កីឡាជាតិ
ជាតិ
AFF U16៖ តើកម្ពុជាអាចទម្លាក់វៀតណាមដើម្បីបន្តទៅវគ្គផ្តាច់ព្រ័ត្របានដែរឬទេ?
×![]()
ក្រុមកីឡាបាល់ទាត់ជម្រើសជាតិអាយុក្រោម១៦ឆ្នាំកម្ពុជា មានឱកាសបង្ហាញខ្លួនជាលើកដំបូងនៅវគ្គពាក់កណ្តាលផ្តាច់ព្រ័ត្រនៃព្រឹត្តិការណ៍ AFF U16 Championship បើគិតចាប់តាំងពីឆ្នាំ២០០២ មក។ នៅពហុកីឡដ្ឋានជាតិនាល្ងាចថ្ងៃព្រហស្បតិ៍នេះ ម្ចាស់ផ្ទះកម្ពុជាត្រូវតទល់ជាមួយវៀតណាមដែលជាម្ចាស់ជើងឯកពីរជំនាន់ បន្ទាប់ពីជំនួបរវាងថៃ និងអូស្ត្រាលី។
គ្រូបង្វឹកជនជាតិជប៉ុន Inoue Kazunori បានបង្កើតកំណត់ត្រាថ្មីសម្រាប់ក្រុម U16 កម្ពុជាក្នុងព្រឹត្តិការណ៍ AFF U16 Championship ឆ្នាំ២០១៦ នេះ ដោយនាំក្រុមឈានមកវគ្គពាក់កណ្តាលផ្តាច់ព្រ័ត្រជាលើកដំបូងក្នុងចំណោមការបង្ហាញខ្លួន៧លើក បើគិតចាប់តាំងពីឆ្នាំ២០០២ មក។
នៅក្នុងពូល B កម្ពុជាដែលបានធ្វើជាម្ចាស់ផ្ទះលើកទីបី បានយកឈ្នះឡាវ ៣-១ ឈ្នះព្រុយណេ ២-០ ឈ្នះទីម័រខាងកើត ៣-០ តែចាញ់ថៃរហូតដល់ទៅ ៦-០ ។ ទោះបីជាយ៉ាងណាក៏ដោយ U16 កម្ពុជា មានប្រវត្តិឈ្នះលើសពី១ប្រកួតជាលើកដំបូងក្នុងការប្រកួតជម្រុះតាមពូលនៃព្រឹត្តិការណ៍ប្រចាំតំបន់នេះ។
សម្រាប់ក្រុមវៀតណាម ពួកគេបានឈានមកវគ្គចំនួន៥លើករួចមកហើយ ដែលក្នុងនោះ ពួកគេបានឈានទៅឈ្នះតំណែងជើងឯកចំនួន២លើក គឺនៅឆ្នាំ២០០៦នៅទឹកដីរបស់ខ្លួន និងឆ្នាំ២០១០ នៅឥណ្ឌូនេស៊ី។
នៅក្នុងការប្រកួតវគ្គជម្រុះតាមពូលកន្លងមក ក្រុមទាំងពីរបានបញ្ចប់លទ្ធផលស្មើ ២-២ នៅឆ្នាំ២០០៥ ហើយវៀតណាម បានឈ្នះ ៤-១ នៅឆ្នាំ២០១១ និងបន្តឈ្នះ ៦-០ នៅឆ្នាំ២០១៣ ។ កាលពីឆ្នាំមុន ក្រុមទាំងពីរសុទ្ធតែបានហាលអាវនៅវគ្គជម្រុះតាមពូល ដោយកម្ពុជាដែលជាម្ចាស់ផ្ទះផងដែរនោះ ទទួលបានត្រឹមចំណាត់ថ្នាក់លេខ៤នៅក្នុងពូល B រីឯវៀតណាម ជាប់លេខ៤ពូល A។
លោក Kazunori បានអះអាងប្រាប់អ្នកសារព័ត៌មានថា អ្នកគាំទ្រគឺជាកម្លាំងចិត្តដ៏សំខាន់សម្រាប់ជ័យជម្នះរបស់ក្រុម ហើយលោកនិយាយថា ជំហានរបស់កម្ពុជាមិនមែនត្រឹមតែវគ្គពាក់កណ្តាលផ្តាច់ព្រ័ត្រនោះឡើយ។ វៀតណាមគឺជាក្រុមខ្លាំង ប៉ុន្តែគ្រូបង្វឹកជនជាតិជប៉ុនដែលបណ្តុះស្មារតីយុវជនឲ្យបើកការប្រយុទ្ធរូបនេះ មានជំនឿថា កំណត់ត្រាថ្មីនឹងបន្តកើតមានសម្រាប់ U16 កម្ពុជា។
នៅមុនជំនួបរវាងម្ចាស់ផ្ទះកម្ពុជា និងវៀតណាម ម្ចាស់ការពារតំណែងជើងឯកថៃ ត្រូវតទល់ជាមួយអូស្ត្រាលី ម្ចាស់ជើងឯកឆ្នាំ២០០៨ ។ នេះជាការជួបគ្នាពីរឆ្នាំជាប់គ្នារបស់ក្រុមខ្លាំងទាំងពីរ ដោយកាលពីឆ្នាំមុន ថៃ បានឈ្នះអូស្ត្រាលី ៣-២ ហើយបន្តឈ្នះមីយ៉ាន់ម៉ា ៣-០ នៅវគ្គផ្តាច់ព្រ័ត្រ ខណៈអូស្ត្រាលីស៊ីឡាវ ១០-២ សម្រាប់តំណែងលេខ៣ ៕
កម្មវិធីប្រកួតនៅពហុកីឡដ្ឋានជាតិអូឡាំពិក៖
-ម៉ោង៣ និង៣០នាទី៖ ថៃ ជួប អូស្ត្រាលី
-ម៉ោង៦ និង៣០នាទី៖ វៀតណាម ជួប កម្ពុជា៕
Tag:
AFF U16
U16 Cambodia
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 4 ថ្ងៃ
