កម្ពុជាបណ្តេញជនអន្តោប្រវេសន៍វៀតណាមខុសច្បាប់ជិត ១ម៉ឺននាក់ ក្នុងរយៈពេលជិត ៣ឆ្នាំ

ជាតិ

កម្ពុជាបណ្តេញជនអន្តោប្រវេសន៍វៀតណាមខុសច្បាប់ជិត ១ម៉ឺននាក់ ក្នុងរយៈពេលជិត ៣ឆ្នាំ

09, Aug 2016 , 11:14 am

រូបភាព

ដោយ:

ភ្នំពេញ៖ កម្ពុជាបានបណ្តេញជនអន្តោប្រវេសន៍ខុសច្បាប់ ៦៨សញ្ជាតិ ចំនួន ១០៧៨៧នាក់ ក្នុងនោះ នារី ១៧០៤ នាក់ គិតចាប់ពីឆ្នាំ២០១៤ រហូតដល់ខែសីហា ឆ្នាំ២០១៦នេះ។ ក្នុងចំណោមជនអន្តោប្រវេសន៍ខុសច្បាប់ជាង ១ ម៉ឺននាក់នោះ មានជនជាតិវៀតណាមចំនួន ៩២១៧ នាក់។ នេះបើតាមស្ថិតិជនបរទេសដែលត្រូវបានបណ្តេញចេញពីកម្ពុជារបស់អគ្គនាយកដ្ឋានអន្តោប្រវេសន៍ នៃក្រសួងមហាផ្ទៃ។

ជនអន្តោប្រវេសន៍វៀតណាមខុសច្បាប់ចំនួន ៩២១៧ នាក់ ក្នុងនោះ ស្រីចំនួន ១៥៥៤ នាក់ ត្រូវបានរដ្ឋាភិបាល បណ្តេញចេញពីប្រទេសកម្ពុជាទៅប្រទេសវៀតណាមវិញ ក្នុងរយៈពេលជិត ៣ ឆ្នាំ នេះ។នេះបើតាមរបាយការណ៍របស់នាយកដ្ឋានស៊ើបអង្កេត និងអនុវត្តនីតិវិធីនៃអគ្គនាយកដ្ឋានអន្តោប្រវេសន៍ ដែលបានបង្ហាញនៅថ្ងៃទី ២ ខែសីហា ស្តីពីស្ថិតិនៃការបណ្តេញជនអន្តោប្រវេសន៍ចេញពីកម្ពុជា ចាប់ពីពេលក្រសួងមហាផ្ទៃ បង្កើតនៃអគ្គនាយកដ្ឋានអន្តោប្រវេសន៍ នៅឆ្នាំ ២០១៤ កន្លងទៅ ក្រោយការបោះឆ្នោត ជាតិអាណត្តិទី៥។ ស្ថិតិដដែលបន្តថា នៅក្នុងឆ្នាំ ២០១៦ នេះ គិតត្រឹមថ្ងៃទី ២ ខែសីហានេះ កម្ពុជាបានបណ្តេញជនអន្តោប្រវេសន៍វៀតណាមខុសច្បាប់ចំនួន ១,៨៩៣នាក់ ក្នុងនោះ ស្រី ៤៤៥នាក់ ចេញពីកម្ពុជា។

បើនិយាយពីជនអន្តោប្រវេសន៍ខុសច្បាប់ទាំងអស់ដែលកម្ពុជាបានបណ្តេញចេញ ក្នុងរយៈពេលជិត ៣ ឆ្នាំ មកនេះ ស្ថិតិរបស់អគ្គនាយកដ្ឋានអន្តោប្រវេសន៍ខាងលើ បានឲ្យដឹងទៀតថា មានជនអន្តោប្រវេសន៍ខុសច្បាប់ចំនួន ១០៧៨៧ នាក់ ក្នុងនោះ មានស្ត្រី ១៧០៤ នាក់ ដែលមានចំនួន ៦៨ សញ្ជាតិ ត្រូវបានបណ្តេញពីកម្ពុជា។

កាលពីឆ្នាំ២០១៥ កម្ពុជា កន្លងទៅ របាយការណ៍អគ្គនាយកដ្ឋានអន្តោប្រវេសន៍ បានបញ្ជាក់ថាកម្ពុជា បានបណ្តេញជនអន្តោប្រវេសន៍វៀតណាមខុសច្បាប់ចំនួន ៦,២៦៥ នាក់ ក្នុងនោះមានស្រី ៨៦៤នាក់ ។ ដោយឡែក កាលពីឆ្នាំ ២០១៤ កម្ពុជាបានបណ្តេញជនអន្តោប្រវេសន៍វៀតណាមខុសច្បាប់ ចំនួន ១០៥៩នាក់ ក្នុងស្រី ២៤៥នាក់ ចំណោមជនអន្តោប្រវេសន៍ ២៤សញ្ជាតិចំនួន ១៣០៧នាក់៕