សុភាសិតខ្មែរ៖ «ជួញជិត ប្រើសើរជាងជួញឆ្ងាយ» អប់រំពីការរៀបចំគ្រួសារឲ្យកូនចៅ និងធ្វើជំនួញ

ពីនេះ ពីនោះ

សុភាសិតខ្មែរ៖ «ជួញជិត ប្រើសើរជាងជួញឆ្ងាយ» អប់រំពីការរៀបចំគ្រួសារឲ្យកូនចៅ និងធ្វើជំនួញ

29, Jul 2016 , 7:59 pm

រូបភាព

ដោយ:

ភ្នំពេញ៖ សុភាសិតមួយឃ្លាថា «ជួញជិត ប្រើសើរជាងជួញឆ្ងាយ» គេតែងឮប្រជាជនខ្មែរ ដែលមានវ័យចំណាស់ លើកឡើង ដើម្បីប្រដៅកូនចៅ។ ជាអត្ថន័យ សុភាសិតមួយនេះអាចមានគោលដៅសំខាន់មួយចំនួន ផ្នែកអត្ថន័យដែលអ្នកបកស្រាយ ត្រូវគិតទៅរកអ្វីជាបំណងរបស់បុព្វបុរសខ្មែរ ដែលលោកបានលើកឡើង។

ចំពោះសុភាសិតនេះ កន្លងទៅខ្មែរតែងតែនិយាយ នៅពេលដែលគេគិតគូរ រៀបចំទុកដាក់ កូនចៅ ។ ចាស់បុរាណខ្មែរលោកគិតថា ការរៀបចំឲ្យកូនចៅមានប្ដីប្រពន្ធឆ្ងាយស្រុកភូមិ ឆ្ងាយស្រុក ឆ្ងាយខេត្ត គឺធ្វើឲ្យលោកមានការមិនសុខស្រណុកក្នុងចិត្ត។ ព្រោះនៅពេលកូនចៅរបស់លោក នៅឆ្ងាយភ្នែកលោក លោកព្រួយលោកបារម្ភ មិនដឹងថាកូនចៅរបស់លោករងទុក្ខអ្វីខ្លះ។ ហេតុនេះ សុភាសិតនេះ ដូនតាលោកលើកឡើង ដើម្បីប្រាប់កូនចៅថា ការរៀបការ មានគូរស្រករបែបនោះ មិនមែនជារឿងល្អ និងបំភ័យអារម្មណ៍កូនចៅ កុំឲ្យប្ដីប្រពន្ធឆ្ងាយស្រុក។

សម្រាប់ន័យម្យ៉ាងទៀត គោលដៅនៃសុភាសិតនេះ ក៏អាចទាក់ទងជាមួយ ការប្រកបរបររកស៊ី ជួញដូរស្រុកជិត ស្រុកឆ្ងាយជាដើមផងដែរ។ ដោយហេតុថា ដូនតាខ្មែរ លោកមានមានការគិតគូរ និងព្រួយបារម្ភខ្ពស់ពីការប្រកប់ជំនួញ។ ជាការពិតណាស់សម័យមុន ការប្រកបរបរជួញដូរស្រុកឆ្ងាយ គឺប្រឈមបញ្ហាខ្ពស់ជាពិសេសបញ្ហាសុខសុវត្ថិភាព។ ស្ថិតក្នុងស្ថានភាពស្រុកទេសអសន្តិសុខ មនុស្សកាចសាហាវ មនុស្សមិនទាន់ស្គាល់ច្បាប់ ជាដើមនោះ គ្រោះថ្នាក់ជំនួញ ទាក់ទងបញ្ហាលួចប្លន់គឺជារឿងប្រឈមធំសម្រាប់អ្នករកស៊ី។ ហេតុនេះ «ជួញជិត ប្រសើរជាងជួញឆ្ងាយ» គឺជាពាក្យដាស់តឿនថា ការប្រកបរបរជំនួញជួញដូររកស៊ី ផ្លូវឆ្ងាយ ស្រុកឆ្ងាយគឺមិនប្រាកដថា បានល្អប្រសើរជាងការរកស៊ីនៅក្នុងស្រុកឡើយ។ ប៉ុន្តែអាចមានបញ្ហាដល់ជីវិតក៏មាន។ នេះហើយដែលការជួញជិត វាប្រសើរជាង។

ចំពោះសុភាសិតនេះ ច្បាស់ណាស់មិនអាចមានវិសាលភាពអត្ថន័យក្រៅពីនេះនោះទេ។ ប៉ុន្តែក៏អាចនិងមានការយល់ឃើញជ្រៅជាងនេះ ប្រសិនបើអ្នកបកស្រាយមួយចំនួន គេមានសិល្បះនៃការបកស្រាយខ្ពស់ជាងនេះ។

ប៉ុន្តែអ្វីដែលសំខាន់នៅពេលនេះ វិសាលភាពតម្លៃរបស់សុភាសិតនេះ រហូតមកដល់ពេលបច្ចុប្បន្ននេះ អាចមានការបាត់បង់ក្នុងការប្រើប្រាស់ក្នុងជីវិតប្រចាំថ្ងៃ។ ពីព្រោះថា បច្ចុប្បន្នភាព ប្រសិននៅបន្តគិតបែបនេះ គឺមិនអាចនាំឲ្យមានការរីកចម្រើននោះទេ។ ជាពិសេសស្របពេលដែលពិភពលោកប្រែប្រួលចរន្តពាណិជ្ជកម្មថ្មីផងនោះ។ តែទោះជាយ៉ាងណា វាក៏អាចមានលក្ខខណ្ឌមួយចំនួនដែលត្រូវពិចារណាផងដែរ ចំពោះតម្លៃរបស់សុភាសិតនេះ ក្នុងពេលបច្ចុប្បន្ន។ ព្រោះថា បច្ចុប្បន្នចរន្តចំណាក់ស្រុក ការរៀបការទៅស្រុកចិនដីគោក ការបោះបង់ដីស្រែទៅធ្វើកម្មករ ជាដើមនោះ ពេលខ្លះមិនបានធ្វើឲ្យជីវភាពរបស់គេបានប្រសើរឡើយ ប៉ុន្តែនៅតែបន្តឲ្យមានបញ្ហាកាន់តែធ្ងន់ធ្ងរទៅវិញ។ ឧទាហរណ៍ ធ្វើកម្មករមួយខែបីរយ ទៅបួនរយដុល្លា តែបើនៅផ្ទះធ្វើស្រែចំការ ចិញ្ចឹមមាន់ទា ជ្រូកគោ ប្រហែលពេលខ្លះ អាចរកចំណូលបានច្រើនជាងនោះ ឲ្យតែតាំងចិត្តថា ធ្វើប្រាំបីម៉ោងពេញ ដូចទៅធ្វើកម្មករគេ។

ជារួមមក ទោះជាយ៉ាងណាតម្លៃរបស់សុភាសិតនេះនៅតែមាន មិនអាចខ្វះបាន គ្រាន់តែចំណុចខ្លះ ត្រូវកែប្រែការគិត និងប្រតិបត្តិតែប៉ុណ្ណោះ៕