ជាតិ
សិស្ស១៦៨នាក់ទទួលវិញ្ញាបនបត្របញ្ចប់វគ្គសិស្សាថ្នាក់ក្រោមមតេ្តយ្យសិក្សាពី AiS
× កាលពីព្រឹកថ្ងៃសៅរ៍ ទី០៩ ខែកក្តដា ឆ្នាំ២០១៦ កន្លងទៅនេះវិទ្យាស្ថាន អន្តរទ្វីប អាមេរិកាំងបានប្រារព្ធ ពិធីចែកវិញ្ញាបនបត្របញ្ចប់វគ្គសិក្សាថ្នាក់ក្រោមមតេ្តយ្យសិក្សាសម្រាប់កុមារលើកទី០១ ក្រោមអធិបតីភាពរបស់លោក កែវ ឡង់ឌី អគ្គនាយកអប់រំ នៃវិទ្យាស្ថាន អន្តរទ្វីប អាមេរិកាំង ដែលប្រព្រឹត្តទៅនៅសាលប្រជុំ សូវ ហុងគុយ អគារលីម គីមណយ សាខាម៉ៅសេទុង នៃវិទ្យាស្ថាន អន្តរទ្វីប អាមេរិកាំង។
នៅក្នុងបរិយាកាសដ៏សែនរីករាយនោះ លោក កែវ ឡង់ឌី បានថ្លែងឱ្យដឹងថា នេះជាលើកទីមួយហើយដែល វិទ្យាស្ថាន អន្តរទ្វីប អាមេរិកាំង បានប្រារព្ធពិធីដ៏មានអត្ថន័យនេះ ដើម្បីសម្តែងនូវការកោតសរសើរយ៉ាងខ្លាំងដល់ សិស្សានុសិស្សថ្នាក់ក្រោមមត្តេយ្យសិក្សា ដែលបានខិតខំប្រឹងប្រែងរៀនសូត្ររហូតទទួលបានជោគជ័យ។
ឆ្លៀតនៅក្នុងឪកាសនោះដែរ លោក កែវ ឡង់ឌី បានបង្ហាញនូវទឹកចិត្តសប្បាយរីករាយជាអនេកប្បការជាមួយនឹងភាពជោគជ័យដ៏ត្រចះត្រចង់ដែលសិស្សានុសិស្សទាំងអស់សម្រេចបាន។ លោកបានគូសបញ្ជាក់យ៉ាងច្បាស់ថា អ្នក ទាំងអស់គ្នាដែលនឹងត្រូវទទួលវិញ្ញាបនបត្រនៅថ្ងៃនេះ គឺជាឆ្អឹងខ្នងដ៏រឹងមាំបំផុតសម្រាប់គ្រួសារ និងជាអនាគតរបស់ សង្គមជាតិទាំងមូល។ ជាពិសេសជាងនេះទៅទៀត លោកបានធ្វើការវាយតម្លៃខ្ពស់ចំពោះការខិតខំប្រឹងប្រែង ការចូលរួម ទាំងកម្លាំងកាយចិត្ត និងការយកចិត្តទុកដាក់ពីសំណាក់អ្នកអាណាព្យាបាលទៅកាន់បុត្រាបុត្រីរបស់ពួកគេ។
លោកបានបន្តទៀតថា ទាំងអ្នកអាណាព្យាបាល និងគណៈគ្រប់គ្រងវិទ្យាសា្ថនគឺមានមោទនភាពយ៉ាងខ្លាំងចំពោះភាពជោគជ័យដែលកូនៗ និងប្អូនៗទទួលបាននៅថ្ងៃនេះ។ លោកអគ្គនាយក មានជំនឿយ៉ាងមុតមាំថាប្អូនៗ ក៏មានមោទនភាពចំពោះខ្លួនឯងដែរ។ ស្របពេលគ្នានោះដែរ លោកបានលើកឡើងទៀតថា ប្អូនៗនៅក្នុងវ័យនេះ ភាគច្រើននៃការរៀន គឺធ្វើតាមរយៈសកម្មភាពនៃការលេង ដែលជាផ្នែកមួយដ៏សំខាន់សម្រាប់ការពង្រីកនៃការគិតរបស់ កុមារឱ្យមានភាពទូលំទូលាយ និងជួយបង្កើនមិត្តភាពរវាងមិត្តរួមថ្នាក់។
ទទ្ទឹមនឹងភាពជោគជ័យនេះ លោក កែវ ឡង់ឌី បានធ្វើការក្រើនរម្លឹក និងផ្តាំផ្ញើទៅកាន់សិស្សានុសិស្សដែលជា ជ័យលាភីទាំងអស់ ឱ្យបន្តខិតខំប្រឹងប្រែងរៀនសូត្រ និងធ្វើជាកូនល្អ សិស្សល្អសម្រាប់គ្រួសារ និងសង្គមជាតិទាំងមូល។ ហើយលោកបាននិយាយទៅកាន់សិស្សានុសិស្សទាំងអស់ ឱ្យចងចាំនូវសកម្មភាពរីករាយជាច្រើននៃការរៀនសូត្រទាំង នៅក្នុង និងក្រៅថ្នាក់រៀន។
នៅចុងបញ្ចប់ លោក កែវ ឡង់ឌី បានធ្វើការថ្លែងអំណរគុណសារជាថ្មីចំពោះលោកគ្រូ អ្នកគ្រូ ជាពិសេស អ្នកអាណាព្យាបាលសិស្សទាំងអស់ ដែលបានចំណាយពេលដ៏មមាញឹកមកចូលរួម និងលើកទឹកចិត្តដល់កូនៗរបស់ ពួកគេ។ ហើយលោកបានធ្វើការអរគុណទៅដល់អ្នកអាណាព្យាបាលសិស្សទាំងអស់ ដែលបានផ្តល់នូវទំនុកចិត្តមកកាន់ វិទ្យាស្ថាន អន្តរទ្វីប អាមេរិកាំង នៅក្នុងការបណ្តុះបណ្តាលបុត្រាបុត្រីរបស់ពួកគាត់៕
(អត្ថបទសាលា)
© រក្សាសិទ្ធិដោយ thmeythmey.com