ជាតិ
×![]()
រដ្ឋមន្ត្រីក្រសួងព័ត៌មានលោក ខៀវ កាញារីទ្ធ ជំរុញឲ្យអ្នកសារព័ត៌មានទាំងអស់គោរពក្រមសីលធម៌វិជ្ជាជីវៈខ្លួនឲ្យបានខ្ជួបខ្ជួន ក្នុងការចុះផ្ដិតរូបភាពជនរងគ្រោះ យកមកចុះផ្សាយលើកញ្ចក់ទូរទស្សន៍ និងតាមប្រព័ន្ធផ្សព្វផ្សាយខ្លួន។ បើតាមលោក ខៀវ កាញារីទ្ធ ការថតរូបជនសង្ស័យបង្ហាញតាមកញ្ចក់ទូរទស្សន៍ និងតាមប្រព័ន្ធផ្សព្វផ្សាយនោះ ក៏ជាបំផ្លាញភស្តុតាងសមត្ថកិច្ចដែរ។
ថ្លែងទៅកាន់តំណាង មន្ត្រីជាង ៦០រូប មកពីតាមមន្ទីរព័ត៌មាន ២៥ រាជធានី-ខេត្ត ក្នុងពិធីបិទវគ្គបណ្តុះបណ្តាលស្តីពី ជំនាញកម្មវិធី Java និង Window នៅព្រឹកថ្ងៃទី២៦ កក្កដានេះរដ្ឋមន្ត្រីក្រសួងព័ត៌មានរូបនេះ បានបញ្ជាក់ដូច្នេះថា៖«ទីមួយបើយើងនិយាយអំពីឧក្រិដ្ឋកម្ម ឧក្រិដ្ឋអ្វីក៏ដោយ ចាប់ផ្ដើមដោយសង្ស័យហើយ គេរឹតមិនឲ្យអ្នកណាចូល ហើយបើថតវិញ Memory គេប្រមូលទាំងអស់ ។ទីពីរ កិត្តិយសនៃសាកសពដែលត្រូវគេបុកដាច់ខ្លួន ដាច់ក្បាល ពេលថតអាក្រក់មែនទែន …។ យើងគិតខ្លួនឯងវិញទៅបើសិនជាងាប់ទៅគាត់ថតបែបនេះ គិតយ៉ាងម៉េចដែរ បាត់កិត្តិយសអស់រលីង ចំណុចនេះគេរក្សាណាស់បញ្ហានេះ គេសុំកុំឲ្យដាករូបអ៊ីចឹង។ ហើយតាមពិតយើងណែនាំតាំងពីឆ្នាំ២០០៤ តាំងពីបង្កើតក្រសួងព័ត៌មានមកយើងតែងណែនាំលើបញ្ហានេះ»។
ជាមួយគ្នានេះលោក ខៀវ កាញារីទ្ធ ក៏បានស្នើឲ្យអ្នកសារព័ត៌មានចុះផ្តិតរូបភាពដោយរក្សាកិត្តិយសជនរងគ្រោះដោយលោកចាត់ទុកក្រមសីលធម៌មានសារៈសំខាន់ណាស់សម្រាប់អ្នកសារព័ត៌មាន។ លោករដ្ឋមន្ត្រី ទទួលស្គាល់ថា អ្នកសារព័ត៌មានគឺមានសិទ្ធិក្នុងចុះផ្ដិតយករូបភាពព័ត៌មានគ្រប់ទីកន្លែង។ ប៉ុន្តែអ្នកសារព័ត៌មានមិនត្រូវផ្ដិតយករូបភាពអាក្រក់ដែលប៉ះពាល់ដល់កិត្តិយស និងសិទ្ធិអ្នកដទៃមកចុះផ្សាយឡើយ។
កាលពីថ្ងៃទី២៥ កក្កដា រដ្ឋមន្ត្រីក្រសួងព័ត៌មានលោក ខៀវ កាញារីទ្ធ បានបញ្ជាក់ថា ក្រសួងមិនបានហាមឃាត់ស្ថានីយ៍ទូរទស្សន៍ មិនឲ្យចុះផ្សាយរឿងឃាតកម្មនោះទេ ពោលគឺក្រសួងគ្រាន់តែហាមស្ថាប័នទូរទស្សន៍ទាំងនោះ មិនឲ្យចាក់ផ្សាយបង្ហាញរូបភាព និងមុខជនរងគ្រោះដែលស្លាប់តាមកញ្ចក់ទូរទស្សន៍ប៉ុណ្ណោះ។
លោក ខៀវ កាញារីទ្ធ បានសរសេរលើហ្វេសប៊ុកខ្លួនដោយបញ្ជាក់មូលហេតុយ៉ាងដូច្នេះថា៖«តាមពិតមិនមែនឆ្លើយជាមួយអ្នកអត់វិជ្ជាជីវៈទេ តែឃើញកាសែតសួរថាហេតុអ្វីក្រសួងមិនឲ្យទូរទស្សន៍ ផ្សាយរឿងឃាតុកម្ម ? ក្រសួងមិនមែនហាមរឿងផ្សាយឃាតកម្មទេ តែហាមរឿងបង្ហាញរូបជនរងគ្រោះដែលស្លាប់ (តាមសីលធម៌គេដាក់រូបកាលនៅរស់ មិនមែនដាក់រូបសពទេ) ។
Tag:
ក្រសួងព័ត៌មាន
ខៀវ កាញារីទ្ធិ
© រក្សាសិទ្ធិដោយ thmeythmey.com
«នាំអាត» និង«នាំអាទិ៍»មួយណាត្រឹមត្រូវ?
1 សប្តាហ៍
