អន្តរជាតិ
ប៉ូលិសហ្វីលីពីនសម្លាប់អង្គរក្សអភិបាលក្រុងដែលពាក់ព័ន្ធគ្រឿងញៀនអស់៦នាក់
× បន្ទាប់ពីទទួលបញ្ជាពីប្រធានាធិបតី Rodrigo Duterte ឲ្យបាញ់សម្លាប់អ្នកដែលរឹងទទឹងក្នុងប្រតិបត្តិការបង្ក្រាបគ្រឿងញៀន ប៉ូលិសហ្វីលីពីនបាញ់សម្លាប់អង្គរក្សរបស់លោក Rolando Espinosa Senior ជាអភិបាលក្រុងម្នាក់ ដែលជាប់ពាក់ព័ន្ធនឹងការជួញដូរគ្រឿងញៀន។ ចំណែកកូនប្រុសរបស់អភិបាលក្រុងម្នាក់នេះ កំពុងរត់គេចខ្លួននៅឡើយមកទល់ពេលនេះ។
មនុស្ស៦នាក់ ត្រូវបានបាញ់សម្លាប់ក្នុងការបាញ់ប្រហាររវាងប៉ូលិស និងអង្គរក្សរបស់អភិបាលក្រុង លោក Rolando Espinosa Senior បន្ទាប់ពីលោកបានប្រគល់ខ្លួនឲ្យប៉ូលិសរួចហើយនោះ។ លោក Espinosa ជាអភិបាលក្រុង Albuera និងត្រូវជាប់សង្ស័យករណីជួញដូរថ្នាំញៀន។ កន្លងមក ប្រធានាធិបតីហ្វីលីពីន Duterte ចេញបញ្ជាឲ្យលោកបាញ់ចោល បើអភិបាលក្រុងរូបនេះ និងកូនប្រុសនៅតែចចេសរឹងរូសមិនព្រមចូលខ្លូនទទួលទោស។
មេប៉ូលិសប្រចាំតំបន់ លោក Elmer Beltejar និយាយថា ប៉ូលិសកំពុងតែល្បាតនៅក្បែរបរិវេណផ្ទះរបស់លោកអភិបាលក្រុង Espinosa ហើយក៏ពើបប្រទះការប្រយុទ្ធជាមួយអ្នកយាមផ្ទះ ដោយប៉ូលិសបានសម្លាប់ពួកគេអស់ ៦នាក់។ បើតាមសារព័ត៌មាន The National លោក Espinosa បានប្រគល់ខ្លួនដល់មេប៉ូលិសជាតិ លោកឧត្តមសេនីយ៍ Ronald dela Rosa ដោយលោកត្រូវបានចោទប្រកាន់ថាបានការពារអ្នកជួញដូរថ្នាំញៀន ដែលរួមទាំងកូនប្រុសលោកឈ្មោះ Erwin ផងដែរ។
អភិបាលក្រុងរូបនេះ បានចូលខ្លួនដល់មន្ត្រីប៉ូលិសតែមួយថ្ងៃប៉ុណ្ណោះ មុនឱសានវាទរបស់លោក Duterte ដែលចេញបញ្ជាប៉ូលិសឲ្យបាញ់លោក និងកូនប្រុសចោល។ មេប៉ូលិសជាតិ លោក dela Rosa ក៏និយាយដែរថា លោក Erwin នឹងត្រូវបាញ់សម្លាប់ បើរកឃើញថា បានបាញ់តដៃជាមួយប៉ូលិស។
ជាមួយនឹងយុទ្ធនាការចាប់ខ្លួនមន្ត្រីថ្នាក់ខ្ពស់បែបនេះ យុទ្ធនាការបោសសម្អាតគ្រឿងញៀនរបស់លោក Rodrigo Duterte បានងាកពីគោលដៅអ្នកលក់ថ្នាំញៀននៅតាមដងផ្លូវ និងបានដាក់គោលដៅលើមន្ត្រីជាន់ខ្ពស់ និងបណ្ដាអភិបាលក្រុងវិញ។ ប្រធានាធិបតីហ្វីលីពីនរូបនេះ បញ្ជាក់ហើយថា លោកនឹងមិនបញ្ឈប់យុទ្ធនាការនេះទេ បើទោះជាត្រូវអស់តំណែងក៏ដោយ។
ចាប់តាំងពីឡើងកាន់អំណាចក្នុងខែមិថុនា លោក Duterte បានចេញយុទ្ធនាការកណ្ដាប់ដៃដែកបង្ក្រាប និងបានសម្លាប់អ្នកជួញដូរគ្រឿងញៀនអស់ជាងបួនរយនាក់មកហើយ។ លើសពីនេះ លោកក៏លើកទឹកចិត្តដល់មន្ត្រីប៉ូលិស និងជនស៊ីវិលឲ្យបាញ់អ្នកជួញដូរគ្រឿងញៀន និងសន្យាផ្ដល់ប្រាក់រង្វាន់ដល់អ្នកណាដែលអាចផ្ដល់ដំណឹងដល់ការចាប់ខ្លួនមេខ្លោងលក់គ្រឿងញៀន៕
© រក្សាសិទ្ធិដោយ thmeythmey.com