ជាតិ
លោក ពេជ្រ ប៊ុនធិន ស្នើឲ្យក្រសួង ស្ថាប័ន ពន្លឿនការដំឡើងស័ក្តិមន្ត្រីរាជការប្រចាំឆ្នាំ២០១៦
× រដ្ឋមន្ត្រីក្រសួងមុខងារសាធារណៈ នៅថ្ងៃទី២ ខែសីហា បានចេញសេចក្តីជូនដំណឹងមួយ ដោយបានស្នើឲ្យក្រសួង ស្ថាប័ន ពន្លឿនការដំឡើងស័ក្តិមន្ត្រីរាជការប្រចាំឆ្នាំ២០១៦ ។ សំណើនេះ គឺដើម្បីឲ្យការដំឡើងថ្នាក់ឋានន្តរស័ក្តិប្រចាំឆ្នាំ២០១៦ ជូនមន្ត្រីរាជការស៊ីវិលឲ្យបានទាន់ពេលវេលា និងជាផលប្រយោជន៍ដល់មន្ត្រីរាជការ។
សេចក្តីជូនដំណឹងបានសរសេរយ៉ាងនេះថា៖ «សូមជម្រាបជូនគ្រប់ក្រសួងស្ថាប័នពាក់ព័ន្ធមេតា្តយកចិត្តទុកដាក់លើការដំឡើងថ្នាក់ ឋានន្តរស័ក្តិជូនមន្ត្រីរាជការស៊ីវិល តាមវេនជ្រើសរើស និងវេនអតីតភាពការងារឲ្យបានឆាប់រហ័ស និងមានប្រសិទ្ធភាពខ្ពស់ក្នុងការចូលរួមសហការអនុវត្តន៍»។
លោក ពេជ្រ ប៊ុនធិន បានបញ្ជាក់នៅក្នុងសេចក្តីជូនដំណឹងនោះថា ក្រសួងមុខងារសាធារណៈ ឈប់ទទួលការស្នើសុំដំឡើងថ្នាក់ឋានន្តរស័ក្តិប្រចាំឆ្នាំ២០១៦ ត្រឹមថ្ងៃទី ១៥ ខែកញ្ញា ហើយក្រសួង ស្ថានប័ននីមួយៗត្រូវភ្ជាប់ឯកសារពាក់ព័ន្ធឲ្យបានគ្រប់គ្រាន់ និងឯកសាដំឡើងថ្នាក់ឋានន្តរស័ក្តិចុងក្រោយមកជាមួយផង។ ក្នុងករណីមានការយឺតយ៉ាវ ឬខកខាន តាមកាលបរិច្ឆេទខាងលើ ក្រសួងមុខងាសាធារណៈ នឹងធ្វើរបាយការណ៍ទៅនាយករដ្ឋ មន្ត្រី ចំពោះក្រសួង ស្ថាប័នណា ដែលមានការយឺតយ៉ាវ ឬខកខាន ដំឡើងថ្នាក់ឋានន្តរស័ក្តិនេះ។
សម្រាប់ការដំឡើងថ្នាក់ ឋានន្តរស័ក្តនៅឆ្នាំបន្តបន្ទាប់ គ្រប់ក្រសួង ស្ថាប័ន ត្រូវផ្តល់សំណុំឯកសារឲ្យបានយ៉ាងយូរត្រឹមថ្ងៃទី១៥ ខែមករា រៀងរាល់ឆ្នាំ ដើម្បីឲ្យក្រសួងមុខងារសាធារណៈ មានពេលវេលាគ្រប់គ្រាន់ក្នុងការពិនិត្យ និងផ្តល់ទិដ្ឋាការបានទាន់ពេលវេលា។
ដោយឡែកចំពោះមន្ត្រីរាជការដែលដល់អាយុចូលនិវត្តន៍នៅឆ្នាំបន្ទាប់ ការដំឡើងឋានន្តរស័ក្តិកិត្តិយស ក្រសួង ស្ថាប័ន ត្រូវលើកសំណើសុំដំឡើងថ្នាក់ឋានន្តរស័ក្តិ ដូចមានចែងក្នុងមាត្រាទី ៣២ នៃច្បាប់ស្តីពីសហលក្ខន្តិកៈមន្ត្រីរាជការស៊ីវិល មកក្រសួងមុខងារសាធារណៈយ៉ាងតិចមួយឆ្នាំមុនពេលចូលនិវត្តន៍ ដើម្បីឲ្យក្រសួងមុខងារសាធារណៈ មានពេលវេលាគ្រប់គ្រាន់ ក្នុងការផ្តល់ទិដ្ឋាការបម្រែបម្រួលស្ថានភាពរដ្ឋបាល(បៀវត្ស) និងបោះពុម្ពសាលាកប័ត្រចូលនិវត្តន៍ ឲ្យស្របតាមឋានន្តរស័ក្តិ និងថ្នាក់ចុងក្រោយរបស់និវន្តន៍ជន៕
© រក្សាសិទ្ធិដោយ thmeythmey.com