«Cambodia, Kingdom of Wonder – Feel the Warmth» ជាពាក្យស្លោកទេសចរណ៍ថ្មី

ជាតិ

«Cambodia, Kingdom of Wonder – Feel the Warmth» ជាពាក្យស្លោកទេសចរណ៍ថ្មី

05, Aug 2016 , 9:19 pm

រូបភាព

ដោយ: ញឹក ស្រីល័ក្ខ (Nhek Sreyleak)

ក្រសួងទេសចរណ៍បានចេញសេចក្ដីជូនដំណឹងស្ដីពីការប្រើប្រាស់ពាក្យស្លោក «កម្ពុជា ព្រះរាជាណាចក្រអច្ឆរិយៈ ផ្ដល់ភាពកក់ក្ដៅដល់ទេសចរណ៍» «CAMBODIA Kingdom of Wonder-Feel the Warmth» ចាប់ពីពេលនេះតទៅ ដើម្បីចូលរួមចំណែកធ្វើឲ្យកម្ពុជាក្លាយជាគោលដៅទេសចរណ៍ ប្រកបដោយភាពទាក់ទាញ។

យោងតាមសេចក្តីជូនដំណឹងលើទំព័រហ្វេសប៊ុកផ្លូវការរបស់ក្រសួងទេសចរណ៍ស្ដីពី ការដាក់ឲ្យប្រើប្រាស់ពាក្យស្លោក «កម្ពុជា ព្រះរាជាណាចក្រអច្ឆរិយៈ ផ្ដល់ភាពកក់ក្ដៅដល់ទេសចរណ៍»។ ពាក្យស្លោកនេះ បានផ្ដល់អនុសាសន៍ពីសំណាក់ សម្តេច ហ៊ុន សែន ក្នុងពិធីអបអរសាទរទទួលជ័យលាភី «កម្ពុជាជាគោលដៅទេសចរណ៍ល្អបំផុតលើពិភពលោកឆ្នាំ២០១៦» ដើម្បីចូលរួមជំរុញយុទ្ធនាការផ្សព្វផ្សាយទេសចរណ៍កម្ពុជា។

ការជំរុញឲ្យប្រើប្រាស់ពាក្យស្លោកនេះ ដើម្បីក្លាយជាការផ្សព្វផ្សាយប្រកបដោយសក្ដានុពលទៅកាន់ពិភពលោក និងចូលរួមចំណែកធ្វើឲ្យប្រទេសកម្ពុជាក្លាយជាគោលដៅទេសចរណ៍ ប្រកបដោយភាពទាក់ទាញ និងភាពកក់ក្ដៅដល់ភ្ញៀវទេសចរណ៍ជាតិ និងអន្តរជាតិ។

ក្រសួងទេសចរណ៍ អំពាវនាវដល់ក្រសួង ស្ថាប័នពាក់ព័ន្ធ មន្ទីរទេសចរណ៍ និងសាធារណជនទូទាំងប្រទេស ចូលរួមប្រើប្រាស់ពាក្យស្លោកនេះ អោយមានប្រសិទ្ធភាព ក្នុងការផ្សព្វផ្សាយវិស័យទេសចរណ៍កម្ពុជា ទៅកាន់ពិភពលោក។ ម្យ៉ាងវិញទៀត ការផ្សព្វផ្សាយក្នុងការទាក់ទាញភ្ញៀវទេសចរណ៍មកទស្សនាប្រទេសកម្ពុជា ដែលជាប្រទេសមានវប្បធម៌ និងមានអរិយធម៌ដ៏ចំណាស់ផងដែរ៕