អន្តរជាតិ
ប្រទេសដទៃ មិនគួរលូកលាន់បញ្ហាសមុទ្រចិនខាងត្បូងនោះទេ បើមិនចង់មានសង្គ្រាមកើតឡើង
× សាលក្រមតុលាការអន្តរជាតិក្រុងឡាអេលើសំណុំរឿងសមុទ្រចិនខាងត្បូង នៅតែជាប្រធានបទក្តៅដែលត្រូវបានជជែក។ នោះក៏ព្រោះតែបញ្ហានេះ បន្តវិវត្តទៅរកស្ថានភាពមួយស្មុគស្មាញ និងមិនមែនភាពប្រកដប្រជា។ ហ្វីលីពីន ឈ្នះក្តី តែមិនមានគោលជំហមួយជាក់លាក់ បន្ទាប់ពីតុលាការប្រកាសសាលក្រម ខណៈ ចិន រងសម្ពាធនៃការសំឡឹងមិនដាក់ភ្នែកពីមជ្ឈដ្ឋានអន្តរជាតិក្នុងការអនុវត្តនីតិរដ្ឋ ដ្បិតចិន បានបដិសេធមិនទទួល និងប្តេជ្ញាការពារដែនអធិបតេយ្យ និងគំរាមកំហែងពីខាងក្រៅ។ ចុងក្រោយនេះ ចិន ថែមទាំងព្រលយថា នឹងប្រកាសតំបន់កំណត់អត្តសញ្ញាណដែនអាកាស(ADIZ) ដែលជាសញ្ញាណមួយមិនល្អប៉ុន្មាននោះទេសម្រាប់ស្ថានភាពសមុទ្រចិនខាងត្បូង។
បើទោះបីជា ចិន តែងតែប្រកាសម្តងហើយម្តងទៀតថា មិនទទួលស្គាល់វេទិកាមជ្ឈត្តកម្មឯកតោភាគីរបស់ហ្វីលីពីន និងសាលក្រមរបស់មជ្ឈត្តការនៃតុលាការអចិន្ត្រៃយ៍ក៏ដោយ ចិន ក៏មិនអាចបណ្តែតបណ្តោយឲ្យមជ្ឈដ្ឋានអន្តរជាតិមើលខ្លួនក្នុងផ្លូវអវិជ្ជមានបានឡើយ។ ចិន បាននិងកំពុងតែបង្ហាញអំណេះអំណាង រួមជាមួយនឹងសារព្រមាន ជាបន្តបន្ទាប់ដើម្បីផ្តល់ភាពស្របច្បាប់ដល់សកម្មភាពឯកតោភាគីរបស់ខ្លួននៅក្នុងសមុទ្រចិនខាងត្បូង ដែលតុលាការបានបកស្រាយថា គ្មានមូលដ្ឋានច្បាប់ និងបំពានកាតព្វកិច្ចអន្តរជាតិទៀតផង។
១.ហេតុអ្វីបានជាចិនមិនអាចនៅស្ងៀមបាន?
បើនិយាយជារួម និងឲ្យខ្លីនោះ សាលក្រមស្ថាពររបស់មជ្ឈត្តការនៃតុលាការអចិន្ត្រៃយ៍ ក្រុងឡាអេ នៃប្រទេសហូឡង់ ដែលប្រកាសកាលពីថ្ងៃទី១២ ខែកក្កដាកន្លងទៅ បានបំផ្លាញមុខមាត់របស់ចិនក្នុងឆាកអន្តរជាតិមិនតិចនោះទេ។ នោះ ក៏ព្រោះតែកន្លងមក ចិន បានប្រើប្រាស់ភស្តុតាងប្រវត្តិសាស្ត្រដែលគេស្គាល់ថាជាផែនទី ចំណុចប្រាំបួនត្រេ (Nine-dash line) ដើម្បីអះអាងថាខ្លួនមានសិទ្ធិប្រវត្តិសាស្ត្រមុនពេលនៃអនុសញ្ញាអន្តរជាតិស្តីពីច្បាប់សមុទ្រចូលជាធរមានដើម្បីទាមទារតំបន់គ្រប់គ្រងក្នុងសមុទ្រចិនខាងត្បូង ដែលស្ទើរតែស្មើនឹងតំបន់ទាំងស្រុងនៃតំបន់មានវិវាទនោះ តែភស្តុតាងនេះ ត្រូវបានតុលាការបញ្ជាក់ថា គ្មានមូលដ្ឋានផ្នែកច្បាប់ទៅវិញ។ ការវាយតម្លៃបែបនេះ មានន័យស្មើនឹងសកម្មភាពរបស់ចិនទាំងអស់ក្នុងតំបន់ជម្លោះខុសច្បាប់អស់ទៅហើយ។
យ៉ាងក៏ដោយ លោកប្រធានាធិបតីចិន ស៊ី ជិនពីង បានថ្លែងបញ្ជាក់ភា្លមៗនៃការប្រកាសនោះរួចទៅហើយ ថា ចិន នឹងមិនទទួលស្គាល់រាល់សេចក្តីអះអាង ឬសកម្មភាព ដោយផ្អែកតាមសាលក្រមដែលប្រកាសដោយសាលាក្តីមជ្ឈត្តកម្មសមុទ្រចិនខាងត្បូង ដែលបានបង្កើតឡើងដោយឯកតោភាគីដោយអតីតប្រធានាធិបតីហ្វីលីពីនគឺ លោកប៊ែរនីណូ អាហ្គីណូ។ ប្រមុខរដ្ឋចិន ក៏បានសង្កត់ធ្ងន់ដែរថា អធិបតេយ្យរបស់ចិន និងផលប្រយោជន៍ដែនសមុទ្ររបស់ចិននៅក្នុងសមុទ្រចិនខាងត្បូង នឹងមិនអាចប៉ះពាល់បានដោយគ្រាន់តែសាលក្រមនោះបានឡើយ បើទោះជាក្នុងកាលៈទេសៈណាក៏ដោយ ។ បន្ថែមពីនេះ ក្រុងប៉េកាំង ក៏បានប្តេជ្ញាចិត្តរួចទៅហើយក្នុងការការពារអអិបតេយ្យ និងផលប្រយោជន៍ខ្លួន និងឆ្លើយតបទៅនឹងការគំរាមកំហែង និងការប្រជែងពីភាគីខាងក្រៅ។
២. សាលក្រមតុលាការអន្តរជាតិ គឺគ្រាន់តែជាក្រដាសសំរាមមួយប៉ុណ្ណោះសម្រាប់ចិន
អ្វីគួរកត់សម្គាល់នោះ ក្រៅពីការដាក់សំណើដែលជាគោលជំហរផ្លូវការជំទាស់ទៅនឹងយុត្តាធិការតុលាការអន្តរជាតិតាំងពីឆ្នាំ២០១៤នោះ ពោលគឺនៅពេលនៃការចាប់ផ្តើមនៃមជ្ឈត្តកម្ម ក្រុងប៉េកាំង នៅក្រោយនៃការប្រកាសសាលក្រមមួយថ្ងៃក៏បានចេញផ្សាយ«សៀវភៅស»ដែលមានកម្រាស់ជាង៤០ទំព័រដើម្បីបញ្ជាក់ជំហខ្លួនជាថ្មីម្តងទៀត។ សៀវភៅសនោះ មានឈ្មោះថា «ចិន ប្រកាន់ជំហមិនប្រែប្រួលលើការដោះស្រាយតាមរយៈការចរចា លើជម្លោះពាក់ព័ន្ធរវាងចិន និងហ្វីលីពីន នៅក្នុងសមុទ្រចិនខាងត្បូង» និងត្រូវបានធ្វើបទបង្ហាញដោយអនុរដ្ឋមន្ត្រីការបរទេសចិន លោក Liu Zhenmin ។
នៅក្នុងការធ្វើបទបង្ហាញនោះ លោកអនុរដ្ឋមន្ត្រី បានពណ៌នាសាលក្រមរបស់តុលាការ គឺប្រៀបប្រដូចទៅនឹង«ក្រដាសសម្រាមមួយដូច្នោះឯង»។ នេះបើយោងតាមការផ្សាយទូរទស្សន៍ចិន CCTV ដែលបានដកស្រង់ការព្រមានរបស់លោកអនុរដ្ឋមន្ត្រីដែរថា «ប្រទេសដទៃកុំឆ្លៀតឱកាសនេះមកគំរាមចិនឲ្យសោះ»។ មន្ត្រីជាន់ខ្ពស់រូបនោះ ក៏បានបង្ហាញក្តីសង្ឃឹម រួមជាមួយនឹងការព្រមានចុងក្រោយដែរថា ប្រទេសដទៃ អាចធ្វើការរួមគ្នាដើម្បីការពារសន្តិភាព និងស្ថិរភាពរបស់សមុទ្រចិនខាងត្បូង និងកុំបណ្តោយឲ្យសមុទ្រចិនខាងត្បូងក្លាយជាដើមទងនៃសង្គ្រាមផងដែរ។
៣. សន្តិសុខ និងសេរីភាពនៃការហោះហើរនៅសមុទ្រចិនខាងត្បូងកាន់អាក្រក់ បើចិន ទល់ច្រក?
អ្វីដែលគួរព្រួយបារម្ភជាងគេនោះ ក្នុងបទបង្ហាញដដែល លោកអនុរដ្ឋមន្ត្រី បានបង្ហាញពីចេតនាមួយថ្មីក្នុងការប្រកាសតំបន់កំណត់អត្តសញ្ញាណដែនអាកាស(ADIZ)ផងដែរ។ លោកអនុរដ្ឋមន្ត្រីសង្កត់ធ្ងន់ថា ចិន រក្សាសិទ្ធិក្នុងការប្រកាសតំបន់កំណត់អត្តសញ្ញាណដែនអាកាស (Air Defense Identification Zone = ADIZ ) នៅក្នុងសមុទ្រចិនខាងត្បូង ដើម្បីជាការឆ្លើយតបទៅនឹងគំរាមណាមួយ។ ក្នុងន័យនេះ ក៏អាចមានន័យថា ប្រទេសផ្សេងៗ មិនគួរធ្វើអ្វីឲ្យចិនក្តៅចិត្តខ្លាំង ឬទល់ច្រកឲ្យសោះបើចង់រក្សាសុវត្ថិភាពហោះហើរនៅទីនោះ។ ស្ថានភាពនឹងកាន់តែស្មុគស្មាញខ្លាំង ដ្បិតសន្តិសុខនៃការហោះហើរ ត្រូវឆ្លងកាត់គ្រប់គ្រងដោយចិនជានិច្ច។ ជាពិសេសនោះ អាមេរិករយៈពេលចុងក្រោយនេះ ក៏ឧស្សាហ៍ហោះហើរដើម្បីស៊ើបអង្កេត ក្រោមហេតុផលនៃការអនុវត្តសិទ្ធិសេរីភាពនៃការហោះហើរ។ ចិន ក៏ធ្លាប់ប្រកាសតំបន់បែបនេះនៅក្នុងសមុទ្រខាងកើតកាលពីឆ្នាំ២០១៣រួចទៅហើយ នៅពេលដែលមានភាពតានតឹងជាមួយនឹងជប៉ុន។
អ្វីជា ADIZ ? បើយោងតាមការពន្យល់របស់លោក ហេង សារិទ្ធ អ្នកស្រាវជ្រាវនៃវិទ្យាស្ថានកម្ពុជាដើម្បីសិក្សាយុទ្ធសាស្ត្រ ADIZ គឺជាតំបន់ដែលកំណត់ខណ្ឌសីមាជាតំបន់ការពារដែនអាកាសពិសេសមួយដែលទៅហួសពីព្រំដែនប្រទេសជាផ្លូវការទៅតាមការកំណត់ឯកតោភាគីរបស់ប្រទេសនោះ តាមរយៈការប្រកាសជាសាធារណៈ។ តាមរយៈការប្រកាសនេះ យន្តហោះដែលមិនទាន់បានកំណត់អត្តសញ្ញាណ ត្រូវស្ថិតក្រោមការស៊ើបអង្កេត និងប្រសិនបើចាំបាច់ត្រូវស្កាត់ក្នុងការគោលបំណងកំណត់់អត្តសញ្ញាណ និងចង់ដឹងពីគោលដៅរបស់យន្តហោះនោះ មុនពេលហោះចូលក្នុងដែនអាកាសអធិបតេយ្យរបស់រដ្ឋកំណត់ ADIZ។
យ៉ាងណាក៏ដោយ បើចិន ហ៊ានធ្វើបែបនេះជាផ្លូវការមែននោះ ចិន នឹងបំពានលើកិច្ចព្រមព្រៀងជាមួយនឹងអាស៊ានហើយ។ កិច្ចព្រមព្រៀងនោះគឺ សេចក្តីថ្លែងការណ៍ស្តីពីភាគីក្រមប្រតិបត្តិសមុទ្រចិនខាងត្បូង ឬហៅកាត់ថា DoC ដែលជាលិខិតតូបករណ៍តែមួយគត់រវាងចិន និងអាស៊ានដែលបង្ហាញពីយន្តការជាច្រើនដើម្បីដោះស្រាយជម្លោះសមុទ្រចិនខាងត្បូង។ យោងតាមប្រការទី៣ នៃ DoC ភាគីដែលមានចិន និងអាស៊ាន១០ប្រទេស បានអះអាងគោរពនូវសិទ្ធិនៃការធ្វើនាវាចរណ៍ និងការហោះហើរនៅលើសមុទ្រចិនខាងត្បូងដូចដែលបានកំណត់ដោយច្បាប់អន្តរជាតិ៕
Tag:
ចិន
សមុទ្រចិនខាងត្បូង
© រក្សាសិទ្ធិដោយ thmeythmey.com