ប្រធានាធិបតីតួកគី ប្រកាសដាក់ប្រទេសក្នុងស្ថានភាពអាសន្នរយៈពេលបីខែ

អន្តរជាតិ

ប្រធានាធិបតីតួកគី ប្រកាសដាក់ប្រទេសក្នុងស្ថានភាពអាសន្នរយៈពេលបីខែ

21, Jul 2016 , 7:39 pm

រូបភាព

ដោយ: តន ចាន់រិទ្ធារ៉ា

ប្រធានាធិបតីតួកគី បានប្រកាសដាក់ប្រទេសក្នុងស្ថានភាពអាសន្នរយៈពេលបីខែ ជាការឆ្លើយតបនឹងការប៉ុនប៉ងធ្វើរដ្ឋប្រហារមិនបានសម្រេច កាលពីថ្ងៃទី១៥ ខែកក្ដដា។ ជាមួយការប្រកាសនេះ រដ្ឋាភិបាលតួកគី នឹងមានអំណាចកាន់តែច្រើនបន្ថែមទៀត ដែលអាចកម្រិតសិទ្ធិសេរីភាពប្រជាជន និងអនុវត្តច្បាប់ផ្សេងៗដោយមិនចាំបាច់ឆ្លងសភា ខណៈការបោសសម្អាត កំពុងបន្តធ្វើយ៉ាងសស្រាក់សស្រាំ។

សូមស្ដាប់ព័ត៌មានលម្អិត៖

ក្នុងសេចក្ដីថ្លែងការណ៍តាមទូរទស្សន៍ នៅថ្ងៃទី២០ ខែកក្កដា លោកប្រធានាធិបតី Recep Tayyip Erdogan បានប្រកាសថា តួកគី នឹងត្រូវដាក់ក្នុងស្ថានភាពមានអាសន្នរយៈពេលបីខែ នៅខណៈដែលការវែកមុខរកអ្នកពាក់ព័ន្ធនឹងការប៉ុនប៉ងធ្វើរដ្ឋប្រហារ ត្រូវបានពង្រីកទីគ្រប់កន្លែង និងស្ថាប័នទាំងអស់។ ការសម្រេចចិត្តនេះ ធ្វើឡើងបន្ទាប់ពីលោកErdogan ជួបប្រជុំជាមួយសមាជិកក្រុមប្រឹក្សាសន្តិសុខជាតិរួចមក។

ថ្លែងពីវិមានប្រធានាធិបតីក្នុងរដ្ឋធានីអង់ការ៉ា ប្រធានាធិបតី Erdogan និយាយថា ការដាក់ប្រទេសក្នុងស្ថានភាពអាសន្ន គឺជារឿងចាំបាច់ ដើម្បីបោសសម្អាតឲ្យឆាប់រហ័ស នូវសមាសភាពអង្គការភេរវកម្ម ដែលនៅពីក្រោយការប៉ុនប៉ុងធ្វើរដ្ឋប្រហារ។ លោក បន្ថែមថា រដ្ឋាភិបាលរបស់លោក នឹងមានសិទ្ធិចាត់ការវិធានការចាំបាច់ ប្រឆាំងនឹងអ្នកគាំទ្ររដ្ឋប្រហារ ដូចមានចែងក្នុងរដ្ឋធម្មនុញ្ញ។

លើសពីនេះ ប្រធានាធិបតីតួកគីរូបនេះបញ្ជាក់ដែរថា បញ្ញត្តិថ្មីនេះ មានគោលបំណងតែមួយគត់ គឺទប់ទល់នឹងការគំរាមកំហែងពីភេរវជនចំពោះតួកគី។ បញ្ញត្តីថ្មី នឹងអនុញ្ញតឲ្យរដ្ឋាភិបាល រឹតត្បិតសិទ្ធិសេរីភាពប្រជាជន ប្រសិនបើយល់ឃើញថា មានការចាំបាច់។ ហើយប្រធានាធិបតី និងគណៈរដ្ឋមន្ត្រី ក៏មានសិទ្ធិអនុម័តច្បាប់ដោយមិនចាំបាច់មានការយល់ព្រមពីសភាផងដែរ។

បើតាមទីភ្នាក់ងារព័ត៌មាន Reuters លោក Erdogan ក៏ប្រកាសដែរថា យោធា នឹងត្រូវបោសសម្អាតទៀតផង។ មិនមែនត្រឹមតែមន្ត្រីយោធាទេ មន្ត្រីស៊ីវិល គ្រូបង្រៀនសាកលវិទ្យាល័យ ក៏ស្ថិតក្រោមការចាប់ខ្លួន និងសួរចម្លើយដែរ។ នៅថ្ងៃទី២០ ខែកក្កដាដដែលនោះ អ្នកស្រាវជ្រាវជាតិតួកគីទាំងអស់ ត្រូវហាមឃាត់ចាកចេញពីប្រទេស ដោយមន្ត្រីតួកគីអះអាងថា ជាវិធានការបណ្ដោះអាសន្ន ដើម្បីទប់ស្កាត់អ្នកពាក់ព័ន្ធនឹងរដ្ឋប្រហារ រត់ចេញក្រៅប្រទេស។

នៅមុនការប្រកាសដាក់ប្រទេសក្នុងស្ថានភាពអាសន្នបន្តិច ប្រធានាធិបតី Erdogan និយាយដែរថា ការបោសសម្អាត មិនទាន់បញ្ចប់ទេ ហើយលោកជឿថា មានបរទេស នៅពីក្រោយការប៉ុនប៉ងធ្វើរដ្ឋប្រហារទម្លាក់លោក។ មួយវិញទៀត លោកបានទាត់ចោលការលើកឡើងថា លោកក្លាយជាជនផ្ដាច់ការ ហើយប្រជាធិបតេយ្យតូកគី ស្ថិតក្រោមការគំរាម។ លោកឆ្លើយវិញថា តួកគី នឹងនៅតែអនុវត្តរបបសភានិយម ហើយតួកគី មិនឃ្លាតឆ្ងាយពីផ្លូវនេះទេ៕