អន្តរជាតិ
លោក Duterte ប្រកាសបន្តសម្លាប់ឧក្រិដ្ឋជនគ្រឿងញៀន ដោយមិនខ្វល់ពីសិទ្ធិមនុស្ស
× ទោះជាកងកម្លាំងប៉ូលិសភីលីពីន សម្លាប់អ្នកជាប់ពាក់ព័ន្ធគ្រឿងញៀនអស់រាប់រយនាក់ និងថែមទាំងរងការរិះគន់ពីអង្គការសហប្រជាជាតិក៏ដោយ ប្រធានាធិបតីហ្វីលីពីន Rodrigo Duterte ប្រកាសបន្តយុទ្ធនាការបាញ់សម្លាប់អ្នកលក់គ្រឿងញៀនតទៅទៀត ដោយមិនខ្វល់ពីបញ្ហាសិទ្ធិមនុស្សអ្វីឡើយ។ មិនតែប៉ុណ្ណោះ លោក ក៏ចេញមុខការពារមន្ត្រីប៉ូលិសដែលចូលរួមក្នុងការប្រតិបត្តិការបោសសម្អាតនេះ ពីការចោទប្រកាន់ផ្សេងៗផងដែរ។
ពាក្យរិះគន់ពីសហគមន៍អន្តរជាតិជុំវិញការសម្លាប់រង្គាលឈ្មួញគ្រឿងញៀន មិនបានបង្អាក់ជំហរប្រធានាធិបតីដៃដែករបស់ហ្វីលីពីន Rodrigo Duterte នោះឡើយ។ លោក Duterte បានប្រកាសថា លោកនឹងបន្តអនុវត្តបញ្ជា «បាញ់សម្លាប់» អ្នកជាប់ពាក់ព័ន្ធគ្រឿងញៀន ដរាបណាលោកនៅកាន់តំណែងជាប្រធានាធិបតី ហើយលោក ក៏មិនអើពើនឹងគោលការណ៍សិទ្ធិមនុស្សអីនោះដែរ។
ពីសន្និសីទកាសែតក្នុងទីក្រុង Davao ប្រធានាធិបតីហ្វីលីពីនរូបនេះ និយាយថា យុទ្ធនាការ «បាញ់សម្លាប់» នឹងនៅតែបន្តធ្វើ រហូតដល់ថ្ងៃចុងក្រោយនៃអាណត្តិរបស់លោក ប្រសិនបើលោកនៅមានជីវិតនោះ។ សុន្ទរកថារបស់លោក Duterte ជាអង់គ្លេសចេញផ្សាយនៅថ្ងៃទី៦ ខែសីហា ដោយវិមានប្រធានាធិបតី បញ្ជាក់ដែរ មន្ត្រីរដ្ឋាភិបាលណាក៏ដោយ ដែលប្រើតួនាទីរបស់ខ្លួនចូលពាក់ព័ន្ធនឹងជំនួញបែបនេះ គឺស្ថិតលើគេនៃបញ្ជីរបស់លោក។
ជាមួយគ្នានេះ ទីភ្នាក់ងារព័ត៌មាន AFP ផ្សាយដែរថា លោកប្រធានាធិបតី Duterte ក៏បានផ្ដល់ឲ្យប៉ូលិស និងទាហាន នូវការធានាអភ័យឯកសិទ្ធិពីការចោទប្រកាន់ទាំងឡាយ ក្នុងពេលអនុវត្តកាត្វកិច្ចនៃយុទ្ធនាការ «បាញ់សម្លាប់» របស់លោកផងដែរ។ ប្រធានាធិបតីហ្វីលីពីន ក៏បានទាត់ចោលពាក្យរិះគន់ដែលថា មនុស្សជាងបួនរយនាក់ដែលត្រូវប៉ូលិសសម្លាប់ គឺជារឿងឃោរឃៅ។
ចាប់តាំងពីការចូលកាន់តំណែងនៅចុងខែឧសភារបស់លលោក Duterte មនុស្សជាង៨០០នាក់ ត្រូវបានសម្លាប់ក្នុងយុទ្ធនាការបោសសម្អាតឧក្រិដ្ឋជនគ្រឿងញៀននៅទូទាំងហ្វីលីពីន។ ទីភ្នាក់ងារប្រឆាំងគ្រឿងញៀន និងស្ថាប័នសិទ្ធិមនុស្សរបស់អង្គការសហប្រជាជាតិ បានរិះគន់នឹងការសម្លាប់រង្គាល ក្នុងយុទ្ធនាការសម្អាតគ្រឿងញៀនចាប់តាំងពីជនស៊ីវិល ដល់មន្ត្រីជាន់ខ្ពស់។
យ៉ាងណាមិញ ប្រធានាធិបតី Duterte ឆ្លើយតបវិញថា អង្គការក្រៅរដ្ឋាភិបាលទាំងអស់នោះ បានតវ៉ាបញ្ហានេះទៅអង្គការសហប្រជាជាតិ ប៉ុន្តែនេះមិនមែនជារឿងរបស់ពួកគេទេ។ លោកបន្ថែមថា លោក កំពុងតែធ្វើសង្គ្រាម ហើយលោកក៏មិនខ្លាចយុទ្ធនាការបោសសម្អាតនេះ ធ្វើឲ្យលោកអស់តំណែងនោះដែរ។ លោកសង្កត់ធ្ងន់ថា ប្រជាជនហ្វីលីពីន កំពុងស្រេកឃ្លានយុត្តិធម៌ ពីអ្នកប្រើប្រាស់គ្រឿងញៀនទាំងនោះ៕
Tag:
Rodrigo Duterte
ភីលីពីន
© រក្សាសិទ្ធិដោយ thmeythmey.com