កីឡាជាតិ
ជាតិ
កម្ពុជាកំពុងជំរុញសហព័ន្ធអាស៊ី និងពិភពលោកដាក់បញ្ចូលតុងហ្គីលម៉ូដូក្នុងស៊ីហ្គេមឆ្នាំ២០២៣
×
ថ្នាក់ដឹកនាំសហព័ន្ធកីឡាតុងហ្គីលម៉ូដូកម្ពុជាគ្រោងនឹងដាក់បញ្ចូលកីឡាដែលមានដើមកំណើតមកពីប្រទេសកូរ៉េក្នុងការប្រកួតស៊ីហ្គេមលើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះលើកដំបូង ខណៈកីឡាមួយនេះមិនធ្លាប់មានឈ្មោះក្នុងការប្រកួតស៊ីហ្គេមនាពេលកន្លងមក។ នេះបើយោងតាមប្រសាសន៍របស់លោកអគ្គលេខាធិការសហព័ន្ធកីឡាតុងហ្គីលម៉ូដូកម្ពុជានៅក្នុងថ្ងៃចាប់ផ្តើមការប្រកួតកីឡាតុងហ្គីលម៉ូដូជ្រើសរើសជើងឯកថ្នាក់ជាតិប្រចាំឆ្នាំ២០១៦ នាវិមានពហុកីឡាជាតិកាលពីព្រឹកថ្ងៃទី២១ ខែកក្កដា។
ថ្នាក់ដឹកនាំកីឡាតុងហ្គីលម៉ូដូកម្ពុជាបាននឹងកំពុងធ្វើសំណើរសហព័ន្ធកីឡាតុងហ្គីលម៉ូដូអាស៊ី និងពិភពលោក ដើម្បីជួយអន្តរាគមន៍ក្នុងការដាក់ប្រភេទកីឡាដែលមានដើមកំណើតនៅប្រទេសកូរ៉ និងមិនធ្លាប់មានក្នុងការប្រកួតស៊ីហ្គេមនាពេលកន្លងមកមួយនេះក្នុងការប្រកួតស៊ីហ្គេម ឆ្នាំ២០២៣ ដែលកម្ពុជានឹងធ្វើជាម្ចាស់ផ្ទះ។ ទោះបីជាកីឡាមួយនេះមិនទាន់បានចូលក្នុងស៊ីហ្គេមក៏ពិតមែន ប៉ុន្តែតុងហ្គីលម៉ូដូកម្ពុជាបាននិងកំពុងហ្វឹកហាត់ដើម្បីត្រៀមខ្លួនប្រកួតក្នុងព្រឹត្តិការណ៍នេះ។
នាថ្ងៃចាប់ផ្តើមការប្រកួតកីឡាតុងហ្គីលម៉ូដូជ្រើសរើសជើងឯកថ្នាក់ជាតិប្រចាំ២០១៦ នៅក្នុងវិមានពហុកីឡាជាតិកាលពីព្រឹកថ្ងៃទី២១ ខែកក្កដា ឆ្នាំ២០១៦ លោក ចំរើន សុផល អគ្គលេខាធិការសហព័ន្ធកីឡាតុងហ្គីលម៉ូដូកម្ពុជាបានរៀបរាប់ថា៖«សហព័ន្ធកីឡាតុងហ្គីលម៉ូដូមិនទាន់ចូលក្នុងស៊ីហ្គេមនៅឡើយទេ ក៏ប៉ុន្តែយើងគម្រោងនៅក្នុងឆ្នាំ២០២៣ ដែលកម្ពុជានឹងរៀបចំធ្វើជាម្ចាស់ផ្ទះស៊ីហ្គេម យើងនឹងជំរុញសហព័ន្ធតុងហ្គីលម៉ូដូអាស៊ី និងពិភពលោក ដើម្បីជំរុញបន្ថែមឲ្យកីឡាតុងហ្គីលម៉ូដូរបស់យើង និងកីឡាតុងម៉ូដូចូលទៅក្នុងស៊ីហ្គេមឆ្នាំ២០២៣»។
លោកអគ្គលេខាធិការរូបនេះបានបញ្ជាក់ផងដែរថា ប្រសិនតុងហ្គីលម៉ូដូបានចូលក្នុងការប្រកួតស៊ីហ្គេមលើកទី៣២មែននោះវានឹងមានបញ្ហាប្រឈមមួយចំនួនកើនឡើង ដោយសារកម្ពុជាមិនធ្លាប់មានបទពិសោធន៍ចូលរួមក្នុងព្រឹត្តិការណ៍នេះ។ ក៏ប៉ុន្តែលោកជឿជាក់យ៉ាងមុតមាំថា វានឹងមិនមានបញ្ហាអ្វីនោះទេព្រោះមានអ្នកជំនាញមកពីគណៈកម្មាធិការជាតិអូឡាំពិកកម្ពុជា និងអគ្គនាយកដ្ឋានកីឡាកម្ពុជាជួយជ្រោមជ្រែង និងផ្តល់ជាបទពិសោធន៍ តែអ្វីដែលសំខាន់ធ្វើយ៉ាងណាឲ្យបានចូលក្នុងព្រឹត្តិការណ៍នេះជាមុនសិន។
គួរបញ្ជាក់ថា សម្រាប់ការប្រកួតកីឡាតុងហ្គីលម៉ូដូជ្រើសរើសជើងឯកថ្នាក់ជាតិប្រចាំឆ្នាំ២០១៦ មាន១០ក្លិប-សមាគមចូលរួម និងមានកីឡាករកីឡាការិនីសរុបទាំងអស់ជាង១៥០នាក់។ ការប្រកួតប្រព្រឹត្តទៅរយៈពេល៤ថ្ងៃចាប់ពីថ្ងៃទី២១ ដល់ថ្ងៃទី២៤ ខែកក្កដា នៅក្នុងវិមានពហុកីឡដ្ឋានជាតិអូឡាំពិកកម្ពុជា។ ការប្រកួតនេះក៏ជាការប្រកួតមួយសម្រាប់ជាបទពិសោធន៍សម្រាប់ចូលរួមប្រកួតស៊ីហ្គេមផងដែរ ទោះបីបច្ចុប្បន្នកីឡាមួយនេះមិនទាន់ដាក់បញ្ចូលក្នុងស៊ីហ្គេមក៏ដោយ៕
Tag:
តុងហ្គីលម៉ូដូ
ចំរើន សុផល
ជើងឯកថ្នាក់ជាតិ២០១៦
© រក្សាសិទ្ធិដោយ thmeythmey.com