ការស្រាវជ្រាវបានបង្ហាញថា អាជីវកម្មបើកហើយ បិទទៅវិញ៩០ភាគរយ

ជាតិ

សេដ្ឋកិច្ច

ការស្រាវជ្រាវបានបង្ហាញថា អាជីវកម្មបើកហើយ បិទទៅវិញ៩០ភាគរយ

27, Jul 2016 , 10:39 pm

រូបភាព

ដោយ: គី សុខលីម (Ky Soklim)

ភ្នំពេញ៖ នៅលើពិភពលោកតែម្តង គេតែងតែសង្កេតឃើញថា អាជីវកម្មមួយចំនួនបើកទ្វារបានមួយរយៈ តែក្រោយមក ក៏បិទទ្វារទៅវិញ។ និយាយឲ្យសាមញ្ញ មានន័យថា មានការបើកអាជីវកម្ម តែក៏មានដែរអាជីវកម្មបិទទ្វារទៅវិញ។ នេះ គឺជាលទ្ធផលស្រាវជ្រាវនៅក្នុងសហរដ្ឋអាមេរិក។ លទ្ធផលនៃការស្រាវជ្រាវ បានបង្ហាញថា ស្ថានភាពប្រហាក់ប្រហែលគ្នានេះបានកើតឡើងនៅក្នុងប្រទេសដទៃទៀត។ នេះបើយោងតាមការដកស្រង់អត្ថន័យបន្តពីការសិក្សារបស់លោក ឌិន សុមេធារិទ្ធ គ្រូឧទ្ទេសនៃមជ្ឈមណ្ឌលសហប្រតិបត្តិការជប៉ុន-កម្ពុជា និងជាសហស្ថាបនិកនៃសណ្ឋាគារ Frangipani Villa Hotel Group នៅក្នុងប្រទេសកម្ពុជា។

ការសិក្សាស្រាវជ្រាវលើអាជីកម្មនៅសហរដ្ឋអាមេរិកដែលដកស្រង់អត្ថន័យបន្តដោយលោក ឌិន សុមេធារិទ្ធ បានឲ្យដឹងថា អាជីវកម្មចំនួន១០០ដែលបើកបានក្នុងចន្លោះរយៈពេល៥ឆ្នាំ បានបិទទ្វារទៅវិញចំនួន៩០ ។ ៩០អាជីវកម្មដែលត្រូវបានបិទទៅវិញនេះ ត្រូវបានគេស្តីបន្ទោសភាគច្រើនទៅលើកង្វះខាតគំនិតអាជីវកម្មច្បាស់លាស់។ ការសិក្សាដដែលបានបង្ហាញទៀតថា ៥ឆ្នាំក្រោយ ក្នុងចំណោមអាជីវកម្មដែលនៅសល់១០នោះ មានអាជីវកម្មចំនួន៩ទៀតបានបិទទ្វារ។ មូលហេតុ ចុងក្រោយនេះ គឺដោយសារ ការគ្រប់គ្រងមិនច្បាស់លាស់។ សរុបសេចក្តីមក អាជីវកម្មបើកហើយដួលបះជើងទៅវិញ បណ្តាលមកពីបញ្ហាពីរយ៉ាងធំៗ។ ទី១ គឺគ្មានគំនិតអាជីវកម្មពិតប្រាកដ និងទី២ គឺគ្មានការគ្រប់គ្រងច្បាស់លាស់។

លោក ឌិន សុមេធារិទ្ធ គ្រូឧទ្ទេសនៃមជ្ឈមណ្ឌលសហប្រតិបត្តិការជប៉ុន-កម្ពុជា និងជាសហស្ថាបនិកនៃសណ្ឋាគារ Frangipani Villa Hotel Group បានបន្តអត្ថាធិប្បាយលើការស្រាវជ្រាវនោះទៀតថា លទ្ធផលនោះមិនមែនតំណាងឲ្យតែស្ថានភាពនៅអាមេរិកទេ តែវាតំណាងឲ្យស្ថានភាពនៅក្នុងប្រទេសដទៃទៀត ក្នុងនោះ អាចថា វាដូចទៅនឹងស្ថានភាពនៅក្នុងប្រទេសកម្ពុជាដែរ។ នៅក្នុងប្រទេសកម្ពុជា អាជីកម្មជាច្រើនមិនថា តូច ឬធំទេ ត្រូវបានបង្កើតឡើងជាហូរហែ តែអាជីវកម្មជាច្រើនក៏ត្រូវបានបិទទៅវិញជាបន្តបន្ទាប់ដែរ។

បើតាមលោក ឌិន សុមេធារិទ្ធ អាជីវកម្មមួយអាចជោគជ័យត្រូវមានកត្តា៤យ៉ាង។ ទី១ គឺត្រូវមានគំនិតអាជីវកម្មច្បាស់លាស់។ ទី២ គឺ ត្រូវមានបទពិសោធន៍ការងារ និងចំណេះដឹងទូទៅទូលំទូលាយ។ ទី៣ គឺត្រូវមានគុណសម្បត្តិសហគ្រិនភាព និងទី៤ គឺត្រូវមានការគ្រប់គ្រងច្បាស់លាស់៕