កំណាព្យបទ ពាក្យ ៨
និពន្ធដោយ ប៉ាកកាខ្មៅ!
-មេឃរាំងដីប្រេះគួរឲ្យអាសូរ
អ្នកស្រែស្រែកថ្ងូរចង់ដូររបរ
ខ្លះរត់ចោលស្រុកទៅរែកសែងថ្ម
ខ្លះឆ្លងបន្តដល់ស្រុកក្បែរខាង។
-ខ្លះចាញ់បោកគេគួរឲ្យស្រណោះ
ខ្លះជាប់លើកោះរស់គ្មានសំណាង
គេលក់ដូចសត្វរងទុក្ខគ្មានស្វាង
ខ្លះមានសំណាងបានវិលដល់ស្រុក។
-ស្រុកខ្លះសម្បូរក៏ប្តូរជាខ្សត់
ខ្លះលក់ដីម៉ត់អង្គុយសំកុក
ប្រឹងដើរស៊ីឈ្នួលរកលុយតត្រុក
អ្នកខ្លះសម្រុកគិតបុកបកល្បែង។
-ខ្ញុំសុំអភ័យប្រុសស្រីបើជ្រុល
មិនមែនបំពុលថាតាមជាក់ស្តែង
បំភ្លៃបំផ្លើសបង្អាប់ស្រុកឯង
ខ្ញុំលើកនេះក្រែងមានអ្នកជួយកែ៕