អ្នកនាំពាក្យមហាផ្ទៃ អំពាវនាវពលរដ្ឋ កុំសងសឹកនឹងវៀតណាម នៅស្រុកពាមរ

ជាតិ

អ្នកនាំពាក្យមហាផ្ទៃ អំពាវនាវពលរដ្ឋ កុំសងសឹកនឹងវៀតណាម នៅស្រុកពាមរ

11, Aug 2016 , 3:05 pm

រូបភាព

ដោយ: ថ្មីៗ

ភ្នំពេញ៖ អ្នកនាំពាក្យក្រសួងមហាផ្ទៃលោក ខៀវ សុភ័គ អំពាវនាវពលរដ្ឋ កុំសងសឹកនឹងពលរដ្ឋ វៀតណាមរស់នៅស្រុកពាមរ ខេត្តព្រៃវែងវិញឡើយ ព្រោះករណីអំពើហិង្សាវាយសម្លាប់ពលរដ្ឋខ្មែរនេះ អាជ្ញាធរកំពុងតាមចាប់ជនល្មើសមកផ្ដន្ទាហើយ។ កាលពីយប់ថ្ងៃទី៧ ខែសីហា កន្លងមកនេះ មានករណីជម្លោះ ហិង្សាមួយដែលបង្កដោយក្រុមជនជាតិវៀតណាម បានវាយសម្លាប់ពលរដ្ឋខ្មែរម្នាក់ នៅស្រុកពាមរ ខេត្តព្រៃវែង។

លោក ខៀវ សុភ័គ បានបញ្ជាកម្លាំងនគរបាលមូលដ្ឋាន ត្រូវចាប់ជនជាតិវៀតណាម លើកគ្នាទៅព្រួតវាយសម្លាប់ដល់ក្នុងផ្ទះ នៅឃុំព្រែកខ្សាយខ ស្រុកពាមរ ខេត្តព្រៃវែង ជាដាច់ខាត ដើម្បីផ្តន្ទាទោសជនល្មើសតាមច្បាប់កម្ពុជា។ អ្នកនាំពាក្យក្រសួងមហាផ្ទៃរូបនេះ បានទទូចពលរដ្ឋឲ្យស្ងប់អារម្មណ៍សិន ដោយទុកពេលវេលាឲ្យអាជ្ញាធរជួយរកយុត្តិធម៌ជូនជនរងគ្រោះ។ បើតាមលោក ខៀវ សុភ័គ អាជ្ញាធរកំពុងបន្តស៊ើបអង្កេតករណីនេះដោយយកចិត្តទុកដាក់ លើករណីខឹងសម្លុតទារបារីជក់ ដែលវៀតណាមលើកគ្នាព្រួតទៅវាយសម្លាប់ខ្មែរនេះ។

លោក ខៀវ សុភ័គ បានបញ្ជាក់យ៉ាងដូច្នេះថា៖«ការសងសឹកគឺខុសច្បាប់។ យើងត្រូវចាប់ជនល្មើសឲ្យ ផ្តន្ទាទោសតាមច្បាប់។ អារឿង ឈ្លោះគ្នានៅពាមរ៍ ទុកមួយដុំទៅ ព្រោះវាជារឿងដោះស្រាយមួយដុំហ្នឹងទៅ កុំឲ្យរាលដាល នាំឲ្យផលប៉ះពាល់ផលប្រយោជន៍ភាគីទាំងពីរ (កម្ពុជា-វៀតណាម)»។

គួរបញ្ជាក់ថា បុរសដែលត្រូវជនជាតិវៀតណាម ព្រួតវាយសម្លាប់នោះ មានឈ្មោះ សេង រត្នធី អាយុ ៣៣ឆ្នាំ និងរបួសប្រពន្ធឈ្មោះ ចាន់ ស៊ីណា អាយ៣១ឆ្នាំ ត្រូវរបួសដើមដៃ និងស្មាខាងឆ្វេង។ មកដល់ពេលនេះ អាជ្ញាធរកម្ពុជាបានចាប់ខ្លួនបុរសជនជាតិវៀតណាម ចំនួន ៦នាក់ បន្ទាប់ពីពួកគេបានកៀរគរជនជាតិវៀតណាម ដូចគ្នាជាច្រើននាក់ ទៅដេញវាយប្រហារលើពលរដ្ឋកម្ពុជា មួយគ្រួសារ ដែលរស់នៅភូមិក្បែរគ្នា បណ្ដាលឲ្យបុរសម្នាក់ជាប្ដីស្លាប់ និងស្ត្រីជាប្រពន្ធដែលមានផ្ទៃពោះ ៩ខែរងរបួសធ្ងន់៕