កីឡាជាតិ
ជាតិ
កីឡាករ ហុង ផេង និង ឃួន ឡាបូរ៉ាវី កំពុងស្ថិតក្នុងស្ថានភាពរបួសដើរដោយប្រើឈើច្រត់ រូបភាព៖ ហ្វេសប៊ុកក្លិបបឹងកេងអង្គរ
× ខ្សែការពាររបស់ក្លិបបឹងកេតអង្គរ ហុង ផេង និងខ្សែប្រយុទ្ធ ឃួន ឡាបូរ៉ាវី កំពុងស្ថិតនៅក្នុងស្ថានភាពដើរដោយប្រើឈើច្រត់នៅឡើយ បន្ទាប់ពីរងរបួសក្បាលជង្គង់ ក្នុងអំឡុងពេលប្រកួតជាមួយក្រុមណាហ្គាវើល នៅពហុកីឡដ្ឋានជាតិកាលពីថ្ងៃទី៧ ខែសីហា។ របួសរបស់ពួកគេ ត្រូវសម្រាកព្យាបាលយ៉ាងហោចណាស់៣សប្តាហ៍។
ដោយសារស្ថានភាព របួសមានភាពសភាពធ្ងន់ធ្ងរ ខ្សែការពារ និងប្រយុទ្ធរបស់ក្លិបបឹងកេងអង្គរ ហុង ផេង និង ឃួន ឡាប៉ូរ៉ាវី កំពុងសម្រាកព្យាបាលនៅឡើយ ក្រោយពីរងរបួស ក្នុងពេលប្រកួតជាមួយក្រុមណាហ្គាវើល កាលពីថ្ងៃទី៧ ខែសីហា។ លោក ប្រាក់ សុវណ្ណរ៉ា គ្រូបង្វឹកក្លិបបឹងកេងអង្គរ បានបញ្ជាក់ថាស្ថានភាពរបួសរបស់កីឡាករទាំងពីររូប កំពុងស្ថិតនៅក្នុងស្ថានភាពធ្ងន់ធ្ងរនៅឡើយ ពោលគឺការដើររបស់ពួកគេត្រូវប្រើឈើច្រត់ដើម្បីជំនួយ។ បើយោងតាមវេជ្ជបញ្ជារបស់គ្រូពេទ្យ កីឡាករទាំងពីរត្រូវសម្រាកព្យាបាលយ៉ាងហោចណាស់៣សប្តាហ៍ ហើយ១សប្តាហ៍ដំបូង មិនអនុញ្ញាតឲ្យពួកគេដើរដោយជើងទទេនោះទេ។ នេះជាការបញ្ជាក់របស់ គ្រូបង្វឹកប្រាក់ សុវណ្ណរ៉ា ដែលបានបន្តថា កីឡាករទាំងពីរ អាចហ្វឹកហាត់ និងប្រកួតបានធម្មតាវិញ ក្នុងរយៈពេល៣សប្តាហ៍ខាងមុខនេះ។
ទោះបីជាយ៉ាងនេះក្តី ខ្សែការពារដ៏ឆ្នើមរបស់បឹងកេតអង្គរ ហុង ផេង ប្រហែលអវត្តមានសម្រាប់៣ប្រកួត ដែលនៅសល់របស់បឹងកេតអង្គរ នៃពានរង្វាន់ក្របខណ្ឌមិត្តហ្វូនខេមបូឌានលីក ព្រោះរបួសរបស់គេមានស្ថានភាពធ្ងន់។ ចំណែកខ្សែប្រយុទ្ធ ឃួន ឡាបូរ៉ាវី ប្រហែលជាអាចជួយក្រុម ក្នុងជំនួបចុងក្រោយជាមួយក្រុមភ្នំពេញក្រោន។ មានន័យថា រូបគេត្រូវអវត្តមានតែពីរប្រកួតជាមួយប៉ូលិស និងព្រះខ័នរាជស្វាយរៀងប៉ុណ្ណោះ។
កីឡាករ ហុង ផេង និង ឃួន ឡាបូរ៉ាវី មិនត្រឹមតែជាកីឡាករដ៏ល្អសម្រាប់ក្លិបប៉ុណ្ណោះទេ ថែមទាំងជាកីឡាករល្អក្នុងក្រុមជម្រើសជាតិ និង Cambodian All Star ដូច្នេះសម្រាប់ការអវត្តមានរបស់កីឡាករទាំងពីរនេះ លោក ប្រាក់ សុវណ្ណរ៉ា បានចាត់ទុកថា វាមានផលប៉ះពាល់យ៉ាងខ្លាំងសម្រាប់ក្លិបបឹងកេត និងជម្រើសជាតិ។ ទោះបីជាយ៉ាងនេះក្តីលោកនៅតែមានសង្ឃឹមថា បឹងកេងអង្គរអាចលើកពាននៅរដូវកាលនេះ ព្រោះលោកមានកីឡាករបម្រុងល្អៗជាយ៉ាងច្រើនរូបទៀត។
គួរបញ្ជាក់ថា កីឡាករ ហុង ផេង និង ឃួន ឡាបូរ៉ាវី បានរងរបួសក្បាលជង្គង់ អំឡុងពេលតទល់យ៉ាងស្វិតស្វាញដោយគ្មានការស៊ុតបញ្ចូលទីគ្នាជាមួយក្រុមណាហ្គាវើលក្នុងសប្តាហ៍ទី១៥ នៃពានរង្វាន់ក្របខណ្ឌមិត្តហ្វូនខេមបូឌានលីកប្រចាំឆ្នាំ២០១៦ នៅពហុកីឡដ្ឋានជាតិកាលពីថ្ងៃទី៧ ខែសីហា កន្លងទៅនេះ៕
Tag:
ហុង ផេង
ឃួន ឡាបូរ៉ាវី
ប្រាក់ សុវណ្ណរ៉ា
© រក្សាសិទ្ធិដោយ thmeythmey.com