កីឡាជាតិ
ជាតិ
លោក Inoue Kazunori ៖ ខ្ញុំខានស្រក់ទឹកភ្នែកយូរហើយ! ខ្ញុំចង់ឈ្នះមែនទែន!
× លោក Inoue Kazunori គ្រូបង្វឹកក្រុមយុវជនជម្រើសជាតិអាយុក្រោម១៦ឆ្នាំកម្ពុជាបានស្រក់ទឹកភ្នែកបន្ទាប់ពីមិនអាចដឹកនាំក្រុមឡើងទៅកាន់វគ្គផ្តាច់ព្រ័ត្រនៃពានរង្វាន់ AFF U-16 Championship ក្រោយពីចាញ់ក្រុមយុវជនជម្រើសជាតិវៀតណាម ១-០ ក្នុងវគ្គពាក់កណ្តាលផ្តាច់ព្រ័ត្រកាលពីល្ងាចថ្ងៃទី២១ ខែកក្កដា នៅពហុកីឡដ្ឋានជាតិ។ គ្រូបង្វឹកជនជាតិជប៉ុនរូបនេះអះអាងថា តំណក់ទឹកភ្នែករបស់ខ្លួនហូរចេញដោយសារលទ្ធផលមិនដូចអ្វីដែលលោករំពឹងទុក។
បន្ទាប់ពីលទ្ធផលមិនដូចទៅនឹងអ្វីដែលបានរំពឹងទុក និងដោយសារវាជាទំនួលខុសត្រូវក្នុងការដឹកនាំក្រុមបានធ្វើឲ្យគ្រូបង្វឹកជនជាតិជប៉ុន Inoue Kazunori របស់ក្រុមយុវជនជម្រើសជាតិកម្ពុជាបានស្រក់ទឹកភ្នែកបន្ទាប់ពីក្រុមរបស់ខ្លួនចាញ់ក្រុមយុវជនជម្រើសជាតិវៀតណាម ១-០ ក្នុងវគ្គពាក់កណ្តាលផ្តាច់ព្រ័ត្រកាលយប់ម្សិលមិញនៅពហុកីឡដ្ឋានាជាតិ។ ការស្រក់ទឹកភ្នែករបស់គ្រូបង្វឹករូបនេះគឺសម្តែងពីអារម្មសោកស្តាយយ៉ាងខ្លាំងដែលមិនអាចដឹកនាំក្រុមឈានទៅកាន់វគ្គផ្តាច់ព្រ័ត្រ នៃពានរង្វាន់ AFF U-16 Championship 2016 ប្រចាំឆ្នាំ២០១៦នេះ។
តាមរយៈអ្នកបកប្រែ គ្រូបង្វឹកជនជាតិជប៉ុនបានបញ្ជាក់ក្នុងសន្និសីទសារព័ត៌មានក្រោយចប់ការប្រកួតដូច្នេះថា៖«ខ្ញុំចង់ឈ្នះមែនទែន ប៉ុន្តែនៅពេលលទ្ធផលមិនដូចអ្វីដែលខ្ញុំរំពឹងទុកវាធ្វើឲ្យទឹកភ្នែកខ្ញុំស្រក់។ ហើយខ្ញុំសោកស្តាយមែនទែនដែលមិនអាចដឹកនាំក្រុមទៅកាន់វគ្គផ្តាច់ព្រ័ត្រ។ ម្យ៉ាងទៀតវាជាទំនួលខុសត្រូវរបស់ខ្ញុំ ហើយពេលនេះខ្ញុំបានធ្វើឲ្យអ្នកឧបត្ថម្ភ និងអ្នកគាំទ្ររាបម៉ឺននាក់ខកបំណង ហើយខ្ញុំចង់បញ្ជាក់ថា ខ្ញុំខានស្រក់ទឹកភ្នែកបែបនេះយូរហើយ»។
ទោះបីជាក្រុមយុវជនជម្រើសជាតិអាយុក្រោម១៦ឆ្នាំកម្ពុជាមិនអាចឈានទៅកាន់វគ្គផ្តាច់ព្រ័ត្រនៃពានរង្វាន់ AFF U-16 Championship ២០១៦ ក៏ដោយ ប៉ុន្តែទាំងអ្នកគាំទ្រ គ្រូបង្វឹក និងថ្នាក់ដឹកនាំបានសម្តែងការគាំទ្រនិងពេញចិត្តយ៉ាងខ្លាំងទៅលើសមត្ថភាព និងការខិតខំប្រឹងប្រែងប្រកួតប្រជែងនៅលើទីលានរបស់ក្រុមកម្ពុជា។
យ៉ាងណាមិញ ក្រោយបញ្ចប់ការប្រកួតរវាងក្រុមកម្ពុជា និងវៀតណាម លោក សៅ សុខា ប្រធានសហព័ន្ធកីឡាបាល់ទាត់កម្ពុជាបានលើកទឹកចិត្តដល់កីឡាករ គ្រូបង្វឹក និងថ្នាក់ដឹកនាំក្រុមឲ្យបន្តការខិតខំប្រឹងប្រែងដើម្បីភាពជោគជ័យនៅលើកក្រោយ។ ហើយលោកបានចាត់ទុកលទ្ធផលនេះថា វាជាប្រវត្តិសាស្ត្រថ្មីមួយដ៏ល្អសម្រាប់កម្ពុជា ព្រោះនាពេលកន្លងមកកម្ពុជាមិនដែលឈានដល់វគ្គពាក់កណ្តាលផ្តាច់ព្រ័ត្របែបនេះទេ។
ប្រធានសហព័ន្ធរូបនេះបានចាត់ទុកការចាញ់ក្រុមយុវជនជម្រើសជាតិអាយុក្រោម១៦ឆ្នាំវៀតណាម ១-០ របស់ក្រុមយុវជនជម្រើសជាតិអាយុក្រោម១៦ឆ្នាំកម្ពុជានេះថា ជាបទពិសោធន៍មួយដ៏ល្អសម្រាប់ជ័យជម្នះនៅលើកក្រោយ។ លោកបានបញ្ជាក់ថា៖«ការចាញ់ថ្ងៃនេះ ជាបទពិសោធន៍សម្រាប់ថ្ងៃស្អែក»។
ជាមួយគ្នានេះ លោក Inoue Kazunori គ្រូបង្វឹកក្រុមយុវជនជម្រើសជាតិកម្ពុជាបានសម្តែងការពេញចិត្តចំពោះសមត្ថភាពនៃការប្រកួតរបស់កូនក្រុមយ៉ាងខ្លាំង ទោះបីជាមិនអាចយកឈ្នះលើក្រុមវៀតណាមនៅក្នុងវគ្គពាក់កណ្តាលផ្តាច់ព្រ័ត្រនេះក៏ដោយ។ ហើយលោកបានចាត់ទុកការចាញ់របស់កម្ពុជាជាមួយក្រុមខ្លាំងវៀតណាមនេះថា ក្រុមរបស់ខ្លួនមិនទាន់មានការរីកចម្រើនដល់កម្រិតនោះទេ។
សម្រាប់ការប្រកួតវគ្គផ្តាច់ព្រ័ត្រនាថ្ងៃទី២៣ ខែកក្កដា នៅពហុកីឡដ្ឋានជាតិស្អែកនេះក្រុមយុវជនជម្រើសជាតិអាយុក្រោម១៦ឆ្នាំកម្ពុជាត្រូវជួបប្រកួតជាមួយក្រុមម្ចាស់ជើងឯកឆ្នាំចាស់ថៃ ដើម្បីដណ្តើមយកចំណាត់ថ្នាក់លេខ៣ ខណៈក្រុមយុវជនជម្រើសជាតិអាយុក្រោម១៦ឆ្នាំវៀតណាម ជួបប្រកួតជាមួយក្រុមយុវជនជម្រើសជាតិអាយុក្រោម១៦ឆ្នាំអូស្ត្រាលី ដើម្បីដណ្តើមយកជើងឯក៕
Tag:
U16កម្ពុជា
AFF U16
© រក្សាសិទ្ធិដោយ thmeythmey.com