ជាតិ
ចិនពិចារណាបង្កើនកូតានាំស្រូវអង្ករពីកម្ពុជាឲ្យដល់២សែនតោនក្នុងឆ្នាំ២០១៧
× ភ្នំពេញ៖ ចិនពិចារណាបង្កើនកូតានាំស្រូវអង្ករពីកម្ពុជាទ្វេដង រហូតដល់ចំនួន ២សែនតោន ក្នុង ២០១៧ ខាងមុខ។ លើសពីនេះ ចិនសន្យាជំរុញអ្នកវិនិយោគវិស័យកែច្នៃ ចំណីអាហារ ឧស្សាហកម្ម និងវិស័យកសិឧស្សាហកម្មដោយផ្ទាល់ក្នុងប្រទេសកម្ពុជាបន្ថែមទៀត ខណៈទំហំពាណិជ្ជកម្មភាគីទាំងពីកើនដល់ទៅ ១៨ភាគរយ។
រដ្ឋមន្ត្រីក្រសួងពាណិជ្ជកម្មចិន លោក កៅ ហ៊ូឆឹង (GAO Hucheng) នឹងពិភាក្សាផ្តល់ការអនុគ្រោះពន្ធគយក្នុងកម្រិតរហូតដល់៩០ភាគរយ និងការបង្កើនការនាំចូលស្រូវអង្ករពីកម្ពុជាដល់ ២សែនតោន និងផលិតផលកសិកម្មលឆាប់ៗខាងមុខ ដើម្បីពង្រឹងពង្រីកពាណិជ្ជកម្មទេ្វភាគីរវាងកម្ពុជា និងចិន។
រដ្ឋមន្ត្រីក្រសួងពាណិជ្ជកម្មលោក ប៉ាន សូរស័កិ្ត បានថ្លែងប្រាប់ក្រុមអ្នកសារព័ត៌មាន ក្រោយជំនួបពិភាក្សាការងារជាមួយលោក GAO Hucheng ពីការជំរុញពាណិជ្ជកម្មទេ្វភាគីថា ចិនសន្យាពិចារណាបង្កើនកូតានាំអង្ករពីកម្ពុជាឲ្យដល់ ២សែនតោន ខណៈពេលបច្ចុប្បន្ន មានតែ ១សែនតោន ប៉ុណ្ណោះ។ លើសពីនេះ លោកបន្តជាវិជ្ជមានថា ចិននឹងពិភាក្សាបន្ថែមទៀត ពីការសម្រួលការចូលផលិតផលកសិកម្មនានា ពីកម្ពុជាផងដែរ។
ជាងនេះទៀត លោក ប៉ាន សូរស័ក្តិ បានពិភាក្សាជាមួយមិត្តចិនពីការអនុគ្រោះរួចពន្ធគយ គ្មានកូតាកំណត់ ពាណិជ្ជកម្មស្រូវអង្ករ ការនាំចេញផលិតផលកសិកម្មកម្ពុជាទៅចិន និងជំរុញការវិនិយោគកែច្នៃផលិតកសិកម្ម ម្ហូបអាហារពីចិនមកស្រុកខ្មែរទៀតផង។
«យើងនឹងចុះហត្ថលេខា អនុញ្ញាតនាំចេញវត្ថុផ្សេងៗទៀត ស្ទើរគ្រប់វិស័យ៩៧ភាគរយ នឹងលើសពីនេះទៀតទៅថ្ងៃក្រោយ ដែលយើងបានពិភាក្សា...។ យើងមានកំណើនផលិតលើសដល់ទៅ៣លានតោន ក្នុងឆ្នាំនេះ ដូច្នេះចិននឹងជួយយើងបន្ថែមទៀតក្នុងការនាំចេញ»។ រដ្ឋមន្ដ្រីទើបតែងចូលដំណែងក្នុងពាក់កណ្តាលអាណត្តិរដ្ឋាភិបាលទី៥ រូបនេះ បានអះអាងនៅថ្ងៃទី២ ខែសីហានេះ ពីជំរុញការនាំចេញផលិតផលកសិកម្មកម្ពុជា និងលើកទឹកការវិនិយោគពីចិន។
ជាមួយគ្នា រដ្ឋមន្ត្រីពាណិជ្ជកម្មចិន បានចាត់ទុកកម្ពុជាជាដៃគូពាណិជ្ជកម្មយុទ្ធសាស្ត្រចិន ក្នុងក្របខ័ណ្ឌគំនិតផ្តួចផ្តើមខ្សែក្រវ៉ាត់មួយផ្លូវមួយ (One Belt One Road Initiative) និង ក្របខ័ណ្ឌអាស៊ាន។
តាមទិន្នន័យផ្លូវការពីលេខាធិការដ្ឋាន ច្រកចេញចូលតែមួយសម្រាប់បំពេញបែបបទនាំចេញអង្ករ ក្នុងឆ្នាំ២០១៥ កម្ពុជាបានសម្រេចនាំអង្ករចេញតែពាក់កណ្តាលនៃផែនការ ១ លានតោនរបស់រដ្ឋាភិបាលប៉ុណ្ណោះ ហើយវាកើនឡើងជិត ៤០ភាគរយ ធៀបនឹងឆ្នាំ ២០១៤។ របាយការណ៍ប្រចាំឆ្នាំចេញផ្សាយក្នុងខែមករា ឆ្នាំ២០១៦ កម្ពុជានាំចេញអង្ករបាន ៥៣៨ ៣៩៦ តោនបើធៀបនឹង ៣៨៧ ០៦១ តោនកាលពីឆ្នាំ ២០១៤ ដែលកើនឡើង ៣៩,១ ភាគរយ។ ប្រទេសចិនជាទីផ្សារទីមួយរបស់កម្ពុជា ដែលមានចំនួន ២១,៧ ភាគរយ និង ម៉ាឡេស៊ី ១០,២ ភាគរយ ក្នុងចំណោមទិសដៅឈានមុខគេ ១០។ ប្រភេទអង្ករនាំចេញសំខាន់ៗ មាន អង្ករផ្កាម្លិះ និងអង្ករក្រអូបជាង ៥០ភាគរយ ព្រមទាំងអង្ករសមានជាង ៤០ភាគរយ៕
Tag:
កម្ពុជា
ចិន
អង្ករ
ពាណិជ្ជកម្ម
© រក្សាសិទ្ធិដោយ thmeythmey.com