ព័ត៍មានសុខភាព
×![]()
ដោយ: ថ្មីៗ
ការរួមភេទ គឺជាមធ្យោបាយដ៏អស្ចារ្យមួយ ក្នុងការកាត់បន្ថយស្ត្រេស និងការថប់បារម្ភ។ ប៉ុន្តែ ករណីប្រព្រឹតិ្តរឿងនេះច្រើនពេក អាចបណ្តាលឲ្យមានការបង្ករោគនៅផ្លូវទឹកម៉ូត និងហើម ឬឈឺចាប់ប្រដាប់ភេទរបស់ស្ត្រី និងមានបញ្ហាផ្សេងៗទៀតលើបុរសដែរ។ ការរួមភេទច្រើនពេក អាចបណ្តាលឲ្យវិលមុខ អស់កម្លាំង ឈឺសាច់ដុំ ខ្សោះជាតិទឹក របួសដល់សរសៃប្រសាទ និងអាចគាំងបេះដូង លើមនុស្សប្រុសបានទៀតផង។ 
ការរួមភេទដែលត្រឹមត្រូវ គឺជាផ្នែកមួយដ៏សំខាន់ នៃជីវិតប្រកបដោយសុខភាពល្អ។ ខណៈពេលដែលវិទ្យាសាស្ត្រណែនាំថា ការរួមភេទអាចពង្រឹងដល់សុខភាពផ្លូវចិត្ត និងកាត់បន្ថយការថប់បារម្ភ តាមរយៈការកាត់បន្ថយ ការបញ្ជូនសញ្ញាស្ត្រេសទៅខួរក្បាល។ យ៉ាងណាមិញ ការរួមភេទច្រើនពេក ពិតជាអាចមានផលរំខានច្រើន ដល់សុខភាពមនុស្សយើងដែរ។
សម្រាប់ស្ត្រី
ការបង្ករោគនៅផ្លូវទឹកម៉ូត
នៅពេលស្ត្រីរួមភេទ បាក់តេរីដែលចេញពីទ្វារមាស អាចចូលទៅក្នុងបង្ហួរនោម ហើយធ្វើដំណើរទៅក្នុងប្លោកនោមបាន។ ដូច្នេះ រឿងនេះអាចនឹងកើតមានច្រើន នៅពេលអ្នករួមភេទច្រើនដង ក្នុងរយៈពេលខ្លីមួយ ហើយក៏អាចងាយមានការបង្ករោគនៅផ្លូវទឹកម៉ូតកាន់តែខ្លាំងដែរ។
ហើម និងឈឺចាប់
ការដែលមានអារម្មណ៍ឈឺចាប់ និងហើម អាចជារឿងមិនធម្មតាមួយ សម្រាប់មនុស្សស្រី។ ពេលខ្លះ អ្នកអាចមានបញ្ហា ក្នុងការបញ្ចេញទឹករំអិលក្នុងពេលរួមភេទ។ បើសិនជាអញ្ជឹងមែន រាល់ពេលរួមភេទម្តងៗ អ្នកអាចប្រឈមខ្លាំង នឹងការដាច់ដោច ឬកកិតខ្លាំងក្នុងទ្វារមាស ព្រមទាំងរួមភេទកាន់តែពិបាក ជាពិសេស ពេលស៊កបញ្ចូលលិង្គតែម្តង។
សម្រាប់បុរស
បុរសដែលមានទម្លាប់រួមភេទទាំងបង្ខំនោះ គឺងាយនឹងរងការខូចខាត លើលិង្គរបស់គេណាស់។ ជាលិកាលិង្គអាចរងការខូចខាត ដោយសារតែប្រើប្រាស់វាច្រើនពេក ក្នុងពេលរួមភេទ។ ករណីខ្លះ វាអាចនឹងខូចខាត ដោយមិនងាយឡើងរឹងបានតែម្តង។
តាមការស្រាវជ្រាវ ចំនួនពេលវេលាដែលល្អបំផុត សម្រាប់ការរួមភេទ ប្រកបដោយសុខភាពនោះ គឺគួរតែរួមភេទចំនួន ៣ ទៅ ៤ ដងបានហើយក្នុងមួយសប្តាហ៍៕
ផ្តល់សិទ្ធិដោយ www.health.com.kh
© រក្សាសិទ្ធិដោយ thmeythmey.com
«នាំអាត» និង«នាំអាទិ៍»មួយណាត្រឹមត្រូវ?
1 សប្តាហ៍
