ជាតិ
នយោបាយជាតិ
×![]()
ដោយ: ម៉ៅ សុផា
ក្រោយពីបើកកិច្ចប្រជុំគណៈកម្មាធិការអចិន្ត្រៃយ៍ ទាក់ទងនឹងការបកស្រាយលើអភ័យឯកសិទ្ធិតំណាងរាស្ត្រនោះ រដ្ឋសភា មិនទាន់សម្រេចដកអភ័យឯកសិទ្ធិតំណាងរាស្ត្រគណបក្សសង្គ្រោះជាតិឡើយ ។ រដ្ឋសភាសម្រេចបន្តតាមដានករណីតំណាងរាស្ត្រគណបក្សសង្គ្រោះជាតិទាំងពីររូប ដែលពាក់ព័ន្ធអំពើសញ្ចារកម្ម ។
តំណាងរាស្ត្រគណបក្សសង្គ្រោះជាតិ លោក តុ វ៉ាន់ចាន់ និងលោក ពិន រតនា ត្រូវបានតុលាការចេញដីកាកោះចំនួន២លើកមកហើយ ដើម្បីឲ្យចូលបំភ្លឺជុំវិញអំពើសញ្ចារកម្ម ដែលពាក់ព័ន្ធនឹង កញ្ញា ខុម ចាន់តារ៉ាទី ហៅស្រីមុំ។ ប៉ុន្តែលោក តុ វ៉ាន់ចាន់ និងលោក ពិន រតនា បានបដិសេធមិនបង្ហាញខ្លួនទាំង២លើក ដោយសំអាងលើអភ័យសិទ្ធិរបស់ខ្លួនក្នុងនាមជាតំណាងរាស្ត្រ។
ថ្លែងនៅក្នុងសន្និសីទកាសែតព្រឹកនេះអ្នកនាំពាក្យរដ្ឋសភាលោក ឡេង ប៉េងឡុង បានបញ្ជាក់ថា ករណីដកអភ័យឯកសិទ្ធិតំណាងរាស្ត្របក្សប្រឆាំងពីររូប គឺលោក តុ វ៉ានចាន់ និងលោក ពិន រតនា នោះរដ្ឋសភា មិនទាន់មានការសម្រេចដកនៅឡើយទេ ដោយរដ្ឋសភា បង្វិលរឿងនេះទៅកាន់គណៈកម្មការទី៦នៃរដ្ឋសភា ជាអ្នកត្រួតពិនិត្យនឹងសិក្សាបន្ថែមទៀត លើករណីតំណាងរាស្ត្រទាំងពីររូបនេះ។
បើតាមលោក ឡេង ប៉េងឡុង រដ្ឋសភានឹងដាក់លិខិតបញ្ជូនទៅកាន់យុត្តិធម៌វិញ ដើម្បីប្រាប់ក្រសួងយុត្តិធម៌ថា រដ្ឋសភាមិនទាន់អាចប្រជុំដកអភ័យឯកសិទ្ធិតំណាងរាស្ត្រទាំងពីររូបនេះឡើយ ព្រោះរដ្ឋសភាកំពុងស្ថិតនៅក្នុងពេលឈប់សម្រាក។
នៅព្រឹកនេះតំណាងរាស្ត្រគណបក្សសង្គ្រោះជាតិ២រូប គឺលោក អេង ឆៃអ៊ាង និងលោក យ៉ែម បុញ្ញឫទ្ធិ ក៏បានចូលរួមប្រជុំគណៈកម្មាធិការអចិន្ត្រៃយ៍រដ្ឋសភា ដើម្បីស្ដាប់និងចូលរួមបកស្រាយលើមាត្រា៨០ នៃរដ្ឋធម្មនុញ្ញ ស្តីពីអភ័យឯកសិទ្ធិតំណាងរាស្ត្រនេះដែរ។
កាលពីថ្ងៃទី ៣០ ខែមិថុនា ឆ្នាំ២០១៦ លោក អង្គ វង្សវឌ្ឍនា រដ្ឋមន្ត្រីក្រសួងយុត្តិធម៌ បានដាក់លិខិតជូនសម្តេច ហេង សំរិន ប្រធានរដ្ឋសភា ដើម្បីសុំឲ្យរដ្ឋសភាលើកអភ័យឯកសិទ្ធិ ក្នុងគោលបំណងបើកដៃឲ្យតុលាការបន្តនីតិវិធីលើតំណាងរាស្ត្រទាំង២រូបនេះ ដែលជាប់សង្ស័យនឹងអំពើសញ្ចារកម្ម។
មាត្រា ៩ នៃច្បាប់លក្ខន្តិកៈតំណាងរាស្ត្រ បានចែងថា ការលើកអភ័យឯកសិទ្ធិរបស់សមាជិកសភាណាម្នាក់ ត្រូវមានការអនុម័តតាមមតិភាគច្រើន ពីរ ភាគបី នៃចំនួនសមាជិករដ្ឋសភាទាំងមូល។ ការអនុម័តដោយសមាជិករដ្ឋសភា ២ ភាគ ៣ គឺស្មើនឹងសមាជិកសភា ៨៣ រូបគាំទ្រ ឬអនុម័តឡើងទៅ ទើបអាចលើកអភ័យឯកសិទ្ធិតំណាងរាស្ត្រណាមួយបាន៕
Tag:
CNRP
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 3 ថ្ងៃ
