សិស្សនិទ្ទេស B និង C ១២០០នាក់ កាលពីឆ្នាំមុន ចូលរៀនគ្រូថ្នាក់បឋម និងអនុវិទ្យាល័យ

ជាតិ

សិស្សនិទ្ទេស B និង C ១២០០នាក់ កាលពីឆ្នាំមុន ចូលរៀនគ្រូថ្នាក់បឋម និងអនុវិទ្យាល័យ

03, Aug 2016 , 9:39 pm

រូបភាព

លោក ហង់ ជួន ណារ៉ុន រដ្ឋមន្ត្រីក្រសួងអប់រំ

ដោយ: ថ្មីៗ

រដ្ឋមន្ត្រីក្រសួងអប់រំ យុវជន និងកីឡា លោក ហង់ ជួនណារ៉ុន បានប្រកាសថា បេក្ខជនដែលប្រឡងជាប់និទ្ទេស A, B, C នៅឆ្នាំនេះ ពួកគេនឹងអាចជាប់ឈ្មោះជាគ្រូបង្រៀនដោយស្វ័យប្រវត្តិនៅតាមបណ្ដាគ្រឹះស្ថានអប់រំ ដែលក្រសួងបានកំណត់គោលនយោបាយលើកទឹកចិត្តដល់បេក្ខជនប្រឡងសញ្ញាបត្រទុតិយសភូមិ។ ថ្លែងនៅក្នុងសន្និសីទកាសែតនៅរសៀលថ្ងៃទី៣ ខែសីហា លោក ហង់ ជួន ណារ៉ុន បានបញ្ជាក់ថា បេក្ខជនដែលប្រឡងជាប់និទ្ទេសទាំង៣នេះ អាចក្លាយជាគ្រូបង្រៀននៅតាមសាលាមតេយ្យ បឋមសិក្សា និងអនុវិទ្យាល័យ ចាប់ពីថ្នាក់ទី៧ ដល់ថ្នាក់ទី៩។

បើតាមរដ្ឋមន្ត្រីក្រសួងអប់រំរូបនេះ ក្នុងចំណោមបេក្ខជនប្រឡងជាប់សញ្ញាបត្រទុតិយសភូមិជាប់និទ្ទេស B, C ១២០០នាក់ កាលពីឆ្នាំមុន មានបេក្ខជនមួយចំនួនបានក្លាយជាគ្រូបង្រៀនថ្នាក់បឋមសិក្សា ថ្នាក់អនុវិទ្យាល័យ តាមសាលារៀនមួយចំនួនហើយ។ ចំណែកបេក្ខជនជាប់និទ្ទេស A ១០៨ នាក់ ពួកគេបានទទួលអាហារូបករណ៍ទៅសិក្សានៅក្រៅប្រទេស និងមួយចំនួនកំពុងបន្តសិក្សានៅតាមគ្រឹះស្ថានថ្នាកឧត្តមសិក្សានៅក្នុងប្រទេស។

សម័យប្រឡង សញ្ញាបត្រមធ្យមសិក្សាទុតិយភូមិ ចំណេះទូទៅ និងបំពេញវិជ្ជា(បាក់ឌុប) នឹងប្រព្រឹត្តឡើងរយៈពេលពីរថ្ងៃ គឺថ្ងៃទី២២ និងថ្ងៃទី២៣ ខែសីហា ឆ្នាំ២០១៦។ ទាំងថ្នាក់វិទ្យាសាស្ត្រពិត និងថ្នាក់វិទ្យាសាស្ត្រសង្គម បេក្ខជនត្រូវប្រឡង ៧វិញ្ញាសាដូចគ្នា។

សម័យប្រឡងបាក់ឌុបឆ្នាំ២០១៦នេះ មានបេក្ខជនសរុបចំនួន៩៣.៧៥២នាក់ មានមណ្ឌលប្រឡងចំនួន ១៥៧មណ្ឌល និង ៣.៧៨១បន្ទាប់ នៅទូទាំង២៥ រាជធានី-ខេត្ត។សម្រាប់មណ្ឌលប្រឡងនៅរាជធានីភ្នំពេញ និងខេត្តកណ្ដាល ក្រសួងនឹងប្រកាសលទ្ធផលនៅរសៀលថ្ងៃទី១៣ ខែកញ្ញា ឆ្នាំ២០១៦ រីឯមណ្ឌលនៅតាមបណ្តាខេត្តនានា នឹងប្រកាសនៅថ្ងៃទី១៤ ខែកញ្ញា ឆ្នាំ២០១៦ ៕