ក្នុងសន្និសីទសារព័ត៌មាននៅពហុកីឡដ្ឋានជាតិកាលពីព្រឹកថ្ងៃទី១៣ ខែកក្កដា អតីតកីឡាករបាល់បោះដ៏ល្បីល្បាញរបស់អាមេរិក Wayne Ellington និងកីឡាការិនី Sue Wicks បានប្តេជ្ញាថា នឹងពាំនាំយកបទពិសោធន៍ល្អៗដែលខ្លួនមានមកចែករំលែកដល់ក្រុមយុវជនបាល់បោះកម្ពុជា ក្នុងដំណើរមកកាន់កម្ពុជារយៈពេល៦ថ្ងៃរបស់ខ្លួននេះ។ ការធ្វើដូច្នេះក្នុងគោលបំណងដើម្បីជួយលើកស្ទួយ និងពង្រឹងវិស័យកីឡាបាល់បោះកម្ពុជាឲ្យកាន់តែមានការរីកចម្រើន ជាពិសេសដើម្បីធ្វើឲ្យពិភពលោកមានការចាប់អារម្មណ៍មកលើវិស័យកីឡានៅកម្ពុជា។
វាជាកិត្តិយសមួយដ៏ល្អសម្រាប់កម្ពុជាជាពិសេសក្រុមយុវជនតែម្តងដែលទទួលបានការចែករំលែកបទពិសោធន៍ល្អៗពីសំណាក់អតីតកីឡាករកីឡាការិនីដ៏ល្បីល្បាញរបស់អាមេរិក ក្នុងការពង្រឹងសមត្ថភាព និងបច្ចេកទេសរបស់ខ្លួន។ ជាមួយគ្នានេះអតីតកីឡាករកីឡាការិនីទាំងពីររូបនេះក៏បានប្តេជ្ញាផងដែរថា ខ្លួននឹងពាំនាំយកបទពិសោធន៍ល្អៗរបស់ខ្លួនដល់កម្ពុជាតាមរយៈការបង្ហាញពីសមត្ថភាព និងការអនុវត្តផ្ទាល់ជាមួយក្រុមយុវជន។
លោក Wayne Ellington តំណាងសមាគមបាល់បោះអាមេរិកបានាមានប្រសាសន៍ថា សម្រាប់ការមកបំពេញទស្សនកិច្ចនៅកម្ពុជានេះលោកនឹងចែករំលែកបទពិសោធន៍ដែលលោកមានធ្លាប់បានឆ្លងកាត់នាពេលកន្លងមក ដើម្បីចែករំលែកដល់ក្រុមយុវជនកម្ពុជាតាមអ្វីដែលលោកអាចធ្វើបាន។
លោកបានបញ្ជាក់ថា៖«សម្រាប់វត្តមានរបស់យើងខ្ញុំទាំងពីរនាក់នៅទីនេះធ្វើយ៉ាងណាពាំនាំនូវទេពកោសល្យដែលខាងយើងខ្ញុំមានមកចែករំលែកដល់ក្រុមយុវជនកម្ពុជាជំនាន់ក្រោយ ម្យ៉ាងទៀតពួកយើងប្តេជ្ញាថា នឹងធ្វើការងារនេះឲ្យអស់ពីសមត្ថភាពតាមអ្វីដែលយើងអាចធ្វើបាន»។
ជាមួយគ្នានេះអតីតកីឡាការិនីអាមេរិក Sue Wicks កំពុងទន្ទឹងរង់ចាំយ៉ាងអន្ទះសាសម្រាប់ថ្ងៃមកដល់នៃការបង្ហាញសមត្ថភាពរបស់ខ្លួននៅលើទីលាន ជាពិសេសការអនុវត្តផ្ទាល់ជាមួយក្រុមយុវជនទ ព្រោះរូបគេចង់បង្ហាញឲ្យក្រុមយុវជនទាំងនេះបានឃើញពីភាពខ្លាំងរបស់ខ្លួន ដើម្បីឲ្យពួកគេបានដកស្រង់យកបទពិសោធន៍ និងបច្ចេកទេស ព្រមទាំងតិចនិកនៃការលេងបាល់បោះរបស់ខ្លួន។
គួរបញ្ជាក់ថា សម្រាប់ការមកកាន់កម្ពុជារបស់អតីតកីឡាករកីឡាការិនីអាមេរិកនេះធ្វើឡើងដោយក្រសួងការបរទេសអាមេរិកសហការជាមួយសហមាគមបាល់បោះបុរស និងនារីអាមេរិកក្នុងគោលបំណងដើម្បីឲ្យពួកកេទាំងនេះជួយពង្រឹងវិស័យកីឡាបាល់បោះដល់យុវជនកម្ពុជា និងដើម្បីរិតចំណងមិត្តភាពរវាងកម្ពុជា និងអាមេរិកឲ្យកាន់តែជិតស្និត។ ម្យ៉ាងទៀតកីឡាករកីឡាការិនីទាំងនេះសុទ្ធសឹងជាកីឡាករដ៏ល្បីល្បាញ់របស់អាមេរិកដែលលេងឲ្យសមាគមបាល់បោះ NBA និងWNBA។
ទន្ទឹមនិងនេះ លោក Courtney Woods អ្នកនាំពាក្យស្ថានទូតអាមេរិកបានបញ្ជាក់ថា ការមកកាន់កម្ពុជារបស់កីឡាករកីឡាការិនីទាំងនេះក្នុងគោលបំណងធំៗពីររួមមាន នៅម៉ោង៩ ថ្ងៃទី១៤ ខែកក្កដា មានកម្មវិធីជួបជុំដោយសេរី នៅសាលាវត្តកោះ ដើម្បីជួយដល់គំរោងជួសជុលទីលានលេងកីឡាបាល់បោះនៅក្នុងសាលានេះ។ ហើយនៅ ម៉ោង ៥ រសៀល ថ្ងៃទី ១៥ កក្កដា នឹងមានកម្មវិធីនៅពហុកីឡាដ្ឋានអូឡាំពិក ដោយមានការលេងបាល់បោះ ការប្រគំតន្ត្រី និងមានកម្មវិធីជាច្រើនទៀត។
ជាមួយគ្នានេះ លោក អ៊ុក សិទ្ធិជាតិ អគ្គនាយកនៃអគ្គនាយកដ្ឋានកីឡា និងជាអនុប្រធានសហព័ន្ធកីឡាបាល់បោះកម្ពុជាបានមានចាត់ទុកការមកកាន់កម្ពុជារបស់អតីតកីឡាករកីឡាការិនីអាមេរិកនេះថា វាជាឱកាសមួយដ៏ល្អសម្រាប់យុវជនកម្ពុជាក្នុងការពង្រឹងសមត្ថភាពរបស់ខ្លួន តាមរយៈការដកស្រង់នូវបទពិសោធន៍ទាំងទ្រឹស្តី និងការអនុវត្ត ទោះបីជាវាមានរយៈខ្លីយ៉ាងណាក៏ដោយ។
ទោះបីជាយ៉ាងនេះកី្ត អនុប្រធានសហព័ន្ធរូបនេះបានចាត់ទុកថា ការចែករំលែករំលែកត្រឹមបទពិសោធន៍ដល់យុវជនកម្ពុជានេះវាមិនទាន់គ្រប់គ្រាន់នោះទេ លើសពីនេះគឺលោកចង់ឲ្យអាមេរិកជួយផ្តល់នូវគ្រូបង្វឹកល្អៗ ជាពិសេសការផ្តល់ជាកីឡាករជនជាតិខ្មែរសញ្ជាតិអាមេរិកមកលេងឲ្យកម្ពុជា។
កីឡាករ Wayne Ellington ត្រូវបានជ្រើសរើសជាកីឡាករ ទី ២៨ ដោយក្រុមកីឡា Minnesota Timberwolves ក្លាយជាសមាជិកក្រុមកីឡាបាល់បោះប្រចាំឆ្នាំនៅសហរដ្ឋអាមេរិក ក្នុងឆ្នាំ ២០០៩ ។ Ellington លេងឲ្យក្រុម Brooklyn Nets កាលពីឆ្នាំទៅ និងលេងឲ្យក្រុម Memphis Grizzlies, Cleveland Cavaliers, Dallas Mavericks និង Los Angeles Lakers ផងដែរ។ កីឡាករ Ellington ធ្លាប់ទទួលរង្វាន់ 2015-16 J. Walter Kennedy Citizenship Award។ ពានរង្វាន់នេះ សមាគមអ្នកនិពន្ធស្តីពីកីឡាបាល់បោះអាជីព ផ្តល់ឲ្យរាល់ឆ្នាំ ដល់កីឡាករនៅក្នុងសមាគមកីឡាបាល់បោះ គ្រូបង្ហាត់ ឬអ្នកបង្ហាត់កីឡាករ ដែលមានស្នាដៃឆ្នើមក្នុងការងារ។
ចំណែកកីឡាការិនី Sue Wicks បានជាប់ជាជម្រើសជុំដំបូងដោយក្រុម New York Liberty នៅក្នុងការជ្រើសរើសកីឡាការិនីជាលើកដំបូង ក្នុងឆ្នាំ ១៩៩៧ របស់សមាគមកីឡាការិនីបាល់បោះក្នុងសហរដ្ឋអាមេរិក។ កីឡាការិនីរូបនេះ លេងឲ្យសាកលវិទ្យាល័យ Rutgers University ហើយបានជាប់ជាកីឡាការិនីស្ម័គ្រចិត្តល្អជាងគេចំនួន ៣ លើក ក្នុងសហរដ្ឋអាមេរិក ព្រមទាំងនៅឆ្នាំ ១៩៨៨ បានក្លាយជាអ្នកលេងល្អបំផុតប្រចាំឆ្នាំក្នុងសហរដ្ឋអាមេរិក។
កីឡាការិនីឆ្នើមរូបនេះ ធ្លាប់ទទួលបានពានរង្វាន់ Kim Perrot Sportsmanship Award នៅឆ្នាំ ២០០០ ហើយបានបញ្ចប់អាជីពរបស់លោកស្រីនៅក្នុងសមាគមបាល់បោះនារីអាមេរិក ដោយជាប់លេខ ៨។ កីឡាការិនី Wicks ត្រូវបានបញ្ចូលទៅក្នុងក្រាំងមាសផ្នែកកីឡាការិនីបាល់បោះក្នុងសាកលវិទ្យាល័យ Rutgers នៅខែមិថុនា ឆ្នាំ២០១៣៕