កីឡាជាតិ
ជាតិ
ប្រធានតុងហ្គីលម៉ូដូពិភពលោកប្តេជ្ញាខ្ពស់នឹងដាក់កីឡាតុងហ្គីលម៉ូដូក្នុងស៊ីហ្គេមតាមសំណើរកម្ពុជា
×
នាពិធីបិទការប្រកួតកីឡាតុងហ្គីលម៉ូដូជ្រើសរើសជើងឯកថ្នាក់ជាតិកាលពីថ្ងៃទី២៥ ខែកក្កដា នៅវិមានពហុកីឡដ្ឋានជាតិ ស្ថាបនិក និងជាប្រធានសហព័ន្ធកីឡាតុងហ្គីលម៉ូដូពិភពលោក Joon Ho Seuk បានគាំទ្រសំណើររបស់កម្ពុជាក្នុងការដាក់ឲ្យមានប្រភេទកីឡាតុងហ្គីលម៉ូដូក្នុងការប្រកួតស៊ីហ្គេមនាពេលខាងមុខ ជាពិសេសឆ្នាំ២០២៣ ដែលកម្ពុជាធ្វើជាម្ចាស់ផ្ទះ។ ប៉ុន្តែលោកមិនមែនផ្តោតសំខាន់ត្រឹមតែដាក់ក្នុងស៊ីហ្គេមប៉ុណ្ណោះទេ ដោយលោកផ្តោតសំខាន់ទៅលើការអប់រំយុវជនកម្ពុជា។
ស្របពេលដែលតុងហ្គីលម៉ូដូមិនទាន់មានវត្តមានក្នុងការប្រកួតកីឡាស៊ីហ្គេម លោក Joon Ho Seuk ប្រធានសហព័ន្ធកីឡាតុងហ្គីលម៉ូដូពិភពលោក និងជាស្ថាបនិកកីឡាតុងហ្គីលម៉ូដូបានប្តេជ្ញថា នឹងដាក់កីឡាបញ្ចូលប្រភេទកីឡានេះក្នុងការប្រកួតកីឡាស៊ីហ្គេមនាពេលខាងមុខ ជាពិសេសស៊ីហ្គេមឆ្នាំ២០២៣ ដែលកម្ពុជាធ្វើជាម្ចាស់ផ្ទះ។ ការប្តេជ្ញាវបែបនេះ គឺដើម្បីឆ្លើយតបទៅនឹងសំណើររបស់លោក ចំរើន សុផល អគ្គលេខាធិការសហព័ន្ធកីឡាតុងហ្គីលម៉ូដូកម្ពុជាកាលពីពេលថ្មីៗកន្លងទៅនេះ។
នាពិធីបិទការប្រកួតកីឡាតុងហ្គីលម៉ូដូជ្រើសរើសជើងឯកថ្នាក់ជាតិប្រចាំឆ្នាំ២០១៦ នៅវិមានពហុកីឡដ្ឋានជាតិកាលពីម្សិលមិញ ស្ថាននិកកីឡាតុងហ្គីលម៉ូដូរូបនេះបានបញ្ជាក់ថា៖«ខ្ញុំនឹងជួយឲ្យតុងហ្គីលម៉ូដូមានវត្តមាននៅស៊ីហ្គេមឆ្នាំ២០២៣។ ខ្ញុំនឹងធ្វើឲ្យកីឡាតុងហ្គីលម៉ូដូក្លាយជាផ្នែកមួយនៃកីឡាស៊ីហ្គេម ព្រោះពេលនេះយើងមាន៦ប្រទេសក្នុងតំបន់អាស៊ានជាសមាជិករូចទៅហើយក្នុងនោះមាន កម្ពុជា ថៃ ម៉ាឡេស៊ី ឥណ្ឌូនេស៊ី សិង្ហបុរី ហ្វីលីពីន និងប្រទេសមួយចំនួនទៀតនៅក្នុងតំបន់អាស៊ី»។
វត្តមានរបស់ប្រធានសហព័ន្ធកីឡាតុងហ្គីលម៉ូដូពិភពលោកនៅកម្ពុជានេះក្នុងគោលបំណងដើម្បីជួយពង្រឹង និងពង្រីកវិស័យកីឡាតុងហ្គីលម៉ូដូកម្ពុជាឲ្យកាន់តែមានការរីកចម្រើន ជាពិសេសដើម្បីជួយជំរុញវិស័យកីឡាមួយនេះឲ្យមានវត្តមាននៅក្នុងការប្រកួតកីឡាស៊ីហ្គេម។
ទោះបីជាយ៉ាងនេះក្តី ស្ថាបនិកកីឡាតុងហ្គីលម៉ូដូដែលមានដើមកំណើតនៅប្រទេសកូរ៉េខាងត្បូងមួយនេះ មិនត្រឹមតែផ្តោតសំខាន់ទៅលើការបញ្ចូលកីឡាតុងហ្គីលម៉ូដូក្នុងការប្រកួតកីឡាស៊ីហ្គេមប៉ុណ្ណោះទេ គឺលោកផ្តោតសំខាន់ទៅលើការអប់រំយុវជនតាមការដាក់កីឡានេះជាមូលដ្ឋាន នៃការហ្វឹកហាត់។ លោកបញ្ជាក់ថា៖«យើងមិនមែនផ្តោតតែទៅលើការដាក់កីឡាតុងហ្គីលម៉ូដូទៅក្នុងស៊ីហ្គេម ប៉ុណ្ណោះទេ ប៉ុន្តែអ្វីដែលសំខាន់នោះគឺយើងនឹងធ្វើឲ្យកីឡាប្រភេទនេះក្លាយជាមូលដ្ឋានគ្រឹះនៃការហ្វឹកហាត់ ដើម្បីអប់រំឲ្យយុវជនក្លាយទៅជាកូនល្អ សិស្សល្អ ពលរដ្ឋល្អ និងបុគ្គលគំរូនៅក្នុងសង្គមជាតិ និងពិភពលោក»។
គួរបញ្ជាក់ថា ការប្រកួតកីឡាតុងហ្គីលម៉ូដូជ្រើសរើសជើងឯកថ្នាក់ជាតិប្រចាំឆ្នាំ ដែលមានក្លិប-សមាគមចំនួន១០ចូលរួម អត្តពលិកមកពីក្លិបបញ្ញាសាស្ត្រ ដែលមានបញ្ញាសាស្ត្រវត្ដបទុម,បឹងកេងកង, សែនសុខ និងបញ្ញាសាស្ត្រទួលគោក ដណ្តើមបានមេដាយច្រើនជាងគេ នៅក្នុងវិញ្ញាសាប្រកួតទាំង១៦ ដោយបានមេដាយមាស ១១ ប្រាក់១៣ និងសំរឹទ្ធ១៨ ខណៈក្លិបដូនពេញ បានឈ្នះមេដាយមាស ៥ ប្រាក់១ និងសំរឹទ្ធ៧ ក្លិបធីអ៊ិលស៊ី បានប្រាក់១ សំរឹទ្ធ១ និងក្លិប Kent Ridge បានប្រាក់១ ប៉ុន្តែក្លិបផ្សេងទៀតមិនទទួលបានមេដាយឡើយ៕
Tag:
តុងហ្គីលម៉ូដូ
Joon Ho Seuk
© រក្សាសិទ្ធិដោយ thmeythmey.com