ដូណាល់ ត្រាំ ថាការចោទ អូបាម៉ា និងហ៊ីឡារី ជាអ្នកបង្កើតក្រុម IS ជាការចំអកប៉ុណ្ណោះ

អន្តរជាតិ

នយោបាយអន្តរជាតិ

ដូណាល់ ត្រាំ ថាការចោទ អូបាម៉ា និងហ៊ីឡារី ជាអ្នកបង្កើតក្រុម IS ជាការចំអកប៉ុណ្ណោះ

13, Aug 2016 , 8:34 pm

រូបភាព

ដោយ: ថ្មីៗ

ក្រោយត្រូវគេរិះគន់ខ្លាំងក្រោយចេញមុខចោទប្រកាន់ប្រធានាធិបតីបារ៉ាក់ អូបាម៉ា និងលោកស្រីហ៊ីឡារី គ្លីនតុន ថាជាសហស្ថាបនិកនៃក្រុមភេរវជនរដ្ឋឥស្លាម លោក ដូណាល់ ត្រាំ បានចេញមុខបកស្រាយថា លោកគ្រាន់តែនិយាយចំអកឲ្យអ្នកទាំងពីរប៉ុណ្ណោះ។ លោកក៏ចោទប្រព័ន្ធផ្សព្វផ្សាយដែលនាំគ្នាបកស្រាយសម្តីលោកខុសដែរ។

បេក្ខជនប្រធានាធិបតី ដូណាល់ ត្រាំ បានចេញមុខបន្ទោសប្រព័ន្ធផ្សព្វផ្សាយថា បាននាំគ្នាបកស្រាយពាក្យសម្តីលោកខុសពាក់ព័ន្ធការចោទប្រកាន់លោក បារ៉ាក់ អូបាម៉ា និងលោកស្រី ហ៊ីឡារី គ្លីនតុនថាជាអ្នកបង្កើតក្រុមភេរវជនរដ្ឋឥស្លាមឬក្រុមដែស្ហនោះ។ លោកបន្តថា លោកគ្រាន់តែនិយាយចំអកឡកឡឺយ ឲ្យអ្នកនយោបាយទាំងពីរនាក់ប៉ុណ្ណោះ ព្រោះតែគោលនយោបាយបរាជ័យរបស់អ្នកទាំងពីរ ទើបក្រុមភេរវជននេះអាចចេញរូបរាងមកបាន។

លោកពន្យល់ថា អ្វីដែលលោកនិយាយគឺចង់មានន័យថា ការដកទ័ពពីអ៊ីរ៉ាក់របស់លោក បារ៉ាក់ អូបាម៉ា និងមានលោកស្រី ហ៊ីឡារី ជារដ្ឋមន្ត្រីការទេសនោះ បានបង្កើតឲ្យមានស្ថានភាពមួយចលាចលដែលគ្មានអ្នកណាគ្រប់គ្រងត្រឹមត្រូវនៅអ៊ីរ៉ាក់ ដែលវាអនុញ្ញាតឲ្យក្រុមរដ្ឋឥស្លាមអាចលេចចេញជារូបរាងបាននោះ។

យ៉ាងណាមិញ វាហាក់បីដូចជា លោក ដូណាល់ ត្រាំ ព្យាយាមនិយាយយកតែរួចខ្លួនប៉ុណ្ណោះ ព្រោះថា លោកមិនបានពន្យល់ឲ្យបានច្បាស់ឡើយពាក់ព័ន្ធពាក្យសម្តីដែលលោកនិយាយនិងចោទប្រកាន់លោក អូបាម៉ា និងលោកស្រី ហ៊ីឡារី គ្លីនតុននោះ។ ហើយអ្វីដែលសំខាន់នោះគឺលោកមិនមែនចោទប្រកាន់លោកស្រី ហ៊ីឡារី និងលោក អូបាម៉ា តែម្តងឯណា លោកបានចោទប្រកាន់អ្នកទាំងពីរក្នុងបទសម្ភាសន៍មួយកាលពីថ្ងៃព្រហស្បតិ៍ថែមទៀតផង។

សូមបញ្ជាក់ថា ក្នុងការជួបជុំជាមួយអ្នកគាំទ្រនៅរដ្ឋ Florida លោក ដូណាល់ ត្រាំ បានចោទប្រកាន់ដោយមិនស្ទាក់ស្ទើរថា ប្រធានាធិបតីបារ៉ាក់ អូបាម៉ា និងបេក្ខជនប្រធានាធិបតីបក្សប្រជាធិបតេយ្យលោកស្រី ហ៊ីឡារី គ្លីនតុន ជាសហស្ថាបនិកនៃក្រុមភេរវជនជីហាតរដ្ឋឥស្លាម។

លោកបានថ្លែងថា៖«ក្រុមភេរវជនគោរពប្រធានាធិបតី អូបាម៉ា។ អូបាម៉ានេះហើយជាស្ថាបនិករបស់ក្រុមរដ្ឋឥស្លាម។ គាត់បង្កើតក្រុមនេះឡើងមក។ ហើយខ្ញុំចង់ថា គាត់ប្រហែលជាសហស្ថាបនិកជាមួយអ្នកនយោបាយក្រឡិចក្រឡុច ហ៊ីឡារី គ្លីនតុន»។

សេដ្ឋីអចលទ្រព្យរូបនេះព្យាយាមលើកឡើងនិងចោទប្រកាន់រដ្ឋបាលអាមេរិកបច្ចុប្បន្ននិងគូប្រជែងរបស់លោកបែបនេះ ក៏ប្រហែលជាដើម្បីបង្ហាញទៅកាន់អ្នកគាំទ្រលោកថា ទាំងលោក អូបាម៉ានិងលោកស្រី គ្លីនតុន សុទ្ធតែមិនមានលទ្ធភាពដោះស្រាយនិងទប់ស្កាត់ការគំរាមកំហែងពីសំណាក់ក្រុមភេរវជននោះ។ ហើយអ្នកនយោបាយរូបនេះក៏ព្យាយាមភ្ជាប់បញ្ហានេះជាមួយករណីបាញ់ប្រហារភេរវកម្មនៅក្រុង Orlando កន្លងមកដែរ៕