ពីនេះ ពីនោះ
ស្ដាយធនធានយុវជន មិនបានកាន់ការងារមូលដ្ឋានច្រើន
× ភ្នំពេញ៖ ពីមួយឆ្នាំទៅមួយឆ្នាំ ក្រសួងផលិតធនធានមនុស្សបានផលិតគ្រាប់ពូជថ្មី សម្រាប់ សង្គម រាប់ម៉ឺននាក់ ដែលមកពីបណ្ដាខេត្តនានាទូទាំងប្រទេស។ គ្រប់ខេត្តគ្រប់ក្រុង តែងតែ មានក្មេងជំនាន់ថ្មីដែលមានសមត្ថភាពគ្រប់គ្រាន់ អាចកាន់ការងារប្រទេសបាន ទាំង ជំនាញ គិត ជំនាញ់បច្ចេកទេស និងមានគំនិតថ្មីដើម្បីនាំជាតិទៅរកភាពរីកចម្រើន។ ប៉ុន្តែហេតុអ្វីបានជាមន្ត្រីនៅថ្នាក់មូលដ្ឋាន បែរជាភាគច្រើនគឺជាមន្ត្រីចាស់ អាយុច្រើន?
ជាការពិត មន្ត្រីចាស់អាយុច្រើន មិនមែនជាបញ្ហា ប្រសិនបើការគ្រប់គ្រងកិច្ចការបានល្អ មានផែនការច្បាស់លាស់ ជួយរៀបចំថ្នាក់មូលដ្ឋានបានល្អ។
ប៉ុន្តែបើអាចបញ្ចូលបញ្ញវន្តជំនាន់ក្រោយឲ្យបានកាន់តែច្រើនគឺកាន់តែល្អប្រសើ។ ក្នុងន័យថា បណ្ដុះពួកគេឲ្យយល់ការងារដឹកនាំភូមិ ឃុំ ស្រុកឲ្យហើយ ដើម្បីស្នងការងារក្រោយពេលមន្ត្រីចាស់ចូលនិវត្តន៍ទៅ។ ក្រោយពេលមន្ត្រីចាស់ឈប់ពីការងារ ពេលនោះរដ្ឋមិនភ័យព្រួយខ្លាំងក្នុងការជ្រើសមនុស្ស ព្រោះខ្លួនបានបណ្ដុះរួចរាល់។
ចំណុចនេះ អាចនិយាយថា មិនមែនជាមន្ត្រីពេញសិទ្ធិក៏បាន តែបើបើកឱកាសឲ្យក្មេងៗ គាត់បានហ្វឹកហាត់ការងារ ពីរបៀបដឹកនាំ និងកិច្ចការថ្នាក់មូលដ្ឋាន ការងាររដ្ឋបាល បន្ទាប់ពីមន្ត្រីចាស់ នោះគឺជាការប្រសើមួយ។ បន្ថែមពីនេះវា ក៏ជាឱកាសដើម្បីឲ្យស្វែងយល់ពីរបៀបដឹកនាំផ្សារភ្ជាប់ជាមួយទ្រឹស្ដីដែលបានរៀននៅសាលាផង។
ហេតុនេះ វាគឺពេលមួយដែលត្រូវគិតពីការធ្វើកំណែទម្រង់មន្ត្រីថ្នាក់ក្រោម។ ហើយគឺជាឱកាសមួយដែល យុវជនសម័យបច្ចេកវិទ្យា ចូលរួមយ៉ាងសំខាន់ ដើម្បីបម្រើកិច្ចការសង្គម និងការរៀបចំគម្រោងអភិវឌ្ឍន៍ភូមិឃុំ។ យុវជន ក៏ត្រូវរៀបចំខ្លួន ឯងទាំងសីលធម៌ គុណធម៌ សមត្ថភាព គោរព និងផ្តល់តម្លៃគ្នាទៅវិញទៅមក ដើម្បីសហការគ្នារៀបចំសង្គមជាតិ។
© រក្សាសិទ្ធិដោយ thmeythmey.com