ជាតិ
ធម្មកថិកដ៏ល្បីចូលរួមមរណទុក្ខលោក កែម ឡី និងឲ្យខ្មែរមានមេត្តាដល់គ្នា
× ព្រះតេជគុណ សាន សុជា ធម្មកថិកដ៏ល្បីល្បាញនៅក្នុងប្រទេសកម្ពុជា សោកសា្តយចំពោះអំពើឃាតកម្មដែលកើតឡើងលើលោក កែម ឡី។ សម្រាប់ព្រះអង្គ សាន សុជា ការស្លាប់របស់លោក កែម ឡី ប្រៀបបានដូចជាបាត់សាច់មួយដុំចេញពីប្រកាយព្រះអង្គដែរ។
បើទោះបីជា លោក កែម ឡី មិនមែនជាសាច់ញាតិរបស់ព្រះអង្គ ឬមិនធ្លាប់ទំនាក់ទនងការងារជាមួយក្តី ក៏ព្រះតេជគុណ សាន សុជា មានដីកាថា ការស្លាប់របស់លោក កែម ឡី ប្រៀបបានដូចជាដាច់សាច់មួយដុំចេញពីព្រះកាយរបស់ព្រះអង្គដែរ។ ព្រះអង្គ មានថេរដីកាតាមរយៈវីដេអូនៅក្នុងថ្ងៃដែលលោក កែម ឡី ត្រូវឃាតករបាញ់សម្លាប់បែបនេះថា៖«មានការខ្លោចផ្សារក្នុងបេះដូង ខ្មែរមានអ្នកចេះដឹងហើយ បាត់បង់អ្នកចេះដឹងយ៉ាងផុយស្រួយជាទីបំផុត។ ហើយក៏មិនខឹងអ្នកបានបាញ់ទៅទៀត។ ចិត្តមែនទែនឥឡូវនេះ កាន់តែសង្វេគថា រឿងអីធ្វើឲ្យសត្វលោកយើងបាត់បង់សតិសម្បជញ្ញៈដល់ប៉ុណ្ណឹង? អំពើផ្តាច់ជីវិញបែបនេះ ចេះតែហ៊ានធ្វើទៅរួចដែរ»។
ធម្មថិកដ៏ល្បី ដែលមិនមែនស្ថិតតែនៅក្នុងចិត្តមនុស្សចាស់ៗ តែថែមទាំងស្ថិតនៅក្នុងចិត្តយុវជនខ្លះផងនោះ បន្តថា លោក កែម ឡី គឺជាបញ្ញវន្ត ដែលប្រជាពលរដ្ឋខ្មែរក្មេង ចាស់ នៅក្នុងប្រទេស ក្រៅប្រទេស ភាគច្រើនយល់ថា លោក គឺជាមនុស្សនិយាយត្រង់ៗ ។ ព្រះអង្គ សាន សុជា បានអំពាវនាវឲ្យពលរដ្ឋខ្មែរ កុំស្អប់គ្នា ព្រោះតែមាននិន្នាការនយោបាយផ្សេងគ្នា។«បើយើងធ្វើនយោបាយ ដើម្បីសេចក្តីសុខសេចក្តីចម្រើនប្រទេសជាតិយើង កុំត្រេកអរនៅពេលដែលឃើញអ្នកដែលមានទស្សនៈខុសយើងស្លាប់»។
ព្រះតេជគុណ សាន សុជា ស្នើឲ្យប្រជាពលរដ្ឋ និងព្រះសង្ឃដែលស្រឡាញ់ គោរពនូវវីរភាពរបស់លោក កែម ឡី កុំស្រឡាញ់ និងគាំទ្រនូវវីរៈភាពនេះតែមួយថ្ងៃ តែត្រូវមានជារឿងរហូត។ លើសពីនេះ គួរគោរពស្រឡាញ់រាប់អានកូន ភរិយា របស់លោក កែម ឡី លើកតម្កើងឲ្យមានកិត្តិយស ឬអាចជួយជាសម្ភារ ដើម្បីបញ្ជាក់ពីការស្រឡាញ់ចំពោះអ្នកមានទឹកស្នេហាជាតិ។« កុំធ្វើតែមួយខ្យល់នោះ»។ នេះជាព្រះសង្ឃដីកាបញ្ជារបស់ប្រធានសមាគមធម្មកថិកកម្ពុជាខាងលើ ទន្ទឹមនឹងព្រះតេជគុណ អំពាវនាវឲ្យធម្មថិកទាំងអស់ត្រូវទេសនា ធ្វើយ៉ាងណាឲ្យខ្មែរស្រឡាញ់គ្នា មានមេត្តាឲ្យបានច្រើន និងឲ្យមនុស្សមានគុណធម៌ក្នុងខ្លួន៕
សូមទស្សនាវីដេអូ ខាងក្រោម៖
Tag:
សាន សុជា
កែម ឡី
© រក្សាសិទ្ធិដោយ thmeythmey.com