ម៉ាឡេស៊ី៖ ច្បាប់សន្តិសុខថ្មី បង្កការព្រួយបារម្ភចំពោះសេរីភាពនិងប្រជាធិបតេយ្យ

អន្តរជាតិ

ម៉ាឡេស៊ី៖ ច្បាប់សន្តិសុខថ្មី បង្កការព្រួយបារម្ភចំពោះសេរីភាពនិងប្រជាធិបតេយ្យ

02, Aug 2016 , 10:59 pm

រូបភាព

ដោយ: តន ចាន់រិទ្ធារ៉ា

ច្បាប់សន្តិសុខថ្មីរបស់ម៉ាឡេស៊ី ទើបចូលជាធរមាននៅថ្ងៃទី១ ខែសីហា បន្ទាប់ពីសភាអនុម័តកាលពីខែធ្នូកន្លងទៅ។ ច្បាប់សន្តិសុខថ្មី ត្រូវគេមើលឃើញថា ជាការគំរាមដល់ប្រជាធិបតេយ្យ និងសិទ្ធិសេរីភាពប្រជាជន ដ្បិតច្បាប់ថ្មីនេះផ្ដល់អំណាចយ៉ាងទូលាយដល់នាយករដ្ឋមន្ត្រី Najib Razak ដែលអាចប្រើអំណាចរឹតត្បិតសំឡេងរិះគន់ និងបិទមាត់បក្សប្រឆាំង មិនឲ្យរិះគន់រដ្ឋាភិបាលផងដែរ។

យោងតាមច្បាប់សន្តិសុខថ្មីនេះ រដ្ឋាភិបាលមានសិទ្ធិប្រកាសស្ថានភាពអាសន្នតំបន់ណាមួយដែលមានការគំរាមកំហែងដល់សន្តិសុខ ហើយថែមទាំងផ្ដល់អំណាចយ៉ាងធំធេងដល់មន្ត្រីប៉ូលិស។ លើសពីនោះ ច្បាប់ថ្មីនេះ ក៏អនុញ្ញាតឲ្យក្រុមប្រឹក្សាសន្តិសុខជាតិ ដែលដឹកនាំដោយនាយករដ្ឋមន្ត្រី Najib ផ្ទាល់ មានសិទ្ធិព្យួរសេរីភាពស៊ីវិល ក្នុងតំបន់ណាមួយ ហើយក្រុមសន្តិសុខអាចឃាត់ខ្លួន រឹបអូសវត្ថុ និងឆែកឆេរបាន។

យ៉ាងណាក្ដី ច្បាប់សន្តិសុខដ៏តឹងរ៉ឹងនេះ រងការរិះគន់យ៉ាងខ្លាំង ដោយក្រុមអ្នកប្រឆាំងបានចោទនាយករដ្ឋមន្ត្រី Najib និងរដ្ឋាភិបាលរបស់លោក ដែលធ្វើច្បាប់សន្តិសុខនេះ និងច្បាប់ដទៃទៀត ដើម្បីគាបសង្កត់អ្នកនយោបាយប្រឆាំង ខណៈលោក Najib កំពុងរងសម្ពាធលើករណីអំពើពុករលួយ។ មិនត្រឹមតែរងការរិះគន់ក្នុងស្រុកទេ ស្ថាប័នសិទ្ធិមនុស្សរបស់អង្គការសហប្រជាជាតិ និងស្ថាប័នមួយចំនួនទៀត ក៏ប្រតិកម្មខ្លាំងនឹងច្បាប់ថ្មីនេះដែរ។

បើតាមសារព័ត៌មាន BBC កាលពីសប្ដាហ៍មុន អង្គការសហប្រជាជាតិ បានបង្ហាញពីការព្រួយបារម្ភ ចំពោះច្បាប់ថ្មីនេះ ដោយអះអាងថា វានឹងលើកទឹកចិត្តឲ្យការរំលោភបំពានសិទ្ធិមនុស្ស។ នេះក៏ដោយសារតែច្បាប់ថ្មីនេះ ផ្ដល់អំណាចយ៉ាងច្រើនដល់នាយករដ្ឋមន្ត្រីម៉ាឡេស៊ី Najib ដែលត្រូវបានទាមទារឲ្យចុះពីតំណែងនោះ។

ជាមួយនឹងពាក្យរិះគន់ខ្លាំង នាយករដ្ឋមន្ត្រី លោក Najib ក៏បាននិយាយការពារច្បាប់ថ្មីនេះ ដោយលើកឡើងថា គោលបំណងរបស់វាគឺដើម្បីការពារសន្តិសុខប្រជាជនម៉ាឡេស៊ី ស្របពេលដែលការគំរាមកំហែងពីសំណាក់ក្រុមភេរវករជ្រុលនិយម មានការកើនឡើងខ្លាំង។ លោក Najib សង្កត់ធ្ងន់ថា លោកមិនចុះញ៉មទេ ចំពោះការផ្ដល់អាទិភាពដល់សុខសុវត្ថិភាព និងសន្តិសុខប្រជាជនម៉ាឡេស៊ីមុនអ្វីទាំងអស់នោះ។

ជាការកត់សម្គាល់នោះ ការចូលជាធរមានរបស់ច្បាប់សន្តិសុខថ្មី គឺចំពេលដែលនាយករដ្ឋមន្ត្រី Najib ប្រឈមមុខនឹងសំណុំរឿងពុករលួយនៅមូលនិធិ 1MDB ក្នុងទំហំទឹកប្រាក់ជាច្រើនលានដុល្លារ។ ប៉ុន្តែ លោកបានទាត់ចោលការចោទប្រកាន់ទាំងនេះ ហើយអង្គភាពស៊ើបអង្កេតក្នុងស្រុក ក៏បានបដិសេធការពាក់ព័ន្ធរបស់នាយករដ្ឋមន្ត្រី ក្នុងសំណុំរឿងនេះដែរ។ លើសពីនេះ លោកនាយករដ្ឋមន្ត្រី Najib ក៏បានដាក់វិធានការតឹងរ៉ឹងលើបុគ្គល ឬស្ថាប័នណាដែលចោទប្រកាន់លោកផងដែរ ជាពិសេសសារព័ត៌មានដែលចោទលោក លើរឿងអាស្រូវនេះ៕