កីឡាជាតិ
ជាតិ
×![]()
ដោយ: រួបរួម
ថ្នាក់ដឹកនាំ និងគ្រូបង្វឹកក្រុមកីឡាបាល់ទាត់ជម្រើសអាយុក្រោម១៦ឆ្នាំ ទាំង១១ក្រុម សុទ្ធតែបង្ហាញឆន្ទះរៀងៗខ្លួនក្នុងការដឹកនាំក្រុមឆ្ពោះទៅកាន់វគ្គផ្តាច់ព្រ័ត្រនៃពានរង្វាន់ AFF U-16 Championship ដែលចាប់ដំណើរការពីថ្ងៃទី១០ ខែកក្កដា នៅពហុកីឡដ្ឋានជាតិអូឡាំពិក និងកីឡដ្ឋានកងយោធពលខេមរភូមិន្ទ។
នៅក្នុងពូល A មីយ៉ាន់ម៉ា និងវៀតណាម បានគ្រប់គ្រងតំណែងជើងឯកចំនួន២លើក អូស្ត្រាលី និងម៉ាឡេស៊ី ធ្លាប់លើកពានបាន១លើក សឹង្ហបុរី ធ្លាប់ឈានដល់វគ្គពាក់កណ្តាលផ្តាច់ព្រ័ត្រ២លើក ខណៈហ្វីលីពីន តែងតែធ្លាក់នៅវគ្គជម្រុះតាមពូល។
សម្រាប់ពូល B កម្ពុជាមានឱកាសធ្វើម្ចាស់ផ្ទះលើកទី៣ ប៉ុន្តែពួកគេមិនធ្លាប់មានប្រវត្តិឆ្លងផុតវគ្គជម្រុះតាមពូលនោះឡើយ។ ថៃជាម្ចាស់ជើងឯក៣ជំនាន់ និងជាក្រុមដែលត្រូវការពារតំណែងជើងឯកផងដែរ រីឯឡាវ បើទោះបីជាពួកគេមិនធ្លាប់លើកពានម្តងណាក៏ដោយ ប៉ុន្តែក្រុមមួយនេះ ឈានដល់វគ្គផ្តាច់ព្រ័ត្រ៣លើក លេខ៣ចំនួន២លើក និងលេខ៤ចំនួន២លើក។ ទីម័រខាងកើតធ្លាប់បានលេខ៣ម្តងកាលពីឆ្នាំ២០១០ ខណៈព្រុយណេ តែងតែធ្លាក់នៅវគ្គជម្រុះដូចគ្នាកម្ពុជាផងដែរ។
ខាងក្រោមនេះ ការតាំងចិត្ត និងការរំពឹងគ្រូបង្វឹក និងថ្នាក់ដឹកនាំនៃក្រុមទាំង១១ នាអំឡុងនៃសន្និសីទសារព័ត៌មាននៅសណ្ឋាគារភ្នំពេញ កាលពីព្រឹកថ្ងៃសៅរ៍ ទី៩ ខែកក្កដា៖
ពូល A (មីយ៉ាន់ម៉ា វៀតណាម អូស្ត្រាលី ម៉ាឡេស៊ី និងសិង្ហបុរី)៖
គ្រូបង្វឹកមីយ៉ាន់ម៉ា៖ យើងនឹងព្យាយាមធ្វើឲ្យបានល្អបំផុតនៅរាល់ការប្រកួត។ ខ្ញុំសង្ឃឹមថា យើងនឹងបោះជំហានទៅមុខ។
គ្រូបង្វឹកវៀតណាម៖ នេះជាលើកទីពីរសម្រាប់ខ្ញុំដែលបានដឹកនាំក្រុមមកប្រកួតប្រជែងក្នុងព្រឹត្តិការណ៍ AFF U-16 នៅកម្ពុជា។ យើងនឹងប្រឹងប្រែងឲ្យឈានចូលវគ្គបន្ត ប៉ុន្តែយើងក៏គោរពគូប្រជែងផងដែរ។
គ្រូបង្វឹកអូស្ត្រាលី៖ យើងប្រើប្រាស់ការប្រកួតនេះក្នុងការត្រៀមខ្លួនចូលវគ្គជម្រុះ World Cup នៅប្រទេសឥណ្ឌា។ យើងព្យាយាមឲ្យឈ្នះរាល់ការប្រកួត ហើយឈានទៅដល់វគ្គផ្តាច់ព្រ័ត្រ។
គ្រូបង្វឹកម៉ាឡេស៊ី៖ យើងស្ថិតនៅក្នុងក្រុមដ៏តឹងតែងមួយ ប៉ុន្តែយើងដាក់គោលដៅទៅកាន់វគ្គផ្តាច់ព្រ័ត្រ។
គ្រូបង្វឹកសិង្ហបុរី៖ នេះជាឆ្នាំទីមួយរបស់ខ្ញុំដែលមកដឹកនាំយុវជនសិង្ហបុរី ព្រឹត្តិការណ៍នេះក៏ជាការប្រឈមដំបូងរបស់ខ្ញុំផងដែរ។ ខ្ញុំបានស្វែងយល់ពីក្រុមផ្សេងៗដើម្បីត្រៀមប្រជែងជាមួយពួកគេ។
ពូល B៖ កម្ពុជា ថៃ ឡាវ ទីម័រខាងកើត និងព្រុយណេ
គ្រូបង្វឹកកម្ពុជា លោក Inoue Kazunori៖ ក្នុងនាមជាម្ចាស់ផ្ទះ យើងត្រូវតែមានការប្រឹងប្រែងខ្ពស់ ហើយខ្ញុំជឿជាក់ថា យើងនឹងទទួលបានលទ្ធផលល្អនៅរាល់ការប្រកួត។
គ្រូបង្វឹកថៃ៖ កីឡាករទាំងអស់របស់យើងគ្មានបញ្ហាអ្វីឡើយ។ យើងមានជំនឿចិត្តថា យើងនឹងឈ្នះជើងឯកពីរឆ្នាំជាប់ៗនៅលើទឹកដីកម្ពុជា។
គ្រូបង្វឹកឡាវ៖ ក្រុមម្ចាស់ផ្ទះ និងក្រុមផ្សេងទៀត សុទ្ធតែខ្លាំងដូចគ្នា ដូច្នេះ យើងត្រូវតែព្យាយាមធ្វើឲ្យបានល្អនៅរាល់ការប្រកួតដើម្បីឈានទៅវគ្គបន្ត។
ជំនួយការបច្ចេកទេសក្រុមទីម័រខាងកើត៖ យើងតាំងចិត្ត និងរំពឹងថា ទីម័រខាងកើតអាចឈានទៅដល់វគ្គផ្តាច់ព្រ័ត្រ។
គ្រូបង្វឹកព្រុយណេ៖ មិនមានការដាក់ទិសដៅណាមួយឡើយ ប៉ុន្តែយើងនឹងធ្វើឲ្យការប្រកួតពោរពេញទៅដោយការប្រកួតប្រជែងខ្ពស់៕
Tag:
AFFU16
U16 កម្ពុជា
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 2 ម៉ោង
