សាលារាជធានី នឹងសម្រួលដល់ការហែរសពលោក កែម ឡី ទៅតាកែវ

ជាតិ

សាលារាជធានី នឹងសម្រួលដល់ការហែរសពលោក កែម ឡី ទៅតាកែវ

15, Jul 2016 , 11:56 am

រូបភាព

ដោយ: ខន ចំប៉ា

សាលារាជធានីភ្នំពេញបានសម្រេចបង្កើតក្រុមការងារមួយ ដើម្បីសម្រួលដល់ការដង្ហែសព លោក កែម ឡី ទៅកាន់ខេត្តតាកែវ នៅព្រឹកថ្ងៃអាទិត្យនេះ។ បើតាម លោក ឃួង ស្រេង អភិបាលរងរាជធានីភ្នំពេញ ការសម្រេចបង្កើតក្រុមការងារនេះ គឺបន្ទាប់ពីមានការស្នើសុំពីប្អូនប្រុសសព លោក កែម ឡី និងដើម្បីរក្សាសណ្តាប់ធ្នាប់ក្នុងក្រុង ក្នុងនាមជាអាជ្ញាធរដែនដី។

សាលារាជធានីភ្នំពេញសម្រេចបង្កើតក្រុមការងារមួយ ដើម្បីសម្រួលដល់ការដង្ហែសព លោក កែម ឡី ទៅកាន់ខេត្តតាកែវ នៅព្រឹកថ្ងៃអាទិត្យនេះ។ តាមគម្រោង សពលោក កែម ឡី នឹងដង្ហែចេញពី វត្តវត្តពោធិយារាម ហៅវត្តចាស់ ស្ថិតនៅខណ្ឌជ្រោយចង្វារ រាជធានីភ្នំពេញ មុខព្រះរបមរាជវាំង ទៅកាន់ភូមិអង្គតាកុប ឃុំលាយបូរ ស្រុកត្រាំកក់ ខេត្តតាកែវ នៅព្រឹកថ្ងៃទី១៧ ខែកក្កដា។

លោក ឃួង ស្រេង អភិបាលរងរាជធានីភ្នំពេញ បានបញ្ជាក់ប្រាប់សារព័ត៌មានថ្មីៗនៅថ្ងៃសុក្រនេះថា រូបលោកផ្ទាល់ គឺជាប្រធានក្រុមការងារ ដែលនឹងជួបប្រជុំជាមួយអ្នកពាក់ព័ន្ធនៅរសៀលនេះ។ លោក ឃួង ស្រេង ដែលជាអ្នកនាំពាក្យសាលារាជធានីភ្នំពេញផងនោះ បានបញ្ជាក់បន្ថែមយ៉ាងដូច្នេះ៖« យើងនឹងប្រជុំនៅម៉ោង៣រសៀលនេះ ជាមួយកម្លាំងនគរបាល និងមន្ត្រីកងរាជអាវុធហត្ថ អាជ្ញាធរខណ្ឌ និងសាច់ញាតិរបស់សព ក៏យើងអញ្ជើញឲ្យមកចូលរួមប្រជុំដែរ ដើម្បីជជែកពីការងារហែរសព។ ចំនួនកម្លាំងនគរបាល និងបែងចែកតាមគោលដៅនានានៅតាមផ្លូវដែលសពត្រូវហែរកាត់ យើងក៏កំណត់នៅល្ងាចនេះដែរ»។

បើតាមលោកអភិបាលរងរាជធានីភ្នំពេញ មានហេតុផលចំនួន២ ដែលសាលារាជធានីភ្នំពេញ យល់ព្រមបង្កើតក្រុមការងារនេះ ទី១. មានការពឹងពាក់ពីក្រុមគ្រួសារសព និងទី២.ដើម្បីរក្សាសណ្តាប់ធ្នាប់ និងរបៀបរៀបរយសាធារណៈក្នុងក្រុង ក្នុងនាមជាអាជ្ញាធរដែនដី។

ទន្ទឹមនឹងការថ្លែងបញ្ជាក់ពីហេតុផលទាំង២នេះ លោក ឃួង ស្រេង ក៏ស្នើឲ្យអ្នកដែលនឹងចូលរួមដង្ហែសពតាមបែបសាសនា នៅថ្ងៃអាទិត្យខាងមុខនេះ ចូលរួមរក្សាសណ្តាប់ធ្នាប់ឲ្យបានល្អ ចៀសវាងកុំឲ្យមានការរំខានណាមួយកើតឡើង ដើម្បីឲ្យសពលោក កែម ឡី បានស្ងប់។

សូមបញ្ជាក់ថា លោក កែម ឡី ត្រូវបានខ្មាន់កាំភ្លើង បាញ់សម្លាប់នៅព្រឹកថ្ងៃទី១០ ខែកក្កដា នៅក្នុងម៉ាតមួយ ក្បែរស្តុបបូកគោ រាជធានីភ្នំពេញ។ សពលោក កែម ឡី ត្រូវបានយកទៅតម្កល់នៅវត្តពោធិយារាម ហៅវត្តចាស់ ស្ថិតនៅខណ្ឌជ្រោយចង្វារ រាជធានីភ្នំពេញ៕