កីឡាអន្តរជាតិ
ម្ចាស់ផ្ទះបារាំង ឬ ព័រទុយហ្គាល់ ដែលនឹងលើកពាន Euro 2016?
× នាវេលាម៉ោង២ទៀបភ្លឺ បារាំងនឹងប្រើប្រាស់កីឡដ្ឋាន Stade de France ដើម្បីទទួលភ្ញៀវព័រទុយហ្គាល់សម្រាប់ការប្រកួតវគ្គផ្តាច់ព្រ័ត្រ Euro 2016 ។ ក្នុងដំណើរមកកាន់ការប្រជែងពាននេះ ក្រុមទាំងពីរសុទ្ធតែបានទម្លាក់គូប្រជែងក្នុងលទ្ធផល ២-០ ដូចគ្នានៅវគ្គពាក់កណ្តាលផ្តាច់ព្រ័ត្រ ដោយបារាំងយកឈ្នះអាល្លឺម៉ង់ ព័រទុយហ្គាល់បំបាក់វេលស៍។
ក្រោមការដឹកនាំរបស់លោក Didier Deschamps បារាំងសំឡឹងរកការឈ្នះពានសំខាន់ៗ ជា លើកទីបីនៅទឹកដីរបស់ខ្លួន ដោយកាលពីឆ្នាំ១៩៨៤ ពួកគេបានឈ្នះក្នុងព្រឹត្តិការណ៍ Euro និងឆ្នាំ១៩៩៨ ក្រុមដែលមានរហស្សនាមថា Les Bleus មួយនេះ លើកពាន FIFA World Cup។
ព័រទុយហ្គាល់របស់លោក Feando Santos ស្វែងរកការលើកពានដ៏ធំជាលើកដំបូង ដោយពួកគេចង់ផ្តល់មេរៀនដល់បារាំង ដូចដែលពួកគេធ្លាប់បានជួបប្រទះ។ កាលពីឆ្នាំ២០០៤ ព័រទុយហ្គាល់បានក្លាយជាក្រុមម្ចាស់ផ្ទះទីមួយដែលចាញ់វគ្គផ្តាច់ព្រ័ត្រ Euro ដោយនៅពេលនោះ ពួកគេបានចាញ់ក្រិក។
ក្រុមទាំងពីរធ្លាប់មានប្រវត្តិជួបប្រកួតគ្នាចំនួន២៤លើក ដោយបារាំងឈ្នះ១៨លើក ព័រទុយហ្គាល់ឈ្នះ៥លើក និងស្មើគ្នា១លើក។ ជំនួបនារាត្រីនេះផងដែរ អ្នកទស្សនានឹងផ្តោតជាពិសេសចំពោះវត្តមានរបស់កីឡាករពាក់លេខ៧ទាំងសងខាង គឺ Cristiano Ronaldo របស់ព័រទុយហ្គាល់ និង Antoine Griezmann នៃក្រុមម្ចាស់ផ្ទះបារាំង។
Ronaldo និង Griezmann គឺជាកីឡាករឆ្នើមនៅក្របខណ្ឌកំពូលអេស្ប៉ាញ La Liga ដោយក្រុម Real Madrid របស់ Ronaldo ទើបយកឈ្នះ Atletico Madrid របស់ Griezmann ដើម្បីលើកពាន Champions League៕
© រក្សាសិទ្ធិដោយ thmeythmey.com