ជាតិ
ថ្ងៃនេះ កាលពីខែមុន លោក កែម ឡី ត្រូវបានឃាតកបាញ់សម្លាប់
× ភ្នំពេញ៖ លោក កែម ឡី អ្នកវិភាគនយោបាយ និងជាអ្នកស្រាវជ្រាវការអភិវឌ្ឍសង្គម ត្រូវបានឃាតកបាញ់សម្លាប់ នៅក្នុងស្តាម៉ាតមួយ (Star Mart) ដែលស្ថិតនៅម្តុំស្តុបបូកគោ កាលពីព្រឹកថ្ងៃទី១០ ខែកក្កដា ឆ្នាំ២០១៦។ គិតរហូតមកដល់ថ្ងៃនេះ ឃាតកម្មលើលោក កែម ឡី មានរយៈពេល១ខែហើយ។
កាលពីព្រឹកថ្ងៃទី១០ ខែកក្កដា ឆ្នាំ២០១៦ ភាពជ្រួលច្របល់មួយ បានផ្ទុះឡើងពេញរាជធានីភ្នំពេញ នោះគឺឃាតកម្មលើលោក កែម ឡី ដែលជាអ្នកវិភាគនយោបាយដ៏មានប្រជាប្រិយភាពនៅកម្ពុជា។ ក្នុងរយៈពេលប៉ុន្មានម៉ោងក្រោយមក ភាពភ្ញាក់ផ្អើល បានរីករាលដាលពេញផ្ទៃប្រទេស បន្ទាប់ពីដំណឹងនៃការសម្លាប់លោក កែម ឡី ត្រូវបានផ្សព្វផ្សាយ។
បើទោះបីជាពេលវេលា កន្លងទៅ១ខែហើយក៏ពិតមែន ប៉ុន្តែទិដ្ឋភាពនៃការបាញ់សម្លាប់លោក កែម ឡី នៅតែដក់ជាប់ក្នុងកែវភ្នែករបស់ប្រជាពលរដ្ឋកម្ពុជា។ រឿងរ៉ាវទាំងអម្បាលម៉ាន ដែលជាប់ពាក់ព័ន្ធនឹងឃាតកម្មដ៏សាហាវមួយនេះ នៅតែត្រូវបានគេលើកមកជជែកជារៀងរាល់ថ្ងៃ។
សារព័ត៌មានជាតិ និងអន្តរជាតិ នៅមិនទាន់នឿយណាយក្នុងការចុះផ្សាយពីប្រធានបទ ជុំវិញឃាតកម្មដ៏គួរឲ្យរន្ធត់មួយនេះឡើយ។ រាល់អត្ថបទ រួមទាំងវីដេអូ ទាក់ទិននឹងទស្សនៈ និងការវិភាគ របស់លោក កែម ឡី ដែលធ្លាប់ផ្តល់បទសម្ភាស ដល់ស្ថាប័នសារព័ត៌មាន កាលពីលោក នៅមានជីវិត ត្រូវបានយកមកផ្សព្វផ្សាយឡើងវិញជាបន្តបន្ទាប់។
លើសពីនេះសហគមន៍អន្តរជាតិមួយចំនួន ក៏បានចេញម្តងមួយៗ ដើម្បីស្នើឲ្យរដ្ឋាភិបាល ដែលដឹកនាំដោយគណបក្សប្រជាជនកម្ពុជា ចាត់វិធានការឲ្យម៉ត់ចត់ ក្នុងការស្វែងរកឃាតកពិតប្រាកដ យកទៅផ្តន្ទាទោសតាមច្បាប់។
ចំណែកឯប្រជាពលរដ្ឋទូទៅ ដែលធ្លាប់ស្តាប់លោក កែម ឡី វិភាគរឿងនយោបាយ និងសង្គម មិនទាន់រសាយសេចក្តីសោកសៅពីក្នុងចិត្ត នៅឡើយទេ។ ក្រៅពីស្ថាប័នសារព័ត៌មានផ្លូវការ រូបភាព និងវីដេអូជាច្រើន ដែលពាក់ព័ន្ធនឹងជីវិតលោក កែម ឡី ព្រមទាំងក្រុមគ្រួសាររបស់លោក នៅតែត្រូវបានគេបង្ហោះព្រោងព្រាត នៅក្នុងបណ្តាញសង្គមហ្វេសប៊ុក និងប្រព័ន្ធទំនាក់ទំនងផ្សេងៗទៀត។
មែនទែនទៅ អ្នកប្រើប្រាស់បណ្តាញសង្គមហ្វេសប៊ុកជាច្រើននាក់ នៅតែរក្សា «រូបភាពលោក កែម ឡី» នៅលើ Profile និង Cover របស់ពួកគេ។ ដោយសារតែក្តីស្រឡាញ់ និងការគោរព ប្រជាពលរដ្ឋមួយចំនួន បានចាក់សាក់ជាទស្សនៈរបស់លោក កែម ឡី លើសារពាង្គកាយរបស់ពួកគេថែមទៀត។ ទស្សនៈដ៏មានប្រជាប្រិយភាព ដែលពួកគេ យកទៅចារលើខ្នង ហើយអ្នកខ្លះទៀតចារលើដៃផងនោះគឺ «ជូតទឹកភ្នែករបស់អ្នក ហើយបន្តដំណើរទៅមុខទៀត»។ ពាក្យពេចន៍មួយឃ្លានេះ ត្រូវបានប្រជាពលរដ្ឋស្ទើរគ្រប់ទីកន្លែង ទទ្ទេញជាប់ម៉ាត់ទៅហើយ។
សូមបញ្ជាក់ថា ក្រោយទទួលមរណភាព សពលោក កែម ឡី ត្រូវបានដង្ហែទៅតម្កល់ទុកនៅវត្តពោធិយារាម ហៅវត្តចាស់ ដែលស្ថិតនៅខណ្ឌជ្រោយចង្វា អស់រយៈពេល១៥ថ្ងៃ។ នៅព្រឹកថ្ងៃទី២៤ ខែកក្កដា ឆ្នាំ២០១៦ ក្រុមគ្រួសារ និងគណៈកម្មការរៀបចំបុណ្យ ព្រមទាំងប្រជាពលរដ្ឋយ៉ាងច្រើនកុះករ បានរួមគ្នាដង្ហែសពលោក កែម ឡី យកទៅបញ្ចុះនៅភូមិអង្គតាកុប ឃុំលាយបូរ ស្រុកត្រាំកក់ ខេត្តតាកែវ ដែលជាស្រុកកំណើតរបស់លោក។ រហូតមកដល់ពេលនេះ ប្រជាពលរដ្ឋតាមបណ្តាខេត្តផ្សេងៗ នៅតែបន្តនាំគ្នា ទៅគោរពវិញ្ញាណក្ខន្ធ លោក កែម ឡី ដល់ផ្នូររបស់លោក៕
© រក្សាសិទ្ធិដោយ thmeythmey.com