបានរយៈចម្ងាយ ៨៣០គីឡូម៉ែត្រក្នុងមួយម៉ោង។
ក្រោយដាក់យន្តហោះនេះចូលបម្រើក្នុងវិស័យកងទ័ពចិននោះ ក្រសួងការពារជាតិបានអះអាងថា វាជាជោគជ័យដ៏ធំមួយសម្រាប់ចិន ហើយណាមួយវាក៏បញ្ជាក់ពីការវិវត្តនៃសមត្ថភាពរបស់កងទ័ពចិននាពេលបច្ចុប្បន្នដែរ។
អ្នកនាំពាក្យកងទ័ពអាកាសលោក Shen Jinke បានអះអាងថា៖ «ការចូលបម្រើវិស័យយោធារបស់យន្តហោះ Y-20 ជាជំហានដ៏សំខាន់មួយរបស់កងទ័ពអាកាសចិនក្នុងការពង្រឹងសមត្ថភាពនិងយុទ្ធសាស្ត្រយោធា»។
បើតាមសារព័ត៌មានរុស្ស៊ី Sputnik យន្តហោះដែលជាផលិតផលក្នុងស្រុករបស់ចិនដ៏ធំនិងទំនើបនេះត្រូវបានសាងសង់ឡើងដោយប្រើម៉ាស៊ីនរបស់រុស្ស៊ី Soloviev D-30 ចំនួន៤។ ហើយជារួមវាអាចមានសមត្ថភាពដឹករថក្រោះរថពាសដែក និង សម្ភារៈនិងគ្រឿងម៉ាស៊ីនដែលប្រើប្រាស់ក្នុងវិស័យយោធា។ ហើយក្រៅពីបំពេញតួនាទីជាយន្តហោះដឹកជញ្ជូន វាក៏អាចប្រើប្រាស់ជាកន្លែងមជ្ឈមណ្ឌលសម្រាប់បញ្ជានិងដែលអាចភ្ជាប់ទំនាក់ទំនងរវាងយន្តហោះនានាក្នុងពេលប្រយុទ្ធ និងធ្វើជាយន្តហោះសម្រាប់ជួយចាក់សាំងឲ្យយន្តហោះលើអាកាសផងដែរ៕
© រក្សាសិទ្ធិដោយ thmeythmey.com