ពីនេះ ពីនោះ
កម្ពុជាសមរភូមិអំណាច ទាក់ទាញជាងសមរភូមិសេដ្ឋកិច្ច
× ភ្នំពេញ៖ព្រឹត្តិការណ៍នយោបាយ សម្ដីអ្នកនយោបាយ ទង្វើរបស់អ្នកនយោបាយ ការវិវឌ្ឍននយោបាយ ប្រៀបដូចជាសមរភូមិមួយ ដែលយុវជន បញ្ញវន្ត បណ្ឌិត មន្ត្រី សង្គមស៊ីវិល ពលរដ្ឋគ្រប់រូប រួមទាំងបណ្ដាអ្នកផ្សាយព័ត៌មានផង មានការចាប់អារម្មណ៍ និងតាមដានយ៉ាងសកម្ម។ ប៉ុន្តែ សមរភូមិសេដ្ឋកិច្ច ហាក់មិនសូវមានអ្នកចាប់អារម្មណ៍ទៅវិញ។
មនុស្សភាគច្រើនផ្តោតតែទៅលើ នយោបាយក្នុងស្រុក ធ្វើអោយប្រជាពលរដ្ឋខ្មែរ មាននិន្នាការមួយ ទៅជាមនុស្សនយោបាយ និងប្រទេស ទៅជាប្រទេសនយោបាយ ហើយមិនស៊ូវជជែកគ្នា ពីអ្វីផ្សេងក្រៅតែពីនយោបាយទេ ស្ទើគ្រប់ទីកន្លែង។ ក្នុងនោះប្រទេសនេះផ្តោតតែលើកត្តានយោបាយខាងក្នុង ប៉ុន្តែដូចជាមិនស៊ូវបានចាប់អារម្មណ៍លើការវិវឌ្ឍនរបស់ប្រទេសជិតខាង និងនយោបាយ-សេដ្ឋកិច្ចតំបន់។
មូលហេតុទាំងនេះ អាចធ្វើអោយមនុស្សខ្មែរជាពិសេសអ្នកនយោបាយ ភ្លេចគិតពីអាទិភាព នយោបាយ-សេដ្ឋកិច្ចជាតិ ហើយមួយថ្ងៃៗនាំគ្នារវល់តែធ្វើយ៉ាងណាវាយឲ្យឈ្នះ សមរភូមិអំណាច។ ប៉ុន្តែសមរភូមិសេដ្ឋកិច្ចដែលគេតែងតែនិយាយថា ជាសរសៃឈាមរបស់ប្រទេសបែរស្ទើតែត្រូវបានគេទុកជាកត្ដាបន្ទាប់បន្សំទៅវិញ។
មែនទែនទៅ សមរភូមិអំណាចក្នុងស្រុកមិនគួរណាធ្វើឲ្យមន្ត្រីរ ពលរដ្ឋ យុវជន បញ្ញវន្ត បណ្ឌិត រវល់គ្មានពេលសម្រាក់បែបនេះឡើយ។ ប៉ុន្តែបញ្ហា ការប្រកួតប្រជែងឥទ្ធិពលរបស់កម្ពុជាជាមួយបណ្តាប្រទេសដទៃក្នុងតំបន់ និងពិភពលោក នោះទើបជាកិច្ចការដ៏ចាំបាច់។ បច្ចុប្បន្ននេះ នៅពេលដែលគិតតែឈ្លោះគ្នាពេក ទីបំផុតអ្នកចាញ់ និងអ្នកឈ្នះគឺនៅតែជាខ្មែរ ជាកូនខ្មែរ ជាពលរដ្ឋខ្មែរដដែល។
ប៉ុន្តែសួរថា ទៅប្រកួតប្រជែងឥទ្ធិពលជាមួយគេយ៉ាងណាទៅ? បើឆ្នាំងបាយ ម្ហូប សំលៀកបំពាក់ ផ្ទះសម្បែង ការងារ និងលុយកាក់ចាយរបស់រាស្ត្រមួយនេះ មិនទាន់អាចមានស្ដង់ដារកំណត់ថាល្អប្រសើរផងនោះ។ បើបែបនេះត្រូវគិតឲ្យសកម្មចំពោះវិស័យមួយនេះ។
យ៉ាងណាមិញ បើបានជាចាប់ផ្ដើមគិតពីវិស័យសេដ្ឋកិច្ចហើយ សូមកុំភ្លេច វិស័យការទូត និងទំនាក់ទំនងអន្តរជាតិ, វិស័យសន្តិសុខជាតិ នយោបាយការពារជាតិ, វិស័យពាណិជ្ជកម្មអន្តរជាតិ និងសេដ្ឋកិច្ចតំបន់, បច្ចេកទេសវិទ្យាសាស្ត្រ ជាដើម។ និយាយបែបនេះ មិនមែនមានន័យថា ពីមុនមកខ្មែរមិនដែលគិតសោះនោះទេ។ ប៉ុន្តែ ត្រូវបន្ថែមអ្នកគិតបញ្ហាទាំងនេះបន្ថែមទៀត តែមិនមែនយកតែអ្នកដែលគ្រាន់តែគិតដើម្បីដូរតែតួនាទី និងប្រាក់ខែ ឡើយ។ ប៉ុន្តែត្រូវតែយកអ្នកដែលគិតនាំឲ្យវិស័យសន្តិសុខជាតិខ្លាំង វិស័យពាណិជ្ជកម្មជាតិលូតលាស់ សេដ្ឋកិច្ចប្រសើរ កូនខ្មែរអាចញញឹមបានយ៉ាងស្រស់ពីទីក្រុងដល់ជនបទ៕
© រក្សាសិទ្ធិដោយ thmeythmey.com