ក្នុងសិក្ខាសាលាស្តីពីស្ត្រីនិងកីឡាថ្នាក់ជាតិប្រចាំឆ្នាំ២០១៦នៅសណ្ឋាគារសុខាល័យអូតែលក្នុងទីរួមខេត្តសៀមរាប កាលពីម្សិលមិញ អ្នកស្ត្រី ម៉ក់ វណ្ណស៊ីថា ប្រធានគណៈកម្មការស្ត្រី និងកីឡាកម្ពុជាបានបញ្ជាក់ថា ចំនួនស្ត្រីជាកីឡាបច្ចុប្បន្នមិនទាន់ឆ្លើយតបទៅនឹងតម្រូវការរបស់ផែនការមេស៊ីហ្គេមលើកទី៣២ ឆ្នាំ២០២៣ ដែលកម្ពុជានឹងធ្វើជាម្ចាស់ផ្ទះនោះទេ។
ប្រធានគណៈកម្មការស្ត្រី និងកីឡាកម្ពុជាបានចាត់ទុកចំនួនស្ត្រីជាកីឡាបច្ចុប្បន្នហាក់ដូចជាមិនទាន់ឆ្លើយតបទៅនឹងតម្រូវការដែលកម្ពុជាត្រូវការសម្រាប់ត្រៀមរៀបចំធ្វើជាម្ចាស់ផ្ទះស៊ីហ្គេមលើកទី៣២ ឆ្នាំ២០២៣ នោះទេ។ ការខ្វះចំនួនស្ត្រីក្នុងវិស័យនេះដោយសារស្ត្រីមួយចំនួននូវប្រកាន់ភ្ជាប់ទំនៀបទំលាប់ប្រពៃណី ម្យ៉ាងទៀតដោយសារកង្វះការផ្សព្វផ្សាយឲ្យបានទូលំទូលាយនូវសកម្មភាពកីឡា និងអត្ថប្រយោជន៍នៃកីឡាដល់ពួកគេទាំងនោះ។
អ្នកស្រី ម៉ក់ វណ្ណស៊ីថា ប្រធានគណៈកម្មការស្ត្រី និងកីឡាកម្ពុជាបានបញ្ជាក់ដូច្នេះថា៖បើទាក់ទងទៅនឹងទំនៀបទំលាប់ប្រពៃណីរបស់យើងចំនួនស្ត្រីជាកីឡានៅមិនទាន់សមស្របទៅនឹងតម្រូវការដែលយើងរៀបចំផែនការអនាគតសម្រាប់កីឡាស៊ីហ្គេមនៅឆ្នាំ២០២៣ ដែលរៀបចំនៅប្រទេសយើងនោះទេ»។
ដើម្បីឲ្យចំនួនស្ត្រីឆ្លើយតបទៅនឹងតម្រូវការនេះបានប្រធានគណៈកម្មការស្ត្រី និងកីឡារូបនេះបានបន្តទៀតថា៖«ដើម្បីឲ្យតម្រូវការនេះឆ្លើយតបទៅបានទាល់តែយើងអនុវត្តន៍តួនាទីការងារបណ្តុះបណ្តាលផ្សព្វផ្សាយ និងជំរុញឲ្យការងារទាំងអស់ដែលពាក់ព័ន្ធនឹងកីឡាគ្រប់ប្រភេទសម្រាប់ឆ្ពោះទៅរកផែនការមេស៊ីហ្គេមរបស់គណៈកម្មាធិការជាតិអូឡាំពិកកម្ពុជា»។
ពាក់ព័ន្ធទៅនឹងយុទ្ធសាស្ត្រនេះមិនត្រឹមតែអនុវត្តន៍ក្នុងផែនការស្ត្រីជាកីឡាប៉ុណ្ណោះទេ គឺត្រូវអនុវត្តន៍គ្រប់ប្រភេទកីឡាទាំងអស់។ ម្យ៉ាងទៀតគ្រប់ប្រទេសកីឡា និងគ្រប់ស្ថាប័ន្ធជំនាញដែលពាក់ព័ន្ធទាំងអស់ត្រូវតែមានការរួបរួមគ្នា សហការគ្នាក្នុងអនុវត្តផែកការមេដែលកំណត់ដោយរាជរដ្ឋាភិបាលកម្ពុជាប្រកបដោយសិទ្ធភាពខ្ពស់។
ដើម្បីឲ្យផែនការទាំងនោះទទួលបានជោគជ័យក្នុងនាមជាប្រធានគណៈកម្មការស្ត្រី និងកីឡាអ្នកស្រី ម៉ក់ វណ្ណស៊ីថា បាននឹងកំពុងរៀបចំយុទ្ធសាស្ត្រធ្វើយ៉ាងណាឲ្យអ្នកដឹកនាំកីឡាស្ត្រី និងអ្នកពាក់ព័ន្ធកីឡាស្ត្រីទាំងអស់មានផែនការច្បាស់លាស់តាំងពីថ្នាក់ក្រោមរហូតដក់ថ្នាក់លើទាំងផ្នែកឯកជន និងរដ្ឋ។ ជាពិសេសត្រូវជំរុញឲ្យស្ថាប័នកីឡាទាំងអស់ធ្វើការផ្សព្វផ្សាយ និងជំរុញលើកទឹកចិត្តដល់ស្ត្រីឲ្យចូលរួមលេងកីឡាឲ្យកាន់តែច្រើន ដើម្បីងាយស្រួលក្នុងការចម្រាញ់ជ្រើសរើសអ្នកដែលមានសមត្ថភាព ជំនាញ និងទេពកោសល្យ។
ជាមួយគ្នានេះ លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជាបានឲ្យដឹងថា គណៈកម្មាធិការអូឡាំពិកអន្តរជាតិជំរុញឲ្យកម្ពុជាយ៉ាងហោចណាស់ចាប់ពីឆ្នាំ២០១៧នេះតទៅមានថ្នាកដឹកនាំជាស្ត្រីដែលបម្រើការងារជាកក្នុងវិស័យកីឡាយ៉ាងតិចចាប់ពី២០ភាគរយទៅ៣០ភាគរយ។
លោកអគ្គលេខាធិការនៃគណៈកម្មាធិការជាតិអូឡាំពិកកម្ពុជាបានរៀបរាប់ថា សិក្ខាសាលាស្តីពីស្ត្រី និងកីឡាដែលប្រព្រឹត្តទៅរយៈពេល៣ថ្ងៃនៅទីរួមខេត្តសៀមរាបដោយមានអ្នកស្រី Beng Choo Low អគ្គលេខាធិការក្រុមប្រឹក្សាអូឡាំពិកអាស៊ី ជាគ្រូឧទ្ទេស និងវាគ្មិននេះក្នុងគោលបំណង ដើម្បីឲ្យស្ត្រីកម្ពុជាយល់ដឹងពីតួនាទី និងការដឹកនាំរបស់ស្ត្រីក្នុងវិស័យកីឡា ជាពិសេសដើម្បីស្ត្រីកម្ពុជាដែលរួមសិក្ខាសាលាទាំងនោះបានដឹងពីយុទ្ធសាស្ត្រក្នុងការដឹកនាំចលនាស្ត្រីនិងកីឡានៅកម្ពុជាទទួលបានជោគជ័យខ្ពស់។
សម្រាប់ការរៀបចំសិក្ខាសាលាស្តីពីស្ត្រី និងកីឡាថ្នាក់ជាតិលើកទី៣នៅទីរួមខេត្តសៀមរាបនេះកម្ពុជាទទួលបានផលចំណេញជាច្រើន គឺស្ត្រីជាកីឡាទទួលបានការបណ្តុះបណ្តាលពីចលនាស្រី្ត និងកីឡា ជាពិសេសផ្តល់ផលចំណេញដល់អ្នករស់នៅក្នុងខេត្តសៀមរាប ព្រោះខេត្តនេះសម្បូរទៅដោយចលនាកីឡាជាពិសេសកីឡាបែបទេសចរណ៍ ដូច្នេះពួកគេនឹងយកចំណេះដឹងដែលបានមកពីការបណ្តុះបណ្តាលមកអនុវត្តន៍នៅទីនេះតែម្តង។
ជាមួយគ្នាវាជួយជំរុញឲ្យទំនាក់ទំនងមិត្តភាពរវាងកម្ពុជា និងអន្តរជាតិឲ្យកាន់តែជិតស្និទ្ធថែមទៀង តាមរយៈទំនាក់ទំនងនេះធ្វើឲ្យអន្តរជាតិដឹងពីកិច្ចខិតខំប្រឹងប្រែង ក៏ដូចជាចលនាក្នុងការបណ្តុះបណ្តាលស្ត្រីជាកីឡានៅក្នុងចលនាអូឡាំពិកកម្ពុជា។ ម្យ៉ាងទៀតវាជួយឲ្យមានសាមគ្គីភាព និងទំនាក់ទំនងផ្ទៃក្នុងល្អរវាងថ្នាក់ដឹកនាំកីឡាជាស្ត្រី ហើយវាជួយពង្រឹងសមត្ថភាពរបស់ស្ត្រី ឲ្យមានលក្ខណៈស្មើនឹងបុរសផងដែរ។
គួរបញ្ចាក់ថា សិក្ខាសាលាថ្នាក់ជាតិលើកទី៣ស្តីពីស្ត្រី និងកីឡាដែលធ្វើនៅទីរួមខេត្តរាបមានសិក្ខាកាមចូលរួមទាំងអស់ចំនួន៣៥នាក់ ដែលភាគច្រើនមកពីភ្នំពេញ និងខេត្តសៀមរាប។ ថ្ងៃនេះជាថ្ងៃទី២ហើយសម្រាប់សិក្ខាសាលានេះ ពោលគឺចាប់ផ្តើមតាំងពីថ្ងៃទី១៨ ហើយនឹងបញ្ចប់នៅថ្ងៃទី២០ ខែកក្កដា ស្អែកនេះ៕
រូបថតទាំងអស់ផ្តល់សិទ្ធិផ្សាយដោយ Shing Long