ពីនេះ ពីនោះ
សាស្ត្រាចារ្យ គូ សុភាព ប្រាប់វិធី៨យ៉ាង ដើម្បីត្រៀមប្រឡងបាក់ឌុប
× ភ្នំពេញ៖ ខណៈការប្រឡងបាក់ឌុប កាន់តែខិតជិតមកដល់ ភិក្ខុ គូ សុភាព សាស្ត្រាចារ្យនៅសាកលវិទ្យាល័យបញ្ញាសាស្ត្រកម្ពុជា បានប្រាប់ឲ្យសិស្សត្រៀមលក្ខណៈសម្បត្តិចំនួន៨ចំណុចដូចខាងក្រោម៖
១) មើលមេរៀនត្រៀម កុំទុកចាំដល់ថ្ងៃប្រឡងទើបមើលមេរៀននោះ។ មើលមេរៀនឲ្យបានមុនប្រឡងយ៉ាងហោចណាស់១ទៅ២សប្តាហ៍មុនពេលប្រឡង។
២) មើលកំណត់ត្រា វាជាមេរៀនសង្ខេប ងាយស្រួលមើល ស្រណុកសរុបសេចក្តីមេរៀន បើឆ្ងល់មើលសៀវភៅបន្ថែម។
៣) ជជែកពិភាក្សា បើមានពេល ត្រូវជួបជុំជជែកពិភាក្សាគ្នា វាធ្វើឲ្យអ្នកបានចង់ចាំបានល្អ ហើយមានស្មារតីរឹងមាំ។
៤) បង្រៀនគេ ពីព្រោះ ការបង្រៀនគេ អាចធ្វើឲ្យយើងចេះខ្លួនឯង និងមានជឿជាក់លើខ្លួនឯងបន្ថែមទៀត។ បង្រៀនគេ មិនត្រូវខ្លាចគេចេះជាង ឬកុំខ្លាចគេបានពិន្ទុល្អជាងខ្លួនឯងនោះ។
៥) សាកល្បងធ្វើលំហាត់ យកសំណួរចាស់ៗ ឬវិញ្ញាសារចាស់ៗ មកសាកល្បងធ្វើវា ដើម្បីឲ្យដឹងពីសមត្ថភាពរបស់ខ្លួនឯង។
៦) កុំគ្រាន់តែចាំរត់មាត់ ពោល គឺចាំហើយយល់ផង។ ការធ្វើដូច្នេះ វាអាចធ្វើឲ្យអ្នកយល់ច្បាស់ និងចាំបានយូរ។
៧) កុំរៀនសម្រុកពេក កុំប្រឹងរៀនរហូតដាច់យប់ អត់ដេកអត់ពួន វាមិនល្អទេ ពីព្រោះវាធ្វើឲ្យយើងធេងធោង ចាំមេរៀនមិនបានល្អទេ។ សម្រាកខួរក្បាលខ្លះ យកកម្លាំង ដើម្បីរៀនបានយូរ។
៨) គួរទៅមើលបន្ទប់ប្រឡង និងអាគារប្រឡង រួចអង្គុយសាកមើល ដើម្បីឲ្យស៊ាំនឹងបរិស្ថាន នៃមណ្ឌលប្រឡង។
សូមរម្លឹកថា ការប្រឡងសញ្ញាបត្រមធ្យមសិក្សាទុតិយភូមិ(បាក់ឌុប) នឹងប្រព្រឹត្តទៅនៅថ្ងៃទី២២ ខែសីហា ឆ្នាំ២០១៦ ដែលមានបេក្ខជនប្រឡងជាង៩ម៉ឺននាក់ មាន១៥៧ មណ្ឌល និង៣,៧៨១បន្ទប់ប្រឡង នៅទូទាំងរាជធានី ខេត្ត៕
ប្រភព៖ សៀវភៅ«ខ្ញុំឆ្លាត រូបមន្តរៀនពូកែ»រៀបរៀងដោយ ភិក្ខុ គូ សុភាព
Tag:
ភិក្ខុ គូ សុភាព
បាក់ឌុប
© រក្សាសិទ្ធិដោយ thmeythmey.com