ជាតិ
ពលរដ្ឋខ្មែរជាង ៩លាននាក់គ្រប់អាយុបោះឆ្នោត
× ភ្នំពេញ៖ ពលរដ្ឋខ្មែរទាំងពីរភេទចំនួន ៩លាន៦សែននាក់ មានអាយុគ្រប់ ដើម្បីចូលរួម ការបោះឆ្នោតជ្រើសរើសក្រុមប្រឹក្សាឃុំ សង្កាត់ ឆ្នាំ២០១៧ និងការបោះឆ្នោតជាតិឆ្នាំ ២០១៨ខាងមុខ។ នេះបើតាមលោក គួយ ប៊ុនរឿន អនុប្រធានគណៈកម្មាធិការជាតិរៀបចំការ បោះឆ្នោត។
លោក គួយ ប៊ុនរឿន ធានាអះអាងថា ការចុះបញ្ជីបោះឆ្នោតនា នឹងធានាបាននូវតម្លាភាព គុណភាព និងសុវត្ថិភាព ពេលខាងមុខ ព្រោះអ្នកជំនាញការបោះឆ្នោតអឺរ៉ុប និងជប៉ុន បានជួយ គ.ជ.ប លើបច្ចេកទេសរៀបចំបញ្ជីបោះឆ្នោតនេះគ្រប់គ្រាន់។
លោកជឿជាក់ថា វានឹងបម្រើឲ្យឆន្ទៈពលរដ្ឋម្ចាស់ឆ្នោត និងគ្រប់គណបក្សនយោបាយទាំងអស់កាន់តែប្រសើរជាងមុន។ លោកអះអាងបែបនេះ មុនពេល គ.ជ.ប បើកទ្វារឃុំសង្កាត់ចំនួន ១៦៣៣កន្លែង ឲ្យពលរដ្ឋចុះឈ្មោះបោះឆ្នោតចាប់ពីថ្ងៃទី១ ខែកញ្ញា ដល់ចុងខែវិច្ឆិកា ឆ្នាំ២០១៦នេះ នៅទូទាំងប្រទេស។
អនុប្រធាន គ.ជ.បរូបនេះ បានប្រាប់ក្រុមអ្នកសារព័ត៌មាន ក្នុងពិធីបើកវគ្គបណ្តុះបណ្តាលអ្នកសារព័ត៌មានស្តីពី ការចុះឈ្មោះបោះឆ្នោតដើម្បីរៀបចំបញ្ជីបោះឆ្នោតថ្មីឆ្នាំ ២០១៦នៅថ្ងៃទី១២ ខែសីហានេះថា ពលរដ្ឋចំនួន ៩លាន៦សែន មានអាយុគ្រប់បោះឆ្នោត ខាងមុខ។ ក្នុងនោះ ភាគច្រើននៃពលរដ្ឋគ្រប់អាយុបោះឆ្នោតជាយុវជនអាយុក្រោម ៣០ឆ្នាំ។
បន្ថែមលើសពីនេះ លោកបានផ្ញើតាមរយៈអ្នកសារព័ត៌មានអំពាវនាវពលរដ្ឋដែលបានបំពេញលក្ខខណ្ឌបោះឆ្នោត មានអត្តសញ្ញាណបណ្ណសញ្ជាតិខ្មែរទាំងចាស់ និងថ្មី ឲ្យអញ្ជើញទៅចុះ ឈ្មោះឲ្យបានគ្រប់គ្នា ដើម្បីជ្រើសរើសថ្នាក់ដឹកនាំអភិវឌ្ឍប្រទេសជាតិ។
ជាមួយគ្នា លោកបន្តនិយាយពីការជំរុញការចុះឈ្មោះពលរដ្ឋក្នុងបញ្ជីបោះឆ្នោតនាពេលខាងមុខថា គ.ជ.ប បានបោះពុម្ពលិខិតអញ្ជើញពលរដ្ឋចូលរួមបោះឆ្នោតជាង ១២លានសន្លឹកផងដែរ ដើម្បីធានាថាសេចក្តីជូនដំណឹងពីការបោះឆ្នោតបានដល់ដៃពួកគគ្រប់គ្រាន់។
«ច្បាប់របស់យើងកំណត់ឲ្យមនុស្សម្នាក់បោះតែមួយទេ។ទីពីរ ប្រសិទ្ធិភាពនៃការរៀបចំប្រព័ន្ធ បោះឆ្នោតលើកនេះ គឺមានលក្ខណៈពិសេសមួយ ដើម្បីឲ្យបញ្ជីបោះឆ្នោតមួយមានតម្លាភាព បញ្ជីបោះឆ្នោតដែលមានគុណភាព ហើយបញ្ជីបោះឆ្នោតមានសុវត្ថិភាព។ សុវត្ថិភាព មានន័យថា ការពារទិន្នន័យពលរដ្ឋមានឈ្មោះបោះឆ្នោត កុំឲ្យបាត់បង់។ តម្លាភាពបានន័យថា មនុស្សម្នាក់ចុះបានតែម្នាក់។ រីឯ គុណភាព គឺថា បញ្ជីបោះឆ្នោតអាចប្រើប្រាស់បាន ដោយពុំមានបញ្ហាដូចពីមុនដែលរងការចោទប្រកាន់»។ លោក គួយ ប៊ុនរឿន និយាយបញ្ជាក់បន្ថែមលើការរៀបចំបញ្ជីបោះឆ្នោតរបស់អ្នកជំនាញការអឺរ៉ុប និងជប៉ុន។
បើតាមលោក គួយ ប៊ុនរឿន មកទល់ពេលនេះ គ.ជ.ប បានដោះស្រាយសំណើជូនគណបក្ស នយោបាយ និងភាគីពាក់ព័ន្ធនានាជាង ៨០ភាគរយហើយ។
សូមបញ្ជាក់ថាគ.ជ.ប បានត្រៀមថវិកាចំនួន២៣លានដុល្លារផងដែរដើម្បីចាយវាយក្នុងអំឡុងពេលនៃការចុះឈ្មោះបោះឆ្នោតថ្នាក់ឃុំ-សង្កាត់នាឆ្នាំ២០១៧ ខាងមុខ៕
© រក្សាសិទ្ធិដោយ thmeythmey.com