ជាតិ
កម្ពុជាគ្មានគម្រោងសង់អាកាសយានដ្ឋានអន្តរជាតិថ្មីនៅខេត្តកំពង់ស្ពីឡើយ
× ភ្នំពេញ៖ កម្ពុជាមិនគម្រោងសាងសង់អាកាសយានដ្ឋានអន្តរជាតិថ្មី ក្នុងទឹកដីខេត្តកំពង់ស្ពឺឡើយ។ សម្តេច ហ៊ុន សែន បានបដិសេធព័ត៌មានគម្រោងសាងសង់អាកាសយានដ្ឋានយន្តហោះថ្មី ក្នុងខេត្តកំពង់ស្ពឺ តែសម្តេចពុំទាន់បញ្ជាក់ពីមូលហេតុ និងទីតាំងគម្រោងថ្មីជាក់លាក់នៅឡើយ។ ប្រមុខរដ្ឋាភិបាលលើកឡើងបែបនេះ ក្នុងពិធីសំណេះសំណាល ជាមួយមន្ត្រីក្នុងខេត្តកំពង់ស្ពឺ នៅថ្ងៃទី៤ ខែសីហានេះ។
កាលពីថ្ងៃទី១៤ ខែកក្កដា ឆ្នាំ២០១៦ កន្លងទៅនេះ អភិបាលរងរាជធានីភ្នំពេញ បានស្នើក្រុមហ៊ុនអាកាសយានដ្ឋានកម្ពុជា (Cambodia Airport) ពិចារណាសង់អាកាសយានដ្ឋានភ្នំពេញថ្មី ក្នុងខេត្តកំពង់ស្ពឺ ចម្ងាយពីភ្នំពេញចន្លោះ ៦០ ទៅ៧០គីឡូម៉ែត្រ។ លោកបានលើកមូលហេតុសង់ព្រលានយន្តហោះថ្មីនេះជិតភ្នំពេញនេះក្នុងជំនួបពិភាក្សាការងារថា វាជួយសម្រួលដល់ការធ្វើដំណើរ និងតម្លៃទិញដីសង់ព្រលាន។
Cambodia Airport បានស្នើអាជ្ញាធររាជធានីភ្នំពេញពិនិត្យគោលការណ៍សង់អាកាសយានដ្ឋានអន្តរ ជាតិថ្មី លើផ្ទៃដីទំហំប្រមាណ ១៥០០ហិកតា ខណៈអាកាសយានដ្ឋានបច្ចុប្បន្នទំហំជាង ៤០០ហិកតា និងអាយុជិត ៧០ឆ្នាំ ពោលគឺតាំងទសវត្សរ៍ឆ្នាំ១៩៥០។ ភាគីក្រុមហ៊ុនបានស្នើទីតាំងព្រលានថ្មីចំនួន ៤ ឲ្យអាជ្ញាធររាជធានី ពិចារណាផលប៉ះពាល់ នៅថ្ងៃទី១៤ ខែកក្កដា ឆ្នាំ២០១៦នេះ មុនពេល គម្រោង លេចចេញជារូបរាង រយៈពេលជាង ១០ឆ្នាំ គឺអំឡុងឆ្នាំ ២០២៥ ឬ ២០៣០ខាងមុខ។
លោក Jurgen Renner អ្នកគ្រប់គ្រងជាន់ខ្ពស់ នៃសមាគមដឹកជញ្ជូនផ្លូវអាកាសអន្ដរជាតិ (International Air Transport Association)បានលើកពីទីតាំងព្រលានយន្តហោះថ្មីចំនួន ៤កន្លែង ដែលមានលទ្ធភាពសាងសង់ ឲ្យអាជ្ញាធររាជធានី ពិចារណាពីផលប៉ះពាល់ក្នុងគម្រោង មុនពេលពួកគេដាក់គម្រោងសិក្សានេះ ឲ្យរដ្ឋាភិបាលកម្ពុជា ដើម្បីពិនិត្យសម្រេច។
អ្នកគ្រប់គ្រងជាន់ខ្ពស់ នៃសមាគម IATA ដែលមានមូលដ្ឋានក្នុងប្រទេសកាណាដា បានបន្តរៀបរាប់ពីផលវិជ្ជមានក្នុងពីសាងសង់ព្រលានយន្តហោះ ថ្មី ថាវានឹងជួយកាត់បន្ថយ ការកកស្ទះចរាចរក្នុងក្រុង បច្ចុប្បន្ន ដោយសារក្រុមហ៊ុន នឹងសង់ផ្លូវ Highway ធំទូលាយ ឬអាចសង់ផ្លូវរថភ្លើងពីព្រលានយន្តហោះមកកណ្តាលរាជធានីភ្នំពេញ ហើយថា វានឹងមិនបង្កសំឡេងយន្តហោះរំខាន និងផលប៉ះពាល់បរិស្ថាន ព្រមទាំងគ្រោះអាសន្នជាយថាហេតុក្នុងទីក្រុងផងដែរ។
កន្លងមក ក្រសួងទេសចរណ៍រំពឹងថា ចំនួនទេសចរនឹងកើនដល់ជាង ៨លាននាក់នៅឆ្នាំ២០២០ ខណៈព្រលានយន្តហោះអន្តរជាតិភ្នំពេញទទួលជាង ៤លាននាក់ ស្របពេលចំណុះព្រលានសព្វថ្ងៃនេះ ទទួលបានតែ ៥លាននាក់ប៉ុណ្ណោះ។ តាមរបាយការណ៍តួលេខក្រសួងទេសចរណ៍ឆ្នាំ ២០១៥ កម្ពុជាទទួលបានភ្ញៀវទេសចរបរទេសចំនួន២លាន៨សែននាក់កាលពីឆ្នាំ២០១១ និងចំនួនភ្ញៀវទេសចរបរទេសកើនដល់ជាង ៤លាននាក់ ក្នុងឆ្នាំ២០១៥៕
Tag:
អាកាសយានដ្ឋាន
អាកាសចរស៊ីវិល
© រក្សាសិទ្ធិដោយ thmeythmey.com