កីឡាជាតិ
ជាតិ
វៀតណាមខ្លាំង ប៉ុន្តែតំណាងគ្រូទីម័រខាងកើតមានជំនឿលើកម្ពុជាដែលបានកម្លាំងចិត្តពីអ្នកគាំទ្រ នេះ-លោក-Amandio-Sarmento-តំណាងគ្រូបង្វឹក-និងជាអគ្គលេខាធិការសហព័ន្ធកីឡាបាល់ទាត់ទីម័រខាងកើត
×
ក្រុមកីឡាបាល់ទាត់យុវជនជម្រើសជាតិអាយុក្រោម១៦ឆ្នាំកម្ពុជា នឹងត្រូវជួបប្រកួតជាមួយក្រុមជើងខ្លាំងយុវជនជម្រើសជាតិវៀតណាមនាថ្ងៃទី២១ ខែកក្កដា ស្អែកនេះសម្រាប់ការប្រកួតវគ្គពាក់កណ្តាលផ្តាច់ព្រ័ត្រ AFF U-16 Championship 2016 ក្រោយយកឈ្នះក្រុមយុវជនជម្រើសជាតិទីម័រខាងកើត ៣-០ នៅក្នុងពហុកីឡដ្ឋានជាតិ។ សម្រាប់ជំនួបនេះ លោក Amandio Sarmento តំណាងគ្រូបង្វឹក និងជាអគ្គលេខាធិការសហព័ន្ធកីឡាបាល់ទាត់ទីម័រខាងកើត ទទួលស្គាល់ថា វៀតណាមជាក្រុមខ្លាំង ប៉ុន្តែលោកមានជំនឿថា ក្រុមអ្នកគាំទ្រដែលជាកីឡាករទី១២ នឹងជំរុញឲ្យក្រុមម្ចាស់ផ្ទះបានជោគជ័យ។
នាសន្និសីទសារព័ត៌មានក្រោយបញ្ចប់ការប្រកួតរវាងក្រុមកម្ពុជា និងទីម័រខាងខាងកើត លោក Amandio Sarmento បានគូសបញ្ជាក់ថា៖«ខ្ញុំគិតថាជាទូទៅក្រុមកម្ពុជាលេងបានល្អ ហើយកម្ពុជាមានកីឡាករទី១២ គឺអ្នកគាំទ្រដ៏ច្រើន។ ហើយអ្វីដែលសំខាន់នៅពេលនេះក្រុមកម្ពុជាមានឆន្ទៈខ្លាំង ជាពិសេសអ្វីដែលកម្ពុជាត្រូវការបំផុតនោះគឺទស្សនិកជនគាំទ្រឲ្យច្រើនជាងនេះទៀត នេះជាមូលហេតុដែលអាចធ្វើឲ្យក្រុមកម្ពុជាយកឈ្នះលើក្រុមវៀតណាមបាន»។
តំណាងថ្នាក់ដឹកនាំក្រុមទីម័រខាងកើត ក៏បានលើកឡើងថា ក្រុមយុវជនជម្រើសជាតិវៀតណាមគឺជាក្រុមខ្លាំងមួយផងដែរនៅក្នុងតំបន់ ប៉ុន្តែលោកជឿជាក់យ៉ាងមុតមាំថា ក្រុមកម្ពុជាពិតជាអាចយកឈ្នះលើលើក្រុមយុវជនជម្រើសជាតិវៀតណាមបាន ព្រោះកម្ពុជាជាក្រុមមួយដែលមានទម្រង់លេងល្អ និងមានឆន្ទៈ ជាពិសេសមានអ្នកគាំទ្រច្រើន។
ជាមួយគ្នានេះ លោក Inoue Kazunori គ្រូបង្វឹករបស់ក្រុមយុវជនជម្រើសជាតិកម្ពុជាបានទទួលស្គាល់ថា ក្រុមយុវជនជម្រើសជាតិវៀតណាមគឺជាក្រុមខ្លាំងមួយ ហើយលោកបានមើលពីទម្រង់លេងរបស់ក្រុមនេះរួចហើយ ប៉ុន្តែលោកមិនអាចសន្មត់ថានឹងអាចយកឈ្នះ ឬចាញ់នោះទេ ដោយលោកគ្រាន់តែបញ្ជាក់ថា មហិច្ឆតារបស់លោកមិនត្រឹមតែឈានដល់វគ្គពាក់កណ្តាលប៉ុណ្ណោះទេ គឺលើសពីនេះ។
គួរបញ្ជាក់ថា សម្រាប់ការប្រកួតកាលយប់មិញក្រុមយុវជនជម្រើសជាតិកម្ពុជា បានយកឈ្នះក្រុមយុវជនជម្រើសជាតិទីម័រខាងកើក្នុងលទ្ធផល ៣-០ ជ័យជម្នះនេះសម្រេចដោយកីឡា យ៉ើ សាហ្វី ដោយការទាត់ប៉េណាល់ទីមួយគ្រាប់នៅនាទី៦ ខណៈពេលបាល់ប៉ះដៃទីម័រខាងកើតក្នុងតំបន់ប៉េណាល់ទី និងកីឡាករ ម៉ៅ ពិសិដ្ឋ ខ្សែប្រយុទ្ធរបស់ក្លិបភ្នំពេញក្រោនរបស់បាន២គ្រាប់ម្នាក់ឯងនៅនាទី៥៥ និង៥៩។
កីឡាករ ម៉ៅ ពិសិដ្ឋ ដែលបានដូរចេញដោយសាររបួសជំនួសដោយកីឡាករ សាន សុភក្ត្រា នៅនាទីទី៧៧ បានបញ្ជាក់សន្និសីទសារព័ត៌មានក្រោយបញ្ចប់ការប្រកួតថា រូបគេពិតមានអារម្មណ៍សប្បាយរីករាយណាស់ដែលរកបាន២គ្រាប់ក្នុងជម្រើសទី១របស់ខ្លួន។ ហើយការរកគ្រាប់បាល់នេះមិនមែនជាការចៃដន្យនោះទេ គឺជាការខិតខំប្រឹងប្រែងរបស់គេ។
សម្រាប់ការប្រកួតក្នុងវគ្គពាក់កណ្តាលផ្តាច់ព្រ័ត្រដែលនឹងប្រព្រឹត្តទៅនៅក្នុងពហុកីឡដ្ឋានជាតិថ្ងៃទី២១ ខែកក្កដា ក្រុមយុវជនជម្រើសជាតិកម្ពុជាត្រូវជួបប្រកួតជាមួយក្រុមយុវជនជម្រើសជាតិវៀតណាម ចំណែកក្រុមយុវជនជម្រើសជាតិថៃ ជួបប្រកួតជាមួយក្រុមជម្រើសជាតិអូស្ត្រាលី៕
Tag:
U16កម្ពុជា
AFF U16
© រក្សាសិទ្ធិដោយ thmeythmey.com